কলকাতা, ০৭ আগষ্ট (হি.স.)। বলীউডৰ জ্যেষ্ঠ অভিনেতা তথা বিজেপি নেতা মিথুন চক্ৰৱৰ্তীক হাতৰ অস্ত্ৰোপচাৰৰ বাবে কলকাতাৰ ই এম বাইপাছত থকা এখন ব্যক্তিগত চিকিৎসালয়ত ভৰ্তি কৰোৱা হৈছে। বৃহস্পতিবাৰে গভীৰ নিশা তেওঁক চিকিৎসালয়লৈ অনা হয় আৰু বিশেষজ্ঞ চিকিৎসকৰ তত্বাৱধানত সফলতাৰে অপাৰেচন সম্পন্ন কৰা হয়। চিকিৎসালয়ৰ সূত্ৰ অনুসৰি অস্ত্ৰোপচাৰৰ পিছত তেওঁৰ স্বাস্থ্য সম্পূৰ্ণ সুস্থিৰ আৰু দ্ৰুতগতিত সুস্থ হৈ উঠিছে।

শুকুৰবাৰে পুৱা মুখ্যমন্ত্ৰী শুভেন্দু অধিকাৰীয়ে চিকিৎসালয়খন পৰিদৰ্শন কৰি তেওঁৰ স্বাস্থ্যৰ বিষয়ে সোধা-পোছা কৰে। চিকিৎসালয়ৰ পৰা ওলাই অহাৰ পাছত মুখ্যমন্ত্রীয়ে সাংবাদিকৰ আগত কয় যে মিথুন চক্রৱৰ্তী সম্পূৰ্ণ সুস্থ আৰু তেওঁৰ হাতৰ অস্ত্ৰোপচাৰ সফল হৈছে। তেওঁ অৱগত কৰে যে চিকিৎসকে তেওঁৰ অৱস্থা স্বাভাৱিক বুলি ঘোষণা কৰিছে আৰু চিন্তাৰ কোনো কাৰণ নাই।

মুখ্যমন্ত্ৰীয়ে কয় যে যদি তেওঁৰ স্বাস্থ্যৰ উন্নতি অব্যাহত থাকে তেন্তে শুকুৰবাৰে সন্ধিয়াৰ ভিতৰত মিথুন চক্ৰৱৰ্তীক চিকিৎসালয়ৰ পৰা মুকলি কৰি দিয়া হ’ব। ইয়াৰ পিছত তেওঁ নিউ টাউনত থকা নিজৰ বাসগৃহলৈ উভতি আহি চিকিৎসকৰ পৰামৰ্শ অনুসৰি কিছুদিন জিৰণি ল’ব।

চিকিৎসালয়ৰ সূত্ৰ অনুসৰি অস্ত্ৰোপচাৰৰ পিছত চিকিৎসকৰ এটা দলে তেওঁক অবিৰতভাৱে নিৰীক্ষণ কৰি আছে। প্ৰয়োজনীয় সকলো চিকিৎসা পৰীক্ষা স্বাভাৱিক বুলি ধৰা পৰিছে, আৰু তেওঁৰ আৰোগ্য সন্তোষজনক। চিকিৎসকে কয় যে কিছু সময়ৰ বাবে তেওঁক নিয়মীয়াকৈ ফ’ল’-আপ আৰু প্ৰয়োজনীয় সাৱধানতা অৱলম্বন কৰিব লাগিব।

মিথুন চক্ৰৱৰ্তী চিকিৎসালয়ত ভৰ্তি হোৱাৰ খবৰে তেওঁৰ অনুৰাগী আৰু শুভাকাংক্ষীসকলৰ মাজত উদ্বেগৰ জোৱাৰৰ সৃষ্টি কৰিছিল। অৱশ্যে মুখ্যমন্ত্ৰী আৰু চিকিৎসালয়ৰ সূত্ৰৰ পৰা তেওঁ সুস্থ হৈ উঠিছে বুলি তথ্য লাভ কৰি অনুৰাগীসকলে সকাহৰ উশাহ লয়।

-----------------

হিন্দুস্থান সমাচাৰ / অৰৱিন্দ