হোজাই, ১০ ছেপ্টেম্বৰ (হি.স.): লামডিং ৰেলৱে আৰক্ষী জিআৰপিয়ে এখন ৰে’লৰ পৰা জব্দ কৰা প্ৰায় ৪ টন মুঠ ৩৭৮০ কেজি বাৰ্মিজ চুপাৰি নিলাম কৰিবলৈ ওলাইছে ৷ লামডিং ৰে’ল আৰক্ষীয়ে জনোৱা মতে জব্দ কৰা বাৰ্মিজ চুপাৰিৰ যদি কোনো মালিক থাকে তেনেহলে বৈধ নথিপত্ৰ লৈ লামডিং ৰেল আৰক্ষী জিআৰপি থানাত আহি জমা দিব লাগিব ৷

লামডিং ৰে’ল আৰক্ষীয়ে জনায় যে যোৱা ২০/০১/২০২৪ তাৰিখে লামডিং ৰেলৱে ষ্টেচন প্লেটফৰ্ম নং ৫ ট্ৰেইন নং ১৩১৭৪ কাঞ্চনজংগা ৰে’ল খনৰ পৰা অবৈধ ভাৱে সৰবৰাহ কৰা মুঠ ৩৭৮০ কেজি প্ৰায় ৪ টন সন্দেহ জনক বিদেশী বাৰ্মিজ চুপাৰি উদ্ধাৰ কৰি জব্দ কৰা হয়। বৰ্তমান উক্ত জব্দকৃত চুপাৰি সমূহ লামডিং ৰে’ল আৰক্ষী থানাত ৰখা আছে ৷ যদি ইয়াৰ কোনো মালিক থাকে তেনেহলে বৈধ নথি পত্ৰ লৈ জিন্মাত লোৱাৰ বাবে লামডিং ৰে’ল আৰক্ষী জিআৰপি থানাৰ লগত অহা ২০/০৯/২০২৪ তাৰিখৰ আগতেই যোগাযোগ কৰিবলৈ কোৱা হৈছে ৷লামডিং ৰে’ল আৰক্ষী থানা গোচৰ নং ০৮/২০২৪ ভা: দ: বি: আইন ১২০(B)৪২০/৪৬৮/৪৭১/৩৭৯/৪১১ ধাৰাত বাৰ্মিজ চুপাৰি খিনি জব্দ কৰা হৈছিল ৷

হিন্দুস্থান সমাচাৰ / কিশোৰ মিশ্ৰ