গুৱাহাটী, ২৪ ছেপ্টেম্বৰ (হি.স.)। অসম কেবিনেটে অনুমোদন জনাইছে অসম মুছলমান বিবাহ পঞ্জীয়ন নিয়মাৱলী, ২০২৬। ইয়াৰ ফলত মুছলমান সম্প্ৰদায়ৰ সদস্য সকলে নতুন নিয়মৰ অধীনত বিবাহ পঞ্জীয়ন কৰিব পাৰিব। কেবিনেট বৈঠকৰ অন্তত এখন সংবাদমেলৰ সময়ত মুখ্যমন্ত্ৰী ড০ হিমন্ত বিশ্ব শৰ্মাই কেবিনেটৰ সিদ্ধান্তৰ কথা ঘোষণা কৰে।
কেবিনেটৰ সিদ্ধান্ত অনুসৰি প্ৰথম অৱস্থাত নিৰ্দিষ্ট পঞ্জীয়ন ব্যৱস্থাৰ জৰিয়তে বিবাহ পঞ্জীয়নৰ ব্যৱস্থা কৰা হ’ব। পিছলৈ পঞ্চায়ত পৰ্যায়লৈ সম্প্ৰসাৰণ কৰি মানুহৰ বিবাহ পঞ্জীয়নত অধিক সুবিধা প্ৰদান কৰাৰ পৰিকল্পনা কৰা হৈছে।
দুৰ্গা পূজাৰ পূৰ্বে অৰুণোদয় আঁচনিৰ হিতাধিকাৰীৰ বাবে বিশেষ পূজা বোনাছৰ কথাও ঘোষণা কৰে কেবিনেটে। অক্টোবৰ মাহত হিতাধিকাৰীসকলে নিয়মীয়া ১,২৫০ ₹ৰ পৰিৱৰ্তে ১৫০০ ₹ৰ আৰ্থিক সাহায্য লাভ কৰিব। উৎসৱৰ বতৰত আৰ্থিকভাৱে দুৰ্বল পৰিয়ালক অতিৰিক্ত সহায় আগবঢ়োৱাৰ বাবে এই অতিৰিক্ত ধনৰ ব্যৱস্থা কৰা হ’ব।
অৰুণোদয় যোজনাৰ অধীনত আৰ্থিকভাৱে দুৰ্বল পৰিয়ালৰ যোগ্য হিতাধিকাৰীক প্ৰতিমাহে আৰ্থিক সাহায্য প্ৰদান কৰা হয়। ইয়াৰ উপৰিও অক্টোবৰ মাহত ৰাজসাহায্য যুক্ত চেনি আৰু দালিৰ মূল্য ১০০ ₹ নিৰ্ধাৰণ কৰাৰ সিদ্ধান্ত লৈছে কেবিনেটে। এই সামগ্ৰীসমূহৰ পূৰ্বৰ প্ৰস্তাৱিত মূল্য আছিল ₹১০৫।
এই কেবিনেট সিদ্ধান্তক উৎসৱৰ বতৰৰ পূৰ্বে ৰাজ্য চৰকাৰৰ কল্যাণ আৰু প্ৰশাসনিক ব্যৱস্থাৰ অংশ হিচাপে দেখা গৈছে।
হিন্দুস্থান সমাচাৰ / অৰৱিন্দ
