কলকাতা, ০৪ ছেপ্টেম্বৰ (হি.স.)। আৰ জি কৰ মেডিকেল কলেজ এণ্ড হস্পিতালত এগৰাকী প্ৰশিক্ষাৰ্থী মহিলা চিকিৎসকক ধৰ্ষণ তথা হত্যাৰ পিছত বিদেশী চিম কাৰ্ডৰ পৰা চিকিৎসালয় কৰ্তৃপক্ষলৈ কেইবাটাও ফোন কল কৰাৰ কথা পোহৰলৈ আহিছে। চিবিআইৰ তদন্তত প্ৰকাশ পাইছে যে ৯ আগষ্টৰ পুৱা ১০ বজাৰ পৰা এই বিদেশী চিম নম্বৰৰ পৰা চিকিৎসক আৰু প্ৰাক্তন অধ্যক্ষ সন্দীপ ঘোষৰ ঘনিষ্ঠ অন্যান্য বিষয়াসকললৈ কেইবাবাৰো ফোন কৰা হৈছিল।

চিবিআইৰ সূত্ৰ অনুসৰি এই বিদেশী চিম ব্যৱহাৰকাৰীয়ে অপৰাধৰ পিছত প্ৰমাণ ধ্বংস কৰাৰ চেষ্টাত বা চিকিৎসকৰ শেষ ৰীতি-নীতি খৰতকীয়া কৰাত ভূমিকা গ্ৰহণ কৰিছিল। এই নম্বৰটো আন কোনো কামত ব্যৱহাৰ কৰা হৈছিল নে নাই সেয়াও তদন্তৰ বিষয়।

তদন্তৰ সৈতে জড়িত বিষয়াসকলে কয় যে বিদেশী চিম ব্যৱহাৰ কৰিলে গ্ৰাহকৰ পৰিচয় প্ৰায়ে গম পোৱা নাযায়, কাৰণ বিদেশী সেৱা প্ৰদানকাৰীয়ে গ্ৰাহকৰ তথ্য ভাগ-বতৰা নকৰে। চিবিআইৰ এজন বিষয়াই কয়, প্ৰিপেইড চিম প্ৰায়ে বহিঃৰাজ্যৰ পৰা ক্ৰয় কৰি ভাৰতত ব্যৱহাৰ কৰা হয়। এই পদ্ধতি ইতিমধ্যে বিভিন্ন তদন্তত পোহৰলৈ আহিছে।

এই বিষয়াজনে এইটোও ক’লে যে এই চিমটো ডুবাই বা বাংলাদেশৰ হ’ব পাৰে। এই চিমৰ নম্বৰ কেন্দ্রীয় গৃহ মন্ত্র্যালয়লৈ প্ৰেৰণ কৰা হৈছে যাতে এই চিম কাৰ নামত আৰু ক’ৰ পৰা লোৱা হৈছে সেই কথা জানিব পৰা যায়। সূত্ৰসমূহে লগতে কয় যে মহিলা চিকিৎসকগৰাকীৰ মৃতদেহৰ পৰা নমুনা সংগ্ৰহৰ পৰা আৰম্ভ কৰি অন্ত্য়েষ্টিক্ৰিয়ালৈ এই প্ৰক্ৰিয়াত বহু ভুল হৈছে, যাৰ ফলত তদন্তত ইচ্ছাকৃতভাৱে বাধা আহিছিল নেকি বুলি সন্দেহৰ সৃষ্টি হৈছে। এজন তদন্তকাৰী বিষয়াৰ মতে, প্ৰথম অৱস্থাত কিছুমান ভুল খৰখেদাকৈ কৰা যেন লাগিছিল, কিন্তু এতিয়া এনে লাগে যে ইয়াৰ আঁৰত হয়তো অভিজ্ঞ মন এটাই পৰিকল্পনা কৰিছিল।

তদন্তকাৰী বিষয়াসকলেও বিশ্বাস কৰে যে এই চিম ব্যৱহাৰ কৰা ব্যক্তিজন ‘প্ৰভাৱশালী’ ব্যক্তি হ’ব পাৰে আৰু এই গোচৰৰ সৈতে প্ৰত্যক্ষভাৱে জড়িত নহ’লেও এই ঘটনাৰ আঁৰত এজন আৰক্ষী বিষয়াৰ ছাঁও থাকিব পাৰে। এই বিদেশী চিমৰ জৰিয়তে কোনে ফোন কৰা ব্যক্তি আৰু তেওঁৰ উদ্দেশ্য কি আছিল সেই বিষয়েও তদন্ত কৰি আছে চিবিআইয়ে। এই বিষয়টোৰ ওপৰত গভীৰ তদন্ত চলি আছে যাতে সত্য ওলাব পাৰে।

হিন্দুস্থান সমাচাৰ / অৰৱিন্দ