বৰপেটা, ০৪ ছেপ্টেম্বৰ (হি.স.): ৰাজ্যত অব্যাহত আছে নকল সোণৰ বেহা । হাউলীত আৰক্ষীয়ে নকল সোণৰ নাওৰ ভঙা অংশসহ তিনি প্ৰৱঞ্চকক গ্ৰেপ্তাৰ কৰিছে । বৰপেটাৰ হাউলীত নকল সোণৰ নাও ব্যৱসায়ীৰ বিৰুদ্ধে আৰক্ষীয়ে অভিযান চলায়। অভিযানত নকল সোণৰ নাওসহ ৩ প্ৰৱঞ্চকক গ্ৰেপ্তাৰ কৰা হয়।
হাউলীৰ ফুলকীপাৰাৰ আব্দুৰ ৰহিমৰ বাসগৃহত চলা অভিযানত সোণৰ ভঙা নাওৰ টকুৰাসহ নকল সোণ ব্যৱসায়ী তিনিটাক গ্ৰেপ্তাৰ কৰে আৰক্ষীয়ে ।আৰক্ষীয়ে গ্ৰেপ্তাৰ কৰা ধৃত প্ৰবঞ্চক কেইটা হৈছে লখিমপুৰৰ সোণাপুৰ ৰিজাৰ্ভ গাঁৱৰ ৰচিদুল হক, হাউলীৰ ফুলকি পাৰা গাৱৰ আব্দুৰ ৰহিম আৰু হুছেইন আলী । লখিমপুৰৰ ৰচিদুল হকে নকল সোণৰ নাওৰ টুকুৰাটো লখিমপুৰৰ পৰা হাউলীলৈ বিক্ৰীৰ উদ্দেশ্যে আনিছিল । সোণৰ ভঙা নাওৰ টুকুৰাটো বিক্ৰীৰ উদ্দেশ্য গ্ৰাহকৰ সন্ধান চলাই থকাৰ সময়তে আৰক্ষীয়ে তিনি অভিযুক্তক গ্ৰেপ্তাৰ কৰে। সম্প্ৰতি তিনিওটা অভিযুক্তৰে জেৰা অব্যাহত ৰাখিছে আৰক্ষীয়ে ।
হিন্দুস্থান সমাচাৰ / কিশোৰ মিশ্ৰ
