ৰিঅ' ডি জেনেৰিঅ', ০১ অক্টোবৰ (হি.স.)। ব্ৰাজিলৰ প্ৰাক্তন মুখ্য প্ৰশিক্ষক টিটেক সোমবাৰে ব্ৰাজিলৰ ছিৰি এ ক্লাব ফ্লেমেংগোৱে বৰ্খাস্ত কৰে।
ক্লাবটোৱে এক বিবৃতিত প্রকাশ কৰা মতে ৬৩ বছৰীয়া টিটেৰ ঠাইত বছৰৰ শেষৰ ফালে এটলেটিকো মাদ্রিদ, চেলছী আৰু ফ্লেমেংগোৰ প্রাক্তন ডিফেণ্ডাৰ ফিলিপে লুইছক নিযুক্তি দিয়া হ’ব ।
ব্ৰাজিলৰ ছিৰি এ চেম্পিয়নশ্বিপত ঘৰুৱা ক্ষেত্ৰত এথলেটিকো পাৰানায়েন্সেৰ বিৰুদ্ধে ফ্লেমেংগোৱে ১-০ গ’লত জয়লাভ কৰাৰ এদিন নৌহওঁতেই এই ঘোষণা কৰা হৈছে। যোৱা বৃহস্পতিবাৰে ফ্লেমেংগোক কোপা লিবাৰটাড’ৰেছৰ পৰা – দক্ষিণ আমেৰিকাৰ শীৰ্ষ ক্লাব প্ৰতিযোগিতা – কোৱাৰ্টাৰ ফাইনেল পৰ্যায়ত উৰুগুৱেৰ পেনাৰোলে বাহিৰ কৰি দিছিল।
ব্ৰাজিলৰ ২০টা দলৰ ছিৰি এ ৰেংকিঙত বৰ্তমান ফ্লেমেংগো চতুৰ্থ স্থানত আছে, আৰু ছিজনত ১০খন খেল বাকী থকা অৱস্থাত শীৰ্ষত থকা বোটাফোগোৰ পৰা ৯ পইণ্ট পিছ পৰি আছে।
২০১৬ চনৰ পৰা ২০২২ চনলৈকে ব্ৰাজিলৰ মেনেজাৰ হিচাপে থকা টিটেয়ে যোৱা বছৰৰ অক্টোবৰ মাহত নিযুক্তি পোৱাৰ পিছত ফ্লেমেংগোক ৪১খন জয়, ১৩খন ড্ৰ’ আৰু ১৬খন পৰাজয়ৰ দিশত আগুৱাই লৈ গৈছে।
হিন্দুস্থান সমাচাৰ / অৰৱিন্দ
