দাৰ এছ চালাম, ০৭ ছেপ্টেম্বৰ (হি.স.)। ৰোমাঞ্চকৰ মেচত জিম্বাবুৱেক চাৰি ৰাণত পৰাস্ত কৰি নাইজেৰিয়াই ১৯ বছৰ অনুৰ্ধ মহিলা টি-২০ বিশ্বকাপ আফ্ৰিকা কোৱালিফায়াৰত জয়লাভ কৰি অহা বছৰৰ মূল প্ৰতিযোগিতাত অংশগ্ৰহণৰ বাবে যোগ্যতা অৰ্জন কৰে।

প্ৰথমে বেটিং কৰা নাইজেৰিয়াই ৬ উইকেটত ৯৮ ৰান সংগ্ৰহ কৰে। ইয়াৰ প্ৰতিক্ৰিয়া স্বৰূপে জিম্বাবুৱে ১৯.৫ অভাৰত ৯৪ ৰান কৰি আউট হয়। এই জয়ৰ জৰিয়তে নাইজেৰিয়াই কোৱালিফায়াৰ অভিযানত অপৰাজিত অভিলেখ বজাই ৰাখি অহা বছৰ বাংলাদেশ আৰু নেপালত অনুষ্ঠিত হ’বলগীয়া ১৯ বছৰ অনুৰ্ধ মহিলা টি-২০ বিশ্বকাপৰ বাবে যোগ্যতা অৰ্জন কৰা দ্বিতীয়টো আফ্ৰিকান দল হিচাপে পৰিগণিত হয়। ইতিমধ্যে দক্ষিণ আফ্ৰিকাই স্থান নিশ্চিত কৰিছে।

নাইজেৰিয়াৰ অধিনায়ক ১৭ বছৰীয়া ক্ৰীষ্টাবেল চুকুৱেনিয়ে কয়, মই মেচৰ পিছত কান্দিলোঁ কাৰণ মই সঁচাকৈয়ে মোৰ আৱেগ প্ৰকাশ কৰিব নোৱাৰিলোঁ। পৰৱৰ্তী পৰ্যায়টো মাত্ৰ আৰম্ভ হৈছে, আৰু আমি জানো যে প্ৰত্যাহ্বান আৰু কঠিন হ'ব। মোৰ দলটোৱে সঁচাকৈয়ে ভাল প্ৰদৰ্শন আগবঢ়াইছে।

লগতে কয়, প্লেয়াৰসকলে প্ৰশিক্ষকৰ কথা শুনিছিল, একত্ৰিত হৈ আছিল, আৰু ফাইনেল অভাৰত হেঁচা থকাৰ পিছতো নিজৰ স্থিৰতা বজাই ৰাখিছিল। প্ৰশিক্ষক কৰ্মচাৰী আৰু মোৰ খেলুৱৈসকলৰ সমৰ্থন নাথাকিলে মই ইয়াত এই ট্ৰফী ধৰি নাথাকিলোহেঁতেন। মই তেওঁলোকৰ সকলোৰে প্ৰতি অতিশয় কৃতজ্ঞ।

ছয় নম্বৰত বেটিং কৰা চুকুৱেনিয়ে ২১ ৰান সংগ্ৰহ কৰি দলটোৰ মুঠ ৯৮ ৰানত গুৰুত্বপূৰ্ণ ভূমিকা পালন কৰে। নাইজেৰিয়াৰ ইনিংছত তিনিটা ৰান আউটও আছিল। ইয়াৰ পিছত উছাইন পিছে এককভাৱে জিম্বাবুৱেৰ শীৰ্ষ অৰ্ডাৰক হুলস্থুল কৰি দলটোৰ খেদাত আগতীয়াকৈ আঘাত হানে। পিছত নাইজেৰিয়াৰ আন বলাৰসকলেও অৰিহণা যোগাই জিম্বাবুৱেক ৯৪ ৰানত বাণ্ডিল কৰি পেলায়।

এইবাৰ দ্বিতীয়বাৰৰ বাবে নাইজেৰিয়াই ১৯ বছৰ অনুৰ্ধ মহিলা টি-২০ বিশ্বকাপৰ বাবে যোগ্যতা অৰ্জন কৰিছে। ইয়াৰ পূৰ্বে এই দলটোৱে ২০২৫ চনৰ বিশ্বকাপত খেলিছিল। সেই সংস্কৰণত নাইজেৰিয়াই সম্পূৰ্ণ হোৱা তিনিখন মেচৰ ভিতৰত দুখন খেলত জয়লাভ কৰাৰ বিপৰীতে দুখন বৰষুণৰ বাবে ধুই পেলোৱা হৈছিল। ইয়াৰ আটাইতকৈ স্মৰণীয় প্ৰদৰ্শন নিউজিলেণ্ডৰ বিৰুদ্ধে, য’ত নাইজেৰিয়াই বৰষুণ প্ৰভাৱিত মেচত ৬৫ ৰান ৰক্ষা কৰি জয় নিশ্চিত কৰে।

নাইজেৰিয়াৰ উপৰিও আমেৰিকা অঞ্চলৰ মাজেৰে, পূব এছিয়া-পেচিফিক অঞ্চলৰ মাজেৰে ছামোয়া আৰু এছিয়া অঞ্চলৰ মাজেৰে সংযুক্ত আৰব আমিৰশ্বাহীয়ে অহা বছৰৰ প্ৰতিযোগিতাত অংশগ্ৰহণৰ বাবে যোগ্যতা অৰ্জন কৰে।

-----------------

হিন্দুস্থান সমাচাৰ / অৰৱিন্দ