নতুন দিল্লী, ২৩ এপ্ৰিল (হি.স.)। ভাৰতীয় স্কোয়াছ খেলুৱৈ সৌৰভ ঘোষালে সোমবাৰে পেছাদাৰী স্কোয়াছৰ পৰা অৱসৰ লোৱাৰ কথা ঘোষণা কৰে। ২২ বছৰীয়া কেৰিয়াৰত ঘোষালে কমনৱেলথ গেমছ (চি ডব্লিউ জি) আৰু এছিয়ান গেমছত ১০টা প্ৰফেচনেল স্কোয়াছ এছ’চিয়েশ্যন (পি এছ এ) খিতাপ আৰু কেইবাটাও পদক লাভ কৰে।
৩৭ বছৰীয়া খেলুৱৈগৰাকীয়ে বিশ্বৰ স্কোয়াছ ৰেংকিঙতো শীৰ্ষ ১০ ৰ ভিতৰত স্থান লাভ কৰিছিল। ২০১৯ চনৰ এপ্ৰিল মাহত শীৰ্ষ ১০ ৰ ভিতৰত স্থান লাভ কৰি ছমাহ তাতেই থাকে।
সোমবাৰে ঘোষালে ইনষ্টাগ্ৰামত লিখিছে, মই ২২ বছৰ পূৰ্বে পি এছ এ ৱৰ্ল্ড ট্যুৰত মোৰ যাত্ৰা আৰম্ভ কৰিছিলো। সেই সময়ত মই কেতিয়াও সপোনতো ভবা নাছিলো যে মই ইমান দিনে পেছাদাৰী স্কোয়াছ খেলিম। যেতিয়া মই আমাৰ আশ্চৰ্যকৰ খেলৰ কিছুমান ডাঙৰ প্লেটফৰ্মত খেলি বিশ্বজুৰি ভ্ৰমণ কৰিছিলো, মই ভাবিছিলো যে এইটো কেতিয়াও শেষ নহ'ব। কিন্তু, সদায়ে এটা অন্তিম বিন্দু থাকে। এই বাৰ্তাটো লিখাৰ সময়ত মই আৱেগত আপ্লুত হৈ পৰিছো। এই খেলটো ইমান বছৰ ধৰি মোৰ আবেগ, মোৰ জীৱিকা আৰু মোৰ পৰিচয়। সেয়েহে, গৌৰৱ আৰু শোকৰ ঢৌৰে ভৰা হৃদয়েৰে, মই পিএছএৰ পৰা অৱসৰ ঘোষণা কৰিছো।
তেওঁ আৰু লিখিছে,এই যোৱা দুটা দশকে মোক এজন ব্যক্তি হিচাপে গঢ় দিছে আৰু মই লাভ কৰা সুযোগবোৰৰ বাবে মই চিৰকৃতজ্ঞ। মই আশা কৰোঁ যে মই নিজকে সন্মানৰ সৈতে পৰিচালনা কৰিছো আৰু খেলখন 'সঠিক উপায়েৰে' খেলিছো। মই মোৰ ককা-আইতা, মোৰ দেউতা, মোৰ পত্নী আৰু মোৰ পৰিয়ালৰ বাকী সদস্যসকলৰ অবিহনে ইমান দূৰ লৈ যাব নোৱাৰিলোহেঁতেন। মোক মই যিজন ব্যক্তি সেই জন কৰাৰ বাবে ধন্যবাদ। ম্যালকম উইলষ্ট্ৰোপৰ বিশেষজ্ঞ নিৰ্দেশনা অবিহনে, মই আধা পেছাদাৰী খেলুৱৈ নহ'লোহেতেন।
২০০৩ চনত পিএছএত অভিষেক ঘটা সৌৰভে ১০টা পিএছএ খিতাপ জয় কৰি সেই পৰ্যায়ত ১৮টা ফাইনেলত প্ৰৱেশ কৰিছে। পি এছ এ ট্যুৰত ৫১১খন খেলৰ ভিতৰত ২৮১খন খেলত জয়লাভ কৰিছে।
পি এছ এ ৱৰ্ল্ড ট্যুৰ হৈছে স্কোয়াছ খেলুৱৈৰ বাবে এক পেছাদাৰী চাৰ্কিট, টেনিছত এ টি পি আৰু ডব্লিউ টি এ আৰু বেডমিণ্টনত বি ডব্লিউ এফৰ দৰেই।
ঘোষালে পি এছ এ খিতাপ দখল কৰিছিল ২০২১ চনৰ নৱেম্বৰ মাহত মালয়েছিয়ান অ’পেন স্কোয়াছ চেম্পিয়নশ্বিপত, য’ত তেওঁ কলম্বিয়াৰ মিগেল ৰড্ৰিগেজক পৰাস্ত কৰিছিল। ২০২৪ চনৰ উইণ্ডি চিটি অ’পেনত তেওঁৰ অন্তিমখন পি এছ এ ট্যুৰত অংশগ্ৰহণ কৰিছিল য’ত তেওঁ ৬৪ ৰাউণ্ডত আমেৰিকাৰ টিমোথি ব্ৰাউনেলৰ হাতত পৰাস্ত হৈছিল।
ঘোষালে ২০০৬, ২০১০, ২০১৪, ২০১৮ আৰু ২০২২ সংস্কৰণত এছিয়ান গেমছৰ ৯টা পদক লাভ কৰে, য’ত হাংঝু ২০২২ আৰু ইঞ্চিয়ন ২০১৪ ইভেণ্টত দলীয় সোণৰ পদক লাভ কৰে।
ইয়াৰ উপৰিও ২০২২ চনত বাৰ্মিংহামত দীপিকা পল্লিকালৰ সৈতে মিক্সড ডাবলছত ৰূপৰ পদক লাভ কৰাকে ধৰি তিনিটা চি ডব্লিউ জি পদক লাভ কৰিছে। লগতে একেখন ইভেণ্টতে একক প্ৰতিযোগিতাত চি ডব্লিউ জি স্কোয়াছ পদক লাভ কৰা প্ৰথমজন ভাৰতীয় পুৰুষ খেলুৱৈ হিচাপে পৰিগণিত হয়।
২০২২ চনৰ গ্লাছগো ইভেণ্টত মিক্সড ইভেণ্টত সহযোগী স্বদেশী সতীৰ্থ দীপিকা পল্লিকল কাৰ্তিকৰ সৈতে বিশ্ব ডাবলছ চেম্পিয়নশ্বিপত স্বৰ্ণ পদক লাভ কৰিবলৈ সক্ষম হৈছে।
ঘোষালে ঘৰুৱা চাৰ্কিটতো এক চমকপ্ৰদ কেৰিয়াৰ গঢ়ি তুলিছে আৰু ১৩টা ৰাষ্ট্ৰীয় খিতাপ জয় কৰাৰ অভিলেখ গঢ়িবলৈ সক্ষম হৈছে।
হিন্দুস্থান সমাচাৰ/সুনীল/মনোজ
