বৰপেটা, ০৫ মে' (হি.স.)। তৃতীয় পৰ্যায়ৰ নিৰ্বাচনৰ প্ৰচাৰৰ আজি অন্তিম দিনটোত বৰপেটাত মনোৰঞ্জন তালুকদাৰৰ সমৰ্থনত চিপিআইএমৰ বৃহৎ সমদল৷ চিপিআইএমৰ বৰপেটা জিলা কাৰ্যালয়ৰ পৰা উলিওৱা সমদলে সমগ্ৰ বৰপেটা চহৰ পৰিভ্ৰমণ কৰে।
গীত-মাত, শ্লোগানেৰে মুখৰিত সমদলৰ মাজতে প্ৰাৰ্থী মনোৰঞ্জন তালুকদাৰে কয়- সমষ্টিৰ সকলো শ্ৰেণীৰ ৰাইজৰ পৰা আমি অভূতপূৰ্ব সঁহাৰি লাভ কৰিবলৈ সক্ষম হৈছো। মানুহে যোগ্য প্ৰাৰ্থী এজন সংসদলৈ পঠাব বিচাৰিছে৷
অগপই ৩০ শতাংশ সংখ্যালঘুৰ ভোট পাব বুলি কোৱা কথাৰো প্ৰতিক্ৰিয়া মনোৰঞ্জন তালুকদাৰৰ— তেওলোকে কল্পনা কৰি থাকক৷ তেওলোকে সপোন দেখা ভাল, কাৰণ মঞ্চতে টোপনি যায় বাবে সপোন ভালকৈ দেখিব পাৰে৷ আমি যুঁজত আছো, আমি জয়ী হম বুলি আমি আত্মবিশ্বাসী৷ মুখ্যমন্ত্ৰীৰ সভাত এইবাৰ উন্মাদনাও নাই, জনসমাগমো নাই ৷মুখ্যমন্ত্ৰীক মানুহে এৰাই চলিছে৷ সকলো দলেই হেলিকপ্টাৰেৰে প্ৰচাৰ চলোৱাৰ বিপৰীতে চিপিআইএমে মাটিৰ দল হিচাপে মাটিৰ মানুহৰ লগত আছে।
হিন্দুস্থান সমাচাৰ/প্ৰকাশ/ৰমেন/আলোক.