নতুন দিল্লী, ১০ অক্টোবৰ (হি.স.)। শুকুৰবাৰে বৈদেশিক পৰিক্ৰমা মন্ত্ৰী ড০ এছ জয়শংকৰ আৰু তেওঁৰ আফগান সমকক্ষ আমিৰ খান মুত্তাকীয়ে দ্বিপাক্ষিক আলোচনাত মিলিত হয়। বৈদেশিক পৰিক্ৰমা মন্ত্ৰী ড০ জয়শংকৰে এই আলোচনাক আফগানিস্তানৰ সৈতে ভাৰতৰ সম্পৰ্কৰ নৱজাগৰণ বুলি অভিহিত কৰি কাবুলত থকা তেওঁলোকৰ অভিযানক দূতাবাসৰ মৰ্যাদালৈ উন্নীত কৰাৰ কথা ঘোষণা কৰে।

উল্লেখ্য যে ৯ অক্টোবৰৰ পৰা ১৬ অক্টোবৰলৈ আফগান বৈদেশিক মন্ত্ৰী মুত্তাকীয়ে ভাৰত ভ্ৰমণ কৰি আছে। আজি তেওঁ বৈদেশিক পৰিক্ৰমা মন্ত্ৰীৰ সৈতে আনুষ্ঠানিক বৈঠক আৰু আলোচনাত মিলিত হয়।

বৈদেশিক পৰিক্ৰমা মন্ত্ৰী জয়শংকৰে কয়, এজন ঘনিষ্ঠ প্ৰতিবেশী আৰু জনসাধাৰণৰ শুভাকাংক্ষী হিচাপে ভাৰতৰ আফগানিস্তানৰ উন্নয়ন আৰু প্ৰগতিৰ প্ৰতি গভীৰ আগ্ৰহ আছে। আজি মই পুনৰ দৃঢ়তাৰে কওঁ যে আমাৰ দীৰ্ঘদিনীয়া অংশীদাৰিত্ব, যাৰ অধীনত আফগানিস্তানত ভাৰতীয় অসংখ্য প্ৰকল্প সম্পূৰ্ণ হৈছে, এতিয়া অধিক শক্তিশালীভাৱে আগবাঢ়ি যাব।

আফগান শৰণাৰ্থীসকলৰ পৰিস্থিতিক গুৰুতৰ চিন্তাৰ বিষয় বুলি অভিহিত কৰি ভাৰতে তেওঁলোকৰ পুনৰ্বাসনত সহায় কৰিবলৈ ইচ্ছা প্ৰকাশ কৰে। জয়শংকৰে কয় যে ভাৰতে এই শৰণাৰ্থীসকলৰ বাবে গৃহ নিৰ্মাণ আৰু অত্যাৱশ্যকীয় সামগ্ৰী যোগান ধৰিব যাতে তেওঁলোকে মৰ্যাদাৰ জীৱন যাপন কৰিব পাৰে।

বৈদেশিক পৰিক্ৰমা মন্ত্ৰীগৰাকীয়ে সীমা অতিক্ৰম কৰি সন্ত্ৰাসবাদক ভাৰত আৰু আফগানিস্তানৰ সন্মুখত এক উমৈহতীয়া প্ৰত্যাহ্বান বুলি অভিহিত কৰি কয় যে ই দুয়োখন দেশৰ স্থিতিশীলতা আৰু উন্নয়নৰ প্ৰতি ভাবুকি কঢ়িয়াই আনিছে। ভাৰতে সন্ত্ৰাসবাদৰ সকলো ৰূপ আৰু প্ৰকাশভংগীৰ বিৰুদ্ধে যুঁজিবলৈ সমন্বিত প্ৰচেষ্টাৰ প্ৰয়োজনীয়তাৰ ওপৰত গুৰুত্ব আৰোপ কৰি আফগান পক্ষই ভাৰতৰ নিৰাপত্তাজনিত চিন্তাৰ বিষয়ে বুজাৰ শলাগ লয়।

বৈদেশিক পৰিক্ৰমা মন্ত্ৰী ড০ জয়শংকৰে আফগানিস্তানৰ সাৰ্বভৌমত্ব, ভূখণ্ডৰ অখণ্ডতা, আৰু স্বাধীনতাৰ প্ৰতি ভাৰতৰ সম্পূৰ্ণ দায়বদ্ধতা পুনৰবাৰ উল্লেখ কৰি এই ভ্ৰমণক সম্পৰ্কক আগুৱাই নিয়াৰ লগতে বন্ধুত্ব সুদৃঢ় কৰাৰ এক গুৰুত্বপূৰ্ণ পদক্ষেপ বুলি অভিহিত কৰে।

স্বাস্থ্য সুৰক্ষাৰ ক্ষেত্ৰত দীৰ্ঘদিনীয়া নিয়োজিততাৰ কথা উল্লেখ কৰি তেওঁ অধিক সহযোগিতা ঘোষণা কৰে। ইয়াৰ ভিতৰত আছে ছটা নতুন প্ৰকল্প, ২০খন এম্বুলেন্স, এম আৰ আই আৰু চিটি স্কেন মেচিন উপহাৰ, আফগান চিকিৎসালয়লৈ টিকাকৰণ আৰু কেন্সাৰৰ ঔষধ। ইউএনঅ’ডিচিৰ জৰিয়তে নিচামুক্তকৰণ সামগ্ৰী যোগান ধৰিবলৈ সাজু ভাৰত।

তদুপৰি বৈদেশিক পৰিক্ৰমা মন্ত্ৰীয়ে আফগান ছাত্ৰ-ছাত্ৰীসকলৰ বাবে ভাৰতীয় বিশ্ববিদ্যালয়ত অধ্যয়নৰ সুযোগ সম্প্ৰসাৰণ আৰু চিকিৎসা, ব্যৱসায়, আৰু ছাত্ৰ শিতানত অধিক ভিছা প্ৰদানৰ আহ্বান জনায়।

বৈদেশিক পৰিক্ৰমা মন্ত্ৰীগৰাকীয়ে উল্লেখ কৰে যে শেহতীয়া ভূমিকম্পৰ দুৰ্যোগৰ সময়ত ভাৰতে আগশাৰীৰ স্থানত আছিল আৰু দীৰ্ঘদিন ধৰি আফগানিস্তানৰ খাদ্য সাহায্য প্ৰদানকাৰী দেশ হিচাপে পৰিগণিত হৈছে। তেওঁ ক্ৰিকেট এংগেজমেণ্টৰ বিষয়ে কয় আৰু আফগান দলৰ উত্থানৰ প্ৰশংসা কৰে। তেওঁ ভাৰতৰ জলসম্পদৰ বহনক্ষম ব্যৱস্থাপনাৰ ক্ষেত্ৰত ভাৰতৰ সহযোগিতা, ভাৰতত খনন কৰিবলৈ ভাৰতীয় কোম্পানীক আমন্ত্ৰণ জনোৱা, বাণিজ্য আৰু বাণিজ্য সম্প্ৰসাৰণৰ প্ৰতি আফগান পক্ষৰ আগ্ৰহৰ প্ৰশংসা কৰে।

আলোচনাৰ আৰম্ভণিতে আফগান বৈদেশিক মন্ত্ৰী আমিৰ খান মুত্তকীয়ে কয় যে আফগানিস্তানে ভাৰতক ঘনিষ্ঠ বন্ধু হিচাপে লয় আৰু দুয়োখন দেশৰ যোগাযোগ আৰু আদান-প্ৰদান বৃদ্ধি কৰিব লাগে। তেওঁ কয় যে আফগানিস্তানে পাৰস্পৰিক সন্মান, বাণিজ্য, আৰু জনসাধাৰণৰ সম্পৰ্কৰ ওপৰত ভিত্তি কৰি সম্পৰ্ক বিচাৰে। 'আমি পাৰস্পৰিক বুজাবুজিৰ বাবে এক পৰামৰ্শমূলক ব্যৱস্থা স্থাপন কৰিবলৈ সাজু যিয়ে আমাৰ সম্পৰ্ক শক্তিশালী কৰাত সহায় কৰিব।'

তেওঁ উল্লেখ কৰে যে তালিবানে কেতিয়াও ভাৰতৰ বিৰুদ্ধে বক্তব্য দিয়া নাই আৰু ভাৰতৰ সৈতে সুসম্পৰ্কৰ গুৰুত্ব সদায় বজাই ৰাখিছে। লগতে তেওঁলোকে নিজৰ ভূখণ্ড আনৰ বিৰুদ্ধে ব্যৱহাৰ হ’বলৈ নিদিয়ে বুলিও আশ্বাস দিয়ে।

মন কৰিবলগীয়া যে আফগানিস্তানত তালিবানে পুনৰ ক্ষমতালৈ অহাৰ পিছত দুয়োখন দেশৰ মাজত এইটোৱেই প্ৰথম উচ্চ পৰ্যায়ৰ আলোচনা। পূৰ্বৰ আমেৰিকা সমৰ্থিত চৰকাৰৰ সৈতে ভাৰতৰ ভাল সম্পৰ্ক আছিল আৰু আফগানিস্তানৰ কেইবাটাও উন্নয়নমূলক প্ৰকল্পৰ অংশীদাৰ আছিল।

हिन्दुस्थान समाचार / মনোজ কুমাৰ শইকীয়া