কলকাতা, ০৫ আগষ্ট (হি.স.)। নিৰ্বাসিত বাংলাদেশী লেখিকা তাছলিমা নাছৰীনে বিগত ৩২ বছৰে নিৰ্বাসনত বসবাস কৰি থকা আৰু এতিয়াও নিজৰ দেশ বাংলাদেশলৈ উভতি যাব বিচৰা বুলি ব্যক্ত কৰে। লগতে ক্ষমতাচ্যুত হোৱা প্ৰাক্তন প্ৰধানমন্ত্ৰী শ্বেখ হাছিনাক বাংলাদেশলৈ উভতি আহি গণতান্ত্ৰিক অধিকাৰৰ অধীনত ৰাজনীতিত লিপ্ত হ’বলৈ অনুমতি দিবলৈও দাবী জনায়।

বুধবাৰে পুৱা কলকাতাৰ পৰা যাত্ৰা কৰাৰ পূৰ্বে নেতাজী সুভাষ চন্দ্ৰ বসু আন্তঃৰাষ্ট্ৰীয় বিমানবন্দৰত সাংবাদিকৰ সৈতে হোৱা এক সাক্ষাৎকাৰত তাছলিমাই কয় যে মই ৩২ বছৰ ধৰি নিৰ্বাসনত আছো। মই বাংলাদেশলৈ উভতি যাব বিচাৰো, কিন্তু মোক অনুমতি দিয়া হোৱা নাই।

ইয়াৰ পূৰ্বে মঙলবাৰে পানীহাটীৰ বেগম ৰকেয়াৰ সমাধিস্থলত শ্ৰদ্ধাঞ্জলি জনোৱাৰ পিছত তাছলিমাই কয় যে বাংলাদেশ চৰকাৰে শ্বেখ হাছিনাৰ দলত আৰোপ কৰা নিষেধাজ্ঞা উঠাই লোৱা উচিত। শ্বেখ হাছিনাক নিজৰ দেশলৈ উভতি আহি ৰাজনীতিত অংশগ্ৰহণৰ অধিকাৰ দিয়াটো বিচাৰো।

বাংলাদেশৰ গণতন্ত্ৰ সন্দৰ্ভত মন্তব্য কৰি তাছলিমাই কয় যে গণতান্ত্ৰিক ব্যৱস্থাত সকলো ৰাজনৈতিক দলে কাম কৰাৰ স্বাধীনতা থাকিব লাগে আৰু নিজৰ মতামত প্ৰকাশ কৰিব লাগে। অৱশ্যে এনে ৰাজনীতিয়ে প্ৰায়ে নাৰীৰ অধিকাৰৰ বিৰোধী বুলি বিশ্বাস কৰি ধৰ্মভিত্তিক ৰাজনীতিৰ বিৰোধিতা কৰা বুলিও স্পষ্ট কৰি দিয়ে।

বেগম ৰকেয়াক শ্ৰদ্ধাঞ্জলি জনাই তাছলিমাই তেওঁক এগৰাকী প্ৰগতিশীল আৰু মৌলবাদী বিৰোধী লেখিকা বুলি অভিহিত কৰে। ১৯৩২ চনত তেওঁৰ মৃত্যুৰ পিছত মুছলমান মৌলবাদীসকলে তেওঁক কলকাতাত সমাধিস্থ কৰাৰ বিৰোধিতা কৰিছিল, তাৰ পিছত পানীহাটীৰ এজন প্ৰগতিশীল ব্যক্তিৰ ব্যক্তিগত মাটিত নিশাৰ আন্ধাৰত তেওঁক সমাধিস্থ কৰা হৈছিল ।

তাছলিমাই লগতে কয় যে বাংলাদেশ চৰকাৰে তেওঁৰ পাছপ’ৰ্ট নবীকৰণ নকৰে আৰু তেওঁৰ ছুইডেনৰ পাছপ’ৰ্ট বাংলাদেশৰ ভিছা প্ৰদান কৰা নহয়। ফলস্বৰূপে তেওঁৰ দেশলৈ উভতি যাবলৈ কোনো বৈধ চৰকাৰী নথি-পত্ৰৰ অভাৱ।

প্ৰায় ১৯ বছৰৰ মূৰত ভাৰতলৈ উভতি অহা তাছলিমা নাছৰীনে আপাততঃ ভাৰততে থাকিব বুলি কয়। কলকাতা ভ্ৰমণক স্মৰণীয় বুলি অভিহিত কৰি তেওঁ কয় যে তেওঁ তাত থকা মানুহৰ পৰা ইমানেই মৰম পাইছিল যে তেওঁৰ চকুত চকুলো ওলাই আহিছিল। অক্টোবৰ, জানুৱাৰী আৰু কলকাতা গ্ৰন্থমেলাৰ সময়ত পুনৰ ভ্ৰমণৰ ইচ্ছাও প্ৰকাশ কৰে।

চেকুলাৰ মিছন আৰু আন দুটা সংগঠনৰ আমন্ত্ৰণত ৩১ জুলাইত কলকাতাত উপস্থিত হয় তাছলিমা নাছৰিন। তেওঁৰ গোটেই ভ্ৰমণৰ সময়ছোৱাত কঠোৰ নিৰাপত্তাৰ ব্যৱস্থা কৰা হৈছিল। লগতে আয়োজকসকলৰ আদৰণি আৰু আতিথ্যৰ বাবে কৃতজ্ঞতা জ্ঞাপন কৰে।

হিন্দুস্থান সমাচাৰ / মনোজ কুমাৰ শইকীয়া