নলবাৰী, ২৯ এপ্ৰিল (হি স)। মঞ্চ আৰু বোলছবি জগতৰ বিশিষ্ট অভিনেত্ৰী প্ৰস্তুতি পৰাশৰলৈ আগবঢ়োৱা হৈছে “ধন্য নাৰী ধন্য বসুন্ধৰা ” সন্মান ৷ মঞ্চ আৰু বোলছবি জগতৰ মোহময়ী অভিনেত্ৰী প্ৰস্তুতি পৰাশৰক তেওঁৰ অভিনয় প্ৰতিভা আৰু পৰিচালনা দক্ষতাৰ স্বীকৃতি স্বৰূপে এই সন্মান আগবঢ়াইছে নলবাৰী জিলাৰ হেলচাৰ নৱাৰুণ ক্লাৱে ৷
অভিনেত্ৰী গৰাকীক দেওবাৰে হেলচা নৱাৰুণ ক্লাৱৰ উদ্যোগত আয়োজন কৰা ৰঙালী বিহু উৎসৱত প্ৰদান কৰা হয় এই সন্মান । ধন্য নাৰী ধন্য বসুন্ধৰা বটা লাভ কৰি আনন্দিত হয় প্ৰস্তুতি পৰাশৰ । উক্ত বঁটা গ্ৰহণৰ পিছতে নাটকৰ সংলাপ আৰু বিহু নাচি দৰ্শকক আপ্লুত কৰে প্ৰস্তুতি পৰাশৰে । উল্লেখ্য যে দেওবাৰে পুৱা পতাকা উত্তোলন, স্মৃতি তৰ্পণ, বৃক্ষ ৰোপণৰ পিছতে খেল ধেমালি প্ৰতিযোগিতা অনুষ্ঠিত হয় ৷ আবেলি নৱাৰুণ ক্লাৱৰ লগত জড়িত প্ৰয়াত ব্যক্তিৰ শ্ৰদ্ধাঞ্জলি অনুষ্ঠান অনুষ্ঠিত হয় ৷ সন্ধিয়া মুকলি বিহু প্ৰতিযোগিতা অনুষ্ঠিত হয় । জনপ্ৰিয় অভিনেতা নিৰ্মল দত্তই আতধৰা উক্ত অনুষ্ঠানটোত নৱাৰুণ ক্লাৱ আৰু বিহু উদযাপন সমিতিয়ে ৮ গৰাকী বিশিষ্ট ব্যক্তিক সম্বৰ্দ্ধনা জনোৱাৰ লগতে অভিনেত্ৰী গৰাকীক বটা প্ৰদান কৰা হয়।
হিন্দুস্থান সমাচাৰ/প্ৰকাশ/মনোজ
