কিনছাছা, ১ অক্টোবৰ (হি.স.)। ডেম’ক্ৰেটিক ৰিপাব্লিক অৱ কংগোত জন্মগ্ৰহণ কৰা এনবিএৰ গ্ল’বেল এম্বেছাদৰ তথা নাইছমিথ বাস্কেটবল হল অৱ ফেমাৰ ডিকেম্বে মুটম্বোৰ সোমবাৰে ৫৮ বছৰ বয়সত মগজুৰ কৰ্কট ৰোগত আক্ৰান্ত হৈ মৃত্যু হয়। সোমবাৰে এনবিএয়ে উপৰোক্ত ঘোষণা কৰে।
এনবিএৰ আয়ুক্ত এডাম ছিলভাৰে এক বিবৃতিত কয় যে, ডিকেম্বে মুটম্বো জীৱনতকৈও ডাঙৰ আছিল। ক'ৰ্টত তেওঁ এনবিএৰ অন্যতম শ্ৰেষ্ঠ ৰক্ষণকৰ্তা আৰু ৰক্ষণাত্মক খেলুৱৈ আছিল। ক'ৰ্টৰ বাহিৰত তেওঁ আনক সহায় কৰিবলৈ নিজৰ সৰ্বোচ্চ উজাৰি দিছিল।
মুটম্বোক বাস্কেটবলৰ অন্যতম সন্মানীয় ডিফেন্সিভ খেলুৱৈ আৰু ৰিবাউণ্ডাৰ হিচাপে গণ্য কৰা হয়। তেওঁ চাৰিবাৰকৈ এনবিএৰ বছৰৰ ডিফেন্সিভ প্লেয়াৰ অৱ দ্য ইয়েৰৰ সন্মান লাভ কৰে, যিটো অভিলেখ তেওঁ বেন ৱালেছৰ সৈতে ভাগ কৰে।
২০০৯ চনত ৩,২৯৮টা ব্লক আৰু ১২,৩৫৯টা ৰিবাউণ্ড সংগ্ৰহ কৰি ৮টা অল ষ্টাৰ খেলত অংশগ্ৰহণ কৰাৰ পিছত মুটম্বোৱে অৱসৰ গ্ৰহণ কৰে। সেই বছৰৰ শেষৰ ফালে তেতিয়াৰ কমিছনাৰ ডেভিদ ষ্টাৰনে তেওঁক এনবিএৰ গ্ল’বেল এম্বেছাদৰ হিচাপে নিযুক্তি দিয়ে। ২০১৫ চনত মুটম্বোক নাইছমিথ মেম’ৰিয়েল বাস্কেটবল হল অৱ ফেমত অন্তৰ্ভুক্ত কৰা হয়।
হিউষ্টন ৰকেটছৰ প্ৰাক্তন তাৰকাগৰাকীয়ে বিশ্বজুৰি কৰা মানৱীয় কামৰ বাবে ক্ৰীড়াৰ বাহিৰেও অতিশয় সন্মান লাভ কৰিছিল।
হাজাৰ হাজাৰ লোকৰ স্বাস্থ্যসেৱাৰ সুবিধা উন্নত কৰাৰ বাবে ডি আৰ চিত এখন চিকিৎসালয় নিৰ্মাণকে ধৰি দাতব্য কামত লাখ লাখ ডলাৰ বিনিয়োগ কৰিছে মুটম্বোৱে।
হিন্দুস্থান সমাচাৰ / অৰৱিন্দ
