ছানা/ৰিয়াধ, ০৫ আগষ্ট (হি.স.)। য়েমেনৰ হাউথী বিদ্ৰোহী সংগঠনে উত্তৰ লোহিত সাগৰৰ ইয়ানবু উপকূলৰ সমীপৰ চৌদি আৰৱৰ তেল টেংকাৰ ৱাফাক কেইবাটাও বেলিষ্টিক মিছাইলেৰে আক্ৰমণ কৰা বুলি দাবী কৰিছে।
তুৰস্কৰ চৰকাৰী সংবাদ সংস্থা আনাডোলুৰ মতে, গোটটোৰ সামৰিক মুখপাত্ৰ ইয়াহিয়া ছাৰিয়ে ছ’চিয়েল মিডিয়া প্লেটফৰ্ম এক্সত প্ৰকাশ কৰা এক বিবৃতিত কয় যে ক্ষেপণাস্ত্ৰসমূহে টেংকাৰখনক সঠিকভাৱে লক্ষ্য কৰি লৈছে। কিন্তু এই দাবী স্বতন্ত্ৰভাৱে নিশ্চিত কৰিব পৰা নগ’ল।
হাউথীৰ মতে, তেওঁলোকৰ অৱৰোধৰ প্ৰতি সঁহাৰি জনাই অৱৰোধ কৌশলৰ অংশ হিচাপে এই আক্ৰমণ। গোটটোৱে জনোৱা মতে, ২২ জুলাইত আৰম্ভ কৰা অভিযানত এতিয়ালৈকে ৮খন ছৌদি তেল টেংকাৰক লক্ষ্য কৰি লোৱা হৈছে।
ইয়াহিয়া ছাৰিয়ে লগতে দাবী কৰে যে এই সময়ছোৱাত ২৯খন ছৌদি তেল টেংকাৰক লোহিত সাগৰ আৰু আৰব সাগৰৰ মাজেৰে পাৰ হ’বলৈ বাধা দিয়া হৈছিল বা পথ সলনি কৰিবলৈ বাধ্য কৰা হৈছিল। তেওঁলোকৰ মতে, বাব আল-মাণ্ডেব জলদ্বীপত বৃদ্ধি পোৱা ভাবুকিৰ বাবে ছৌদি আৰবে নিজৰ টেংকাৰসমূহ উত্তৰ লোহিত সাগৰলৈ সলনি কৰি দিছে।
হাউথীৰ এগৰাকী মুখপাত্ৰই সকীয়াই দিয়ে যে গোটটোৱে কেৱল অব্যাহত ৰখাই নহয়, উত্তৰ লোহিত সাগৰত চৌদি আৰৱৰ তেল টেংকাৰক লক্ষ্য কৰি লোৱাটোও তীব্ৰতৰ কৰি তুলিব।
বৰ্তমান এই দাবীসমূহৰ সন্দৰ্ভত চৌদি আৰৱৰ পৰা কোনো আনুষ্ঠানিক সঁহাৰি পোৱা নাই। টেংকাৰখনত আক্ৰমণ আৰু ইয়াৰ ফলত হ’ব পৰা সম্ভাৱ্য ক্ষতিৰ স্বতন্ত্ৰ নিশ্চয়তা এতিয়াও লাভ কৰা হোৱা নাই।
হিন্দুস্থান সমাচাৰ / মনোজ কুমাৰ শইকীয়া
