গুৱাহাটী, ২১ জানুৱাৰী (হি.স.)। মহানগৰীৰ দুটাকৈ স্থানত আৰক্ষীয়ে অভিযান চলায় ড্ৰাগছসহ দুটাকৈ ড্ৰাগছ সৰবৰাহকাৰী আটক কৰিবলৈ সক্ষম হৈছে। মহানগৰীৰ পাণবজাৰ আৰক্ষীৰ এক অভিযানত গুৱাহাটীৰ ২ নং ৰেলগেটৰ পৰা বাবলু নওগ (২৪) নামৰ এজন ড্ৰাগছ সৰবৰাহকাৰীক ড্ৰাগছ সহ আটক কৰে। তিনিচুকীয়াৰ বৰদলৈ নগৰৰ বাসিন্দা বাব্লুক ৭ টাকৈ সৰু বটলত ভৰাই অনা ১০.৫৭ গ্ৰাম ড্ৰাগছসহ আৰক্ষীয়ে আটক কৰে।
আৰক্ষীৰ আন এক অভিযানত জালুকবাৰী আৰক্ষীয়ে জালুকবাৰীৰ কাটিয়া ব্ৰীজৰ সমীপৰ পৰা ৰশ্মি দেৱী ওৰফে স্বাবি খাতুন (৩৫) নামৰ মহিলা ড্ৰাগছ সৰবৰাহকাৰীক ড্ৰাগছ সহ আটক কৰে। জালুকবাৰীৰ কাটিয়া ব্ৰীজৰ হজ ভৱনৰ সমীপৰ মহিলা ড্ৰাগছ সৰবৰাহকাৰী গৰাকীৰ পৰা আৰক্ষীয়ে ২৬ টাকৈ হেৰোইন ভৰ্তি বটল জব্দ কৰে। হেৰোইনখিনিৰ ওজন ৩৫ গ্ৰাম বুলি আৰক্ষীয়ে জানিবলৈ দিনয়ে। আনহাতে মহিলাগৰাকীৰ পৰা আৰক্ষীয়ে ৯০০ টকাও জব্দ কৰে। আৰক্ষীয়ে দুয়োটা ড্ৰাগছ সৰবৰাহকাৰীক অধিক তথ্যৰ বাবে জেৰা চলায় আছে।
হিন্দুস্থান সমাচাৰ / আলোক চক্ৰৱৰ্তী
