গুৱাহাটী, ০৭ আগষ্ট (হি.স.)। অধিনায়ক ডেনিছ দাসৰ অনবদ্য অপৰাজিত অৰ্ধশতক তথা তিনি স্পীনাৰৰ যাদুকৰী বলিঙৰ সহায়ত বৰপেটা ব্ৰেভছে চলিত ইম্পেৰিয়েল ব্লু পেকেজড ড্ৰিংকিং ৱাটাৰ অসম প্ৰিমিয়াৰ লীগত ক্ৰমাগত দ্বিতীয় মেচত জয়লাভ কৰিছে ৷ গুৱাহাটীৰ বৰ্ষাপাৰাস্থিত এ চি এ ষ্টেডিয়ামত আজি অনুষ্ঠিত দিনটোৰ প্ৰথমখন মেচত দলে ৭০ ৰাণৰ বৃহৎ ব্যৱধানত পৰাস্ত কৰে নগাঁও ৰেঞ্জাৰ্ছক৷ ব্ৰেভছে দিয়া ১৭১ ৰাণৰ বিজয়লক্ষ্য অনুসৰণ কৰি ৰেঞ্জাৰ্ছে ইনিংছৰ প্ৰথম অভাৰৰ পৰাই ধাৰাবাহিকৰূপত উইকেট হেৰুৱাই ১৮.২ অভাৰত ১০০ ৰাণতে ইনিংছ সামৰে ৷

ব্ৰেভছক এই বৃহৎ বিজয় দিয়াত মুখ্য ভূমিকা লয় দলৰ তিনিগৰাকী স্পীনাৰে৷ বিকিৰণ দাসে ৩.২ অভাৰত ১৩ ৰাণ দি চাৰিটা উইকেট লাভ কৰাৰ বিপৰীতে শুভম গুপ্তাই আঠ ৰাণত তিনিটা তথা ৰাজেশ প্ৰসাদে দুটা উইকেট পায়৷ ৰেঞ্জাৰ্ছৰ হৈ সৰ্বাধিক ৪৪ ৰাণ কৰে সুমিত কাশ্যপে৷ উল্লেখ্য যে চাৰিখন মেচ খেলাৰ পাছতো জয়ৰ পৰা বঞ্চিত হৈ থাকিল নগাঁও ৷ বিপৰীতে প্ৰথম দুখন মেচত পৰাস্ত হোৱা ব্ৰেভছে ক্ৰমাগত দুখন মেচত জয় অৰ্জন কৰিলে ৷

ইয়াৰ পূৰ্বে টছত জয়ী হৈ নগাঁও দলে পোনতে বলিং কৰাৰ সিদ্ধান্ত লয় যদিও বৰপেটা ব্ৰেভছক দুই অপেনাৰ কবিৰ হাছান [২৫] আৰু সৌৰভ দিহিঙিয়াই[১৬] সুন্দৰ আৰম্ভনি দিয়াত ৰেঞ্জাৰ্ছৰ অধিনায়ক অনুৰাগ তালুকদাৰৰ ৰণনীতি সফল নহ’ল ৷ অৱশ্যে পাৱাৰ প্লেত দুই অপেনাৰৰ লগতে দলীয় স্ক’ৰ ৫৮ ত ব্ৰেভছে তিনিটা উইকেট হেৰুৱাই চাপৰ সন্মুখিন হয় ৷

কিন্তু অধিনায়ক ডেনিছ দাসে অনবদ্য বেটিং কৰি বৰপেটাৰ ইনিংছক দৃঢ় স্থিতি দিয়ে ৷ ৪৫ বলত অপৰাজিত ৭২ ৰাণ কৰা ডেনিছে চাৰিটাকৈ ছিক্সাৰ আৰু বাউণ্ডেৰী মাৰে ৷ তদুপৰি উইকেটৰক্ষক বেটাৰ গৌৰৱ ঠাকুৰীয়াৰ [৩১] ৰ লগত চতুৰ্থ উইকেটৰ যুটিত ৯৫ ৰাণ সংগ্ৰহৰে দলক শক্তিশালী স্থিতিত উপনিত কৰায়৷ উল্লেখ্য যে এয়া এ পি এলত ডেনিছৰ ক্ৰমাগত দ্বিতীয়টো অৰ্ধশতক ৷

অসম ক্ৰিকেট সন্থাৰ তত্বাৱধানত ‘আমাৰ অসম, আমাৰ গৌৰব’ মূলমন্ত্ৰৰে আয়োজন কৰা উদ্বোধনী বৰ্ষৰ এ পি এলৰ কাইলৈ দিনৰ দুই হ’বলগা প্ৰথমখন খেলত গুৱাহাটী ৰয়েলছ তেজপুৰ টাইটানছৰ মুখামুখি হ’ব৷ ইফালে, নিশা সাত বজাত হ’বলগা দ্বিতীয়খন খেলত ডিব্ৰুগড় ৱাৰিয়ৰ্ছে যোৰহাট ষ্টেলিনছৰ বিৰুদ্ধে খেলিব ৷

সংক্ষিপ্ত স্ক’ৰ ঃ

বৰপেটা ব্ৰেভছে নগাঁও ৰেঞ্জাৰ্ছক ৭০ ৰানত পৰাস্ত কৰে

বৰপেটা ব্ৰেভছ ঃ ২০ অভাৰত ১৭০-৪ [ডেনিশ দাস ৭২, গৌৰৱ ঠাকুৰীয়া ৩১; দৰ্শন ৰাজবংশী ৪৩-২ , ভাৰ্গৱ দত্ত ২১-১

নগাঁও ৰেঞ্জাৰ্ছ ঃ ১৮.২ অভাৰত ১০০ ৰান [সুমিত কাশ্যপ ৪৪, এছ কে জ্ঞানাম ১৮; বিকিৰণ দাস ১৩-৪, শুভম কুমাৰ গুপ্তা ৮-৩, ৰাজেশ প্ৰসাদ ২২-২ ৷

হিন্দুস্থান সমাচাৰ / আলোক চক্ৰৱৰ্তী