কাঠমাণ্ডু, ২০ নৱেম্বৰ (হি.স.)। ভাৰতীয় সেনা প্ৰধান উপেন্দ্ৰ দ্বিবেদীয়ে বুধবাৰৰ পৰা পাঁচদিনিয়াকৈ নেপাল ভ্ৰমণ কৰিব । নেপালী সেনাবাহিনীৰ সন্মানীয় মহাৰথী পদবীও এই ভ্ৰমণকালত গ্ৰহণ কৰিব। নেপালী সেনাৰ তথ্য অনুসৰি ২১ নৱেম্বৰত ৰাষ্ট্ৰপতি ৰামচন্দ্ৰ পৌডেলে তেওঁক সন্মানীয় মহাৰথীৰ মৰ্যাদা প্ৰদান কৰাৰ কাৰ্যসূচী আছে।

নেপাল আৰু ভাৰতৰ ইজনে সিজনৰ সেনাধ্যক্ষক সন্মানীয় মহাৰথী বঁটাৰে সন্মান জনোৱাৰ পৰম্পৰা আছে। এই পৰম্পৰা অনুসৰণ কৰি ভাৰতীয় সেনা প্ৰধানজনৰ এই নেপাল ভ্ৰমণ। ২৪ নৱেম্বৰলৈ নেপালত থাকিব। পাঁচদিনীয়া নেপাল ভ্ৰমণৰ সময়ছোৱাত তেওঁ ৰাষ্ট্ৰপতি ৰামচন্দ্ৰ পৌডেল, প্ৰধানমন্ত্ৰী কে পি শৰ্মা অলি, প্ৰতিৰক্ষা মন্ত্ৰী মনবীৰ ৰায় আৰু নেপালৰ সেনা প্ৰধান অশোক ৰাজ ছিগডেলৰ সৈতে আনুষ্ঠানিক বৈঠকত মিলিত হ’ব।

আজি বিয়লি সেনাৰ বিশেষ বিমানেৰে নেপালত উপস্থিত হোৱাৰ লগে লগে কাঠমাণ্ডুৰ ত্ৰিভুৱন আন্তঃৰাষ্ট্ৰীয় বিমানবন্দৰৰ এক অতি বিশেষ কোঠাত নেপাল সেনাৰ উপ প্ৰধানে তেওঁক আদৰণি জনাব। পোনপটীয়াকৈ বিমানবন্দৰৰ পৰা তেওঁ সৈনিক মঞ্চ টুণ্ডিখেললৈ গৈ বীৰত্ব স্মৃতিসৌধত শ্ৰদ্ধাঞ্জলি জ্ঞাপন কৰিব। আনুষ্ঠানিক আৰু সৌজন্যমূলক বৈঠকৰ উপৰিও তেওঁ নেপাল সেনাৰ সেনাধ্যক্ষৰ সৈতে দ্বিপাক্ষিক সহযোগিতা সম্পৰ্কীয় বৈঠকতো অংশগ্ৰহণ কৰিব।

ইয়াৰ উপৰিও তেওঁ কমাণ্ড এণ্ড ষ্টাফ কলেজৰ ছাত্ৰ-ছাত্ৰীৰ সৈতে মত বিনিময় কৰাৰ লগতে পশ্চিম কমাণ্ড মুখ্য কাৰ্যালয় পৰিদৰ্শন কৰাৰ কথাও আছে। নেপাল আৰু ভাৰতত ১৯৫০ চনৰ পৰাই ইজনে সিজনৰ সেনাধ্যক্ষক নিজৰ দেশৰ সেনাধ্যক্ষৰ সন্মানীয় উপাধি দিয়াৰ পৰম্পৰা আছে।

হিন্দুস্থান সমাচাৰ / অৰৱিন্দ