নতুন দিল্লী, ০৬ আগষ্ট (হি.স.)। বিনিয়োগ জালিয়াতি আৰু ধন সৰবৰাহৰ অভিযোগ উত্থাপন কৰি বিহাৰৰ মুংগেৰৰ পাঁচটা স্থানত বৃহস্পতিবাৰে প্ৰৱৰ্তন সঞ্চালকালয়ে (ইডি) অভিযান চলায়। তদন্তকাৰী সংস্থাটোৰ মতে জলীউড মিউজিক ইণ্ডাষ্ট্ৰীজ প্ৰাইভেট লিমিটেডে ডিজিটেল চাকৰিৰ প্ৰতিশ্ৰুতি দি আৰু বিনিয়োগৰ পৰিমাণ দুগুণ কৰি কোটি কোটি টকাৰ প্ৰতাৰণা কৰিছিল।

ইডিয়ে কয় যে ধন সৰবৰাহৰ প্ৰতিৰোধ আইন (পিএমএলএ)ৰ ১৭ নং ধাৰাত এই ব্যৱস্থা গ্ৰহণ কৰা হৈছে। কোম্পানীটোৰ সঞ্চালক জিতেন্দ্ৰ কুমাৰ ৰাজীৱ আৰু তেওঁৰ সহযোগীসকলে বিনিয়োগকাৰীক প্ৰতাৰণা কৰাৰ অভিযোগ উত্থাপন হৈছে। মুংগেৰ জিলাৰ ৫টা স্থানত তালাচী চলোৱা হয়।

তদন্তকাৰী সংস্থাটোৰ মতে, কোম্পানীটোৱে ২,৫৬,৫০০ ₹ বিনিয়োগ কৰি প্ৰতিমাহে ১৫,০০০ টকা উপাৰ্জন কৰাৰ প্ৰতিশ্ৰুতি দিছিল। বিনিয়োগকাৰীয়ে প্ৰতিমাহে কোম্পানীটোৰ ৱেবছাইটত ৪৮০০টা অডিঅ’ আৰু ভিডিঅ’ ৰেকৰ্ডিং চাব লাগিছিল। ইয়াৰ উপৰিও অধিক মানুহ যোগ কৰাৰ বাবে অতিৰিক্ত বোনাছ, বাইক, গাড়ী আদিৰ প্ৰতিশ্ৰুতি দি তেওঁলোকক প্ৰলোভিত কৰা হৈছিল।

এনফৰ্চমেণ্ট ডাইৰেক্টৰেট (ইডি)ৰ মতে, বিনিয়োগ সংগ্ৰহ কৰাৰ পিছত কোম্পানীটোৰ চফটৱেৰ ইঞ্জিনিয়াৰে ইচ্ছাকৃতভাৱে ৱেবছাইটটোৰ গতি লেহেমীয়া কৰি পেলায়, যাৰ ফলত বিনিয়োগকাৰীয়ে ৪৮০০টা অডিঅ’-ভিডিঅ’ ৰেকৰ্ডিং চাব নোৱাৰিলে। ফলস্বৰূপে তেওঁলোকে ধন পৰিশোধৰ প্ৰয়োজনীয়তা পূৰণ কৰিব নোৱাৰিলে আৰু কোনো সুবিধা লাভ কৰা নাছিল।

এই গোচৰত ২০২৪ চনৰ ১৮ নৱেম্বৰত মুংগেৰ থানাত ভাৰতীয় দণ্ডবিধিৰ (বিএনএছ), ২০২৩ৰ ৩১৬(২), ৩১৮(৪), আৰু ৩(৫) ধাৰাত এফআইআৰ ৰুজু কৰা হৈছিল। আৰক্ষীয়েও এই গোচৰৰ অভিযোগনামা দাখিল কৰিছে। এতিয়া ধন সৰবৰাহৰ ঘটনাক লৈ তদন্ত আৰম্ভ কৰিছে প্ৰৱৰ্তন সঞ্চালকালয়ে।

-----------------

হিন্দুস্থান সমাচাৰ / অৰৱিন্দ