নতুন দিল্লী, ০৬ আগষ্ট (হি.স.)। পৰ্যটন আৰু সংস্কৃতি মন্ত্ৰালয় আৰু নেটফ্লিক্সে দেশৰ চহকী সাংস্কৃতিক ঐতিহ্য, বৈচিত্ৰময় প্ৰাকৃতিক দৃশ্য, আৰু পৰ্যটন স্থলীসমূহক বিশ্বৰ মঞ্চত প্ৰদৰ্শনৰ বাবে এক কৌশলগত অংশীদাৰিত্বত অৱতীৰ্ণ হৈছে।

ভাৰতত নেটফ্লিক্সৰ এটা দশক সম্পূৰ্ণ হোৱাৰ উপলক্ষে বুধবাৰে নতুন দিল্লীৰ নেশ্যনেল গেলেৰী অৱ মডাৰ্ণ আৰ্ট (এন জি এম এ)ত এক বিশেষ অনুষ্ঠানৰ আয়োজন কৰা হয়। অনুষ্ঠানৰ সময়ত কেন্দ্ৰীয় সংস্কৃতি আৰু পৰ্যটন মন্ত্ৰী গজেন্দ্ৰ সিং শ্বেখাৱট আৰু নেটফ্লিক্সৰ সহ-মুখ্য কাৰ্যবাহী বিষয়া টেড চাৰাণ্ডোছে বাৰ্তালাপ কৰে। আলোচনাত কেনেদৰে গল্পই মানুহক ভ্ৰমণৰ বাবে অনুপ্ৰাণিত কৰিব পাৰে আৰু ভাৰতৰ বিশ্বব্যাপী কোমল শক্তিক শক্তিশালী কৰিব পাৰে তাৰ ওপৰত গুৰুত্ব আৰোপ কৰা হয়।

চিনেমাৰ ভূমিকাক গুৰুত্ব দি শ্বেখাৱাটে কয়, চিনেমা মনোৰঞ্জনতকৈও অধিক; ই সংস্কৃতি, ঐতিহ্য, আৰু পৰ্যটনক সংযোগ কৰা এখন দলং। প্ৰতিটো ভাৰতীয় কাহিনীয়ে বিশ্বৰ কোনোবা এটা কোণত কোনোবা এজনক ভাৰত ভ্ৰমণ কৰিবলৈ অনুপ্ৰাণিত কৰাৰ সম্ভাৱনা আছে।

তেওঁ কয় যে ইনক্ৰিডিবল ইণ্ডিয়া ডিজিটেল প্লেটফৰ্মত এজ ছিন অন নেটফ্লিক্সৰ সংহতি ভাৰতৰ সাংস্কৃতিক বৈচিত্ৰ্য প্ৰদৰ্শন আৰু দেশৰ কোমল শক্তি বৃদ্ধিৰ দিশত এক যৌথ পদক্ষেপ।

এই ল্যাণ্ডমাৰ্ক অংশীদাৰিত্বৰ অংশ হিচাপে পৰ্যটন মন্ত্ৰালয়ে নিজৰ ডিজিটেল প্লেটফৰ্মত নেটফ্লিক্সত দেখাৰ দৰে বৈশিষ্ট্য একত্ৰিত কৰিছে। ইয়াৰ দ্বাৰা বিশ্বজুৰি ভ্ৰমণকাৰীসকলে ভাৰতৰ সুন্দৰ স্থান, উৎসৱ, বন্যপ্ৰাণী, আৰু নেটফ্লিক্সৰ জনপ্ৰিয় ছবি আৰু ধাৰাবাহিকসমূহত প্ৰদৰ্শিত ঐতিহাসিক স্থানসমূহ অন্বেষণ কৰিব পাৰিব। প্ৰধান উদ্দেশ্য হৈছে দৰ্শকৰ পৰ্দাৰ অভিজ্ঞতাক বাস্তৱ জীৱনৰ যাত্ৰালৈ ৰূপান্তৰ কৰা।

অনুষ্ঠানত উপস্থিত থকা পৰ্যটন সচিব ভুৱনেশ কুমাৰে কয় যে সৃষ্টিশীল উদ্যোগ আৰু চৰকাৰৰ মাজত এনে কৌশলগত অংশীদাৰিত্বই গন্তব্যস্থান আৱিষ্কাৰ আৰু অভিজ্ঞতা লাভৰ ধৰণক ৰূপান্তৰিত কৰিছে। প্ৰামাণিক কাহিনীয়ে কেৱল বহনক্ষম পৰ্যটনক প্ৰসাৰ কৰাই নহয় স্থানীয় জনগোষ্ঠীসমূহৰ বাবে অৰ্থনৈতিক সুযোগো সৃষ্টি কৰে।

এই উপলক্ষে পৰ্যটন মন্ত্ৰালয় আৰু নেটফ্লিক্সৰ যৌথভাৱে নিৰ্মাণ কৰা দুখন বিশেষ ছবিও প্ৰদৰ্শন কৰা হয়। প্ৰথমখন ছবিয়ে ভাৰতৰ অসাধাৰণ জৈৱ বৈচিত্ৰ্য আৰু বন্যপ্ৰাণী পৰ্যটন অভিজ্ঞতাক কেন্দ্ৰ কৰি লোৱাৰ বিপৰীতে দ্বিতীয়খন ছবি দেশৰ চহকী আৰু সজীৱ সাংস্কৃতিক ঐতিহ্যৰ প্ৰতি উৎসৰ্গিত আছিল।

--------------

হিন্দুস্থান সমাচাৰ / অৰৱিন্দ