নতুন দিল্লী, ০৬ আগষ্ট (হি.স.)। ৰাষ্ট্ৰীয় তদন্ত সংস্থা (এনআইএ)ই ২০২২ চনত সংঘটিত কৰ্ণাটক ভাৰতীয় জনতা পাৰ্টি (বিজেপি)ৰ নেতা প্ৰবীণ নেত্ৰাৰুৰ হত্যাকাণ্ডৰ আন এজন পলাতক অভিযুক্তক গ্ৰেপ্তাৰ কৰিছে । ইয়াৰ লগে লগে এই হাই-প্ৰফাইল হত্যাকাণ্ডৰ গোচৰত এতিয়ালৈকে গ্ৰেপ্তাৰ হোৱা অভিযুক্তৰ সংখ্যা ২৫ জনলৈ বৃদ্ধি পাইছে।

বৃহস্পতিবাৰে এন আই এয়ে জনোৱা মতে, বিশ্বাসযোগ্য চোৰাংচোৱাৰ ভিত্তিত কেৰালাৰ কোচিত পলায়ন কৰা অভিযুক্ত উমৰ ফাৰুক এম আৰক গ্ৰেপ্তাৰ কৰা হৈছে। তেওঁৰ বিৰুদ্ধে ৰেড কৰ্ণাৰ জাননী জাৰি কৰাৰ লগতে নন-বেইলেবল ৱাৰেণ্টো আদালতে জাৰি কৰে। তদুপৰি তেওঁক গ্ৰেপ্তাৰ কৰিব পৰা তথ্যৰ বাবে ৪ লাখ টকাৰ পুৰস্কাৰো ঘোষণা কৰিছিল এন আই এয়ে।

তদন্তকাৰী সংস্থাটোৰ মতে, ইতিমধ্যে উমৰ ফাৰুকৰ বিৰুদ্ধে ভাৰতীয় দণ্ডবিধিৰ বিভিন্ন ধাৰা আৰু বেআইনী কাৰ্যকলাপ (প্ৰতিৰোধ) আইন (ইউএপিএ)ৰ অধীনত অভিযোগনামা দাখিল কৰা হৈছে। তদন্তত প্ৰকাশ পাইছে যে তেওঁ অন্যান্য অভিযুক্তৰ সৈতে চুলীয়া চহৰৰ নিষিদ্ধ ভাৰতীয় পপুলাৰ ফ্ৰণ্টৰ কাৰ্যালয়ত অনুষ্ঠিত এক ষড়যন্ত্ৰমূলক বৈঠকত অংশ লৈছিল।

এন আই এৰ মতে, তদন্তত এই কথাও পোহৰলৈ আহিছে যে উমৰ ফাৰুক হত্যাকাণ্ডৰ পূৰ্বে বেলাৰে গাঁৱত সম্ভাৱ্য লক্ষ্য চিনাক্ত কৰি গোপন অভিযান চলাবলৈ সহ অভিযুক্তক নিজৰ মটৰ চাইকেলটো দিবলৈ সন্মত হৈছিল। আন সহ-অভিযুক্তৰ সৈতে ষড়যন্ত্ৰ কৰি গোচৰটোত এজন সুৰক্ষিত সাক্ষীক হত্যাৰ চেষ্টা চলোৱাৰ অভিযোগো তেওঁৰ বিৰুদ্ধে।

এন আই এয়ে জনোৱা মতে, ইয়াৰ পূৰ্বে জুলাই মাহত এই গোচৰৰ আন দুজন পলাতক অভিযুক্ত আব্দুল নাছিৰ পি ওৰফে নাছিৰ আৰু নৌছাদক ক্ৰমে কেৰালাৰ কোচি আৰু তামিলনাডুৰ হোছুৰৰ পৰা গ্ৰেপ্তাৰ কৰিছিল। অন্ধ্ৰ প্ৰদেশ আৰক্ষীৰ পৰা পোৱা তথ্যৰ ভিত্তিত এক সমন্বিত অভিযানৰ অংশ হিচাপে এই কাৰ্য্য সংঘটিত কৰা হৈছিল।

নিয়াই উল্লেখ কৰিছে যে এই গোচৰত এতিয়াও দুজন অভিযুক্ত পলাতক হৈ আছে । তালাচী আৰু গ্ৰেপ্তাৰৰ প্ৰচেষ্টা অব্যাহত আছে। উল্লেখযোগ্য যে ২০২২ চনৰ ২৬ জুলাইত দক্ষিণ কানাড়া জিলাৰ বিজেপি নেতা প্ৰবীণ নেত্তৰুক হত্যা কৰা হৈছিল । ব্যাপক জনতাৰ ক্ষোভৰ পিছত এই গোচৰটো তদন্তৰ বাবে এন আই এক গতাই দিয়া হৈছিল। তদন্তকাৰী সংস্থাটোৰ মতে, নিষিদ্ধ পিএফআইৰ কৰ্মীসকলে ৰচনা কৰা বহল অপৰাধমূলক ষড়যন্ত্ৰৰ অংশ আছিল এই হত্যাকাণ্ড ।

-----------------

হিন্দুস্থান সমাচাৰ / অৰৱিন্দ