কাছাৰ, ১৮ এপ্ৰিল (হি.স.)। শিলচৰ ৰামনগৰত আজি এক ভয়ংকৰ অগ্নিকাণ্ড সংঘটিত হয়। গেছ পৰিবাহী চলন্ত টেংকাৰত হঠাতে লাগিল জুই ।
জানিব পৰা অনুসৰি আজি দিনৰ ভাগত শিলচৰ ৰামনগৰ অঞ্চলত এখন চলন্ত গেছ পৰিবাহী টেংকাৰত হঠাৎ জুইৰ সূত্ৰপাত ঘটে । মূহূৰ্ততে জুইৰ লেলিহান শিখাই চানি ধৰে টেংকাৰ খন। এই ঘটনাৰ লগে লগে অঞ্চলটোত এক হুৱাদুৱা পৰিস্থিতিৰ সৃষ্টি হয় ।
ঘটনাৰ খৱৰ লাভ কৰিয়েই তাতক্ষণিকভাৱে ঘটনাস্থলীত অগ্নিনিৰ্বাপক বাহিনীৰ লোক সকল উপস্থিত হৈ জুই নিয়ন্ত্ৰণ নামি পৰে । প্ৰথমে জনবহুল স্থানৰ পৰা টেংকাৰ খন নিৰ্জন স্থানত লৈ যোৱা হয় ৷ তাৰপাছত অগ্নিনিৰ্বাপক বাহিনীৰ চেষ্টাত জুই নিয়ন্ত্ৰণলৈ আহে । ফলত এক ডাঙৰ অঘটন সংঘটিত হোৱাৰ পৰা কথমপি ৰক্ষা পৰে সমগ্ৰ অঞ্চলটো। ইপিনে যান্ত্ৰিক বিজুতিৰ বাবেই গেছ পৰিবাহী টেংকাৰ খনত জুইৰ সূত্ৰপাত ঘটে বুলি সন্দেহ কৰা হৈছে ।
হিন্দুস্থান সমাচাৰ / কিশোৰ /আলোক.
