চণ্ডীগড়, ০৭ আগষ্ট (হি.স.)। পঞ্জাৱ বিধানসভা নিৰ্বাচনৰ কেইমাহমান পূৰ্বে শুকুৰবাৰে নতুন দিল্লীত প্ৰধানমন্ত্ৰী নৰেন্দ্ৰ মোডীক সাক্ষাৎ কৰে শিৰোমণি আকালি দলৰ সভাপতি সুখবীৰ সিং বাদলে। ইয়াৰ ফলত পুনৰবাৰ পঞ্জাৱৰ ৰাজনীতিত এছ এ ডি আৰু ভাৰতীয় জনতা পাৰ্টিৰ মাজত সম্ভাৱ্য নিৰ্বাচনী মিত্ৰতা সন্দৰ্ভত জল্পনা-কল্পনাৰ সৃষ্টি হৈছে।

প্ৰধানমন্ত্ৰীৰ সৈতে সুখবীৰৰ বৈঠক সংসদ ভৱনত হৈছিল আৰু প্ৰায় ২০ মিনিট সময় ধৰি চলিছিল। এই বৈঠক সন্দৰ্ভত বিজেপি বা আকালি দলে কোনো আনুষ্ঠানিক বিবৃতি প্ৰকাশ নকৰিলেও সুখবীৰ বাদলৰ লগত অহা নেতাসকলে ইয়াক অনানুষ্ঠানিক বৈঠক বুলি অভিহিত কৰি আলোচনাৰ বিষয়সমূহ প্ৰকাশ নকৰিলে।

২০২৭ চনৰ পঞ্জাৱ বিধানসভা নিৰ্বাচনৰ বাবে দুয়োটা দলে প্ৰস্তুতি চলাই থকাৰ সময়তে এই বৈঠক। প্ৰায় ২৩ বছৰ ধৰি মিত্ৰ হৈ থকা এছ এ ডি আৰু বিজেপিয়ে তিনিবাৰকৈ পঞ্জাৱত একেলগে চৰকাৰ গঠন কৰিছে। কিন্তু ২০২০ চনৰ ছেপ্টেম্বৰ মাহত কেন্দ্ৰীয় চৰকাৰৰ তিনিখন কৃষি আইনক লৈ মতানৈক্যৰ ফলত আকালি দলে ৰাষ্ট্ৰীয় গণতান্ত্ৰিক মিত্ৰজোঁটৰ পৰা ত্যাগ কৰাৰ সিদ্ধান্ত লয়।

ইয়াৰ পিছত ২০২২ চনৰ পঞ্জাৱ বিধানসভাৰ নিৰ্বাচনত দুয়োটা দলে পৃথকে পৃথকে প্ৰতিদ্বন্দ্বিতা কৰে, আৰু দুয়োটা দলে নিৰ্বাচনী ক্ষেত্ৰত যথেষ্ট লোকচানৰ সন্মুখীন হয়। সুখবীৰ বাদল আৰু প্ৰধানমন্ত্ৰী মোদীৰ বৈঠকত পুৰণি ৰাজনৈতিক সংহতিলৈ ঘূৰি অহাৰ সম্ভাৱনা উত্থাপন হৈছে। অৱশ্যে দুয়োটা দলে আগন্তুক বিধানসভা নিৰ্বাচনত স্বতন্ত্ৰভাৱে প্ৰতিদ্বন্দ্বিতা কৰিব বুলি ৰাজহুৱাভাৱে প্ৰকাশ কৰিছে।

পঞ্জাৱ বিজেপিৰ সভাপতি কেৱাল সিং ধিলোনে উল্লেখ কৰে যে ৰাজ্যিক বিজেপিয়ে অকলে ১১৭খন বিধানসভাৰ আসনত প্ৰতিদ্বন্দ্বিতা কৰিবলৈ সাজু হৈছে। তেওঁ লগতে উল্লেখ কৰে যে প্ৰধানমন্ত্ৰীগৰাকী দেশৰ সকলো জনসাধাৰণৰ আৰু যিকোনো জ্যেষ্ঠ নেতাই তেওঁৰ সৈতে সাক্ষাৎ কৰিব পাৰে।

এন.কে. শৰ্মাই উল্লেখ কৰে যে শিৰোমণি আকালি দলৰ সভাপতি সুখবীৰ সিং বাদল আৰু প্ৰধানমন্ত্ৰী মোদীৰ মাজত হোৱা বৈঠকত পঞ্জাৱৰ সৈতে জড়িত গুৰুত্বপূৰ্ণ বিষয়সমূহৰ ওপৰত আলোচনা কৰা হৈছিল, য’ত কাগজ ফাদিল হোৱা, আইন-শৃংখলাৰ অৱনতি ঘটা, আৰু সাধাৰণ জনতাক লৈ অন্যান্য বিষয়সমূহ আলোচনা কৰা হৈছিল। আম আদমি পাৰ্টি আৰু অৰবিন্দ কেজৰিৱালে শিৰোমণি আকালি দল আৰু বিজেপিৰ মাজত সম্ভাব্য মিত্ৰতা সন্দৰ্ভত প্ৰচাৰ কৰি থকা উৰাবাতৰি পঞ্জাৱৰ সন্মুখত থকা প্ৰকৃত সমস্যাৰ পৰা মানুহৰ দৃষ্টি আকৰ্ষণ কৰাৰ প্ৰয়াস মাথোঁ বুলিও তেওঁ কয়। এন.কে. শৰ্মাই কয় যে পঞ্জাৱত ভুৱা অপপ্ৰচাৰ নহয়, সৎ উদ্দেশ্য, জবাবদিহিতা, আৰু শক্তিশালী নেতৃত্বৰ প্ৰয়োজন।

পঞ্জাৱৰ কংগ্ৰেছ, বিজেপি, আৰু আকালি দলৰ ভিতৰত চলি থকা আভ্যন্তৰীণ প্ৰত্যাহ্বানৰ মাজতে এই বৈঠকক ৰাজনৈতিকভাৱে তাৎপৰ্যপূৰ্ণ বুলি বিবেচিত হৈছে। কোনো পক্ষই মিত্ৰতাৰ সম্ভাৱনা নিশ্চিত কৰা নাই যদিও এই বৈঠকে নিশ্চিতভাৱে ২০২৭ চনৰ নিৰ্বাচনৰ পূৰ্বে নতুন ৰাজনৈতিক সমীকৰণৰ বিষয়ে জল্পনা-কল্পনাৰ ইন্ধন যোগাইছে।

হিন্দুস্থান সমাচাৰ / মনোজ কুমাৰ শইকীয়া