নতুন দিল্লী, ০৬ আগষ্ট (হি.স.)। ভাৰতীয় জনতা পাৰ্টি (বিজেপি)ৰ আই টি চেলৰ মুৰব্বী অমিত মালৱ্যই আম আদমি পাৰ্টিৰ আহ্বায়ক অৰবিন্দ কেজৰিৱালে কেন্দ্ৰীয় চৰকাৰে বিমান টাৰ্বাইন ইন্ধনৰ সৈতে ইথানল মিহলাই লোৱাৰ পৰিকল্পনা কৰা বুলি কৰা দাবীক বিভ্ৰান্তিকৰ বুলি উলাই কৰিছে। মালৱ্যই কয় যে চৰকাৰে এ টি এফৰ সৈতে গতানুগতিক ইথানল মিহলোৱাৰ কোনো পৰিকল্পনা ঘোষণা কৰা নাই, বৰঞ্চ ইয়াৰ পৰিৱৰ্তে নিয়ন্ত্ৰণ কাঠামোত বহনক্ষম বিমান ইন্ধন (এছ এ এফ) অন্তৰ্ভুক্ত কৰিছে।

বৃহস্পতিবাৰে মালৱ্যই এক্স-পোষ্টত কয় যে এছ এ এফ গতানুগতিক ইথানল নহয়, বৰঞ্চ উন্নত প্ৰযুক্তি ব্যৱহাৰ কৰি বিকশিত কৰা বিমান গ্ৰেডৰ ইন্ধন, যাৰ ৰাসায়নিক গঠন প্ৰচলিত এ টি এফৰ দৰেই আৰু বিমানৰ ইঞ্জিনৰ সৈতে সম্পূৰ্ণৰূপে সামঞ্জস্যপূৰ্ণ। বিমানত ব্যৱহাৰৰ বাবে অনুমোদন পোৱাৰ পূৰ্বে এছ এ এফে আন্তঃৰাষ্ট্ৰীয়ভাৱে গ্ৰহণযোগ্য এ এছ টি এম মানদণ্ড অনুসৰি কঠোৰ পৰীক্ষা আৰু প্ৰমাণপত্ৰ লাভ কৰে, যিবোৰ আন্তঃৰাষ্ট্ৰীয় অসামৰিক বিমান পৰিবহণ সংস্থা (আই চি এ অ’)ৰ দ্বাৰাও স্বীকৃতিপ্ৰাপ্ত। চৰকাৰৰ মতে, এছ এ এফে বিমান ইন্ধনৰ মৌলিক প্ৰকৃতি, সুৰক্ষা বা কাৰ্য্যক্ষমতাত বিৰূপ প্ৰভাৱ পেলোৱা নাই।

মালৱ্যই উল্লেখ কৰে যে ভাৰতে বিশ্বৰ বিমান পৰিবহণৰ মানদণ্ড অনুসৰি আগবাঢ়িছে। আইচিএঅ’ৰ ক’ৰ্চিয়া কাঠামো আৰু বিশ্বৰ বহুতো প্ৰধান বিমান বজাৰে উচ্চতম সুৰক্ষা মানদণ্ড বজাই ৰাখি নিৰ্গমন হ্ৰাস কৰিবলৈ প্ৰমাণিত বহনক্ষম বিমান ইন্ধনৰ ব্যৱহাৰক প্ৰসাৰিত কৰিছে। প্ৰমাণিত বহনক্ষম বিমান ইন্ধনক জেট ইন্ধনৰ সৈতে সাধাৰণ ইথানল মিহলোৱাৰ সৈতে সমান কৰাটো প্ৰকৃততে ভুল আৰু ই বিমান সুৰক্ষাৰ বিষয়ে অপ্ৰয়োজনীয় চিন্তাৰ সৃষ্টি কৰে।

উল্লেখযোগ্য যে কেজৰিৱালে ইয়াৰ পূৰ্বে এক্সত দাবী কৰিছিল যে কেন্দ্ৰীয় চৰকাৰে এটিএফৰ সৈতে ইথানল মিহলোৱাৰ পৰিকল্পনা কৰিছে। তেওঁ একাংশ বিশেষজ্ঞৰ উদ্ধৃতি দি কয় যে এনে পদক্ষেপে বিমানৰ সুৰক্ষাৰ লগত আপোচ কৰিব পাৰে।

হিন্দুস্থান সমাচাৰ / অৰৱিন্দ