নতুন দিল্লী, ০৫ আগষ্ট (হি.স.)। অহা বৰ্ষৰ ২২ ফেব্ৰুৱাৰীৰ পৰা ২৩ মাৰ্চলৈ অনুষ্ঠিত হ’ব আই চি চি পুৰুষৰ এদিনীয়া বিশ্বকাপ কোৱালিফায়াৰ। অৱশ্যে আন্তঃৰাষ্ট্ৰীয় ক্ৰিকেট পৰিষদে এতিয়াও আনুষ্ঠানিকভাৱে কোৱালিফায়াৰৰ আয়োজক দেশৰ কথা ঘোষণা কৰা নাই।

জুলাই মাহত আইচিচিয়ে ঘোষণা কৰা নতুন অৰ্হতা ব্যৱস্থা অনুসৰি ১০টা দলৰ এই কোৱালিফায়াৰত বিজয়ীয়ে পোনপটীয়াকৈ ২০২৭ চনৰ এদিনীয়া বিশ্বকাপৰ ১৪টা দলৰ মূল গ্ৰুপ পৰ্যায়লৈ আগবাঢ়িব। দ্বিতীয়, তৃতীয় আৰু চতুৰ্থ স্থানৰ দলটোৱে প্ৰতিযোগিতাখনৰ প্ৰাৰম্ভিক পৰ্যায় ছুপাৰ ছিৰিজত খেলিব। শীৰ্ষ স্থানত থকা দলটোৱে এই তিনিটা দলৰ মাজত এখন খেলৰ পিছত মূল মঞ্চত চূড়ান্ত বাৰ্থ নিশ্চিত কৰিব।

দক্ষিণ আফ্ৰিকা, জিম্বাবুৱে, নামিবিয়াৰ ১২টা স্থানত ৪ অক্টোবৰৰ পৰা ২১ নৱেম্বৰলৈ অনুষ্ঠিত হ’ব ২০২৭ চনৰ এদিনীয়া বিশ্বকাপ।

১০ দলৰ মাজত কোৱালিফায়াৰ অনুষ্ঠিত হ’ব

এই কোৱালিফায়াৰত ২০২৬ চনৰ ৩০ ছেপ্টেম্বৰৰ এদিনীয়া ৰেংকিঙৰ ভিত্তিত আয়োজক দক্ষিণ আফ্ৰিকা আৰু জিম্বাবুৱে বাদ দি সৰ্বনিম্ন ৰেংকিঙৰ ফুল মেম্বাৰ দল দুটাই অংশগ্ৰহণ কৰিব ।ক্ৰিকেট বিশ্বকাপ লীগ ২ৰ শীৰ্ষ চাৰিটা আৰু বিশ্বকাপ কোৱালিফায়াৰ প্লে অফৰ শীৰ্ষ চাৰিটা দলেও অংশগ্ৰহণ কৰিব।

আঠটা দলৰ কোৱালিফায়াৰ প্লে অফত লীগ ২ৰ তলৰ চাৰিটা আৰু চেলেঞ্জ লীগৰ শীৰ্ষ চাৰিটা দলে অংশগ্ৰহণ কৰিব। প্লে অফৰ ফৰ্মেট এতিয়াও চূড়ান্ত হোৱা নাই যদিও শীৰ্ষ চাৰিটা দলে বিশ্বকাপ কোৱালিফায়াৰৰ বাবে যোগ্যতা অৰ্জন কৰিব।

চেলেঞ্জ লীগৰ ১২টা দলক ছটাকৈ দলৰ দুটা গ্ৰুপত ভাগ কৰা হ’ব। প্ৰতিটো গ্ৰুপে তিনিখন ৰাউণ্ড ৰবিন প্ৰতিযোগিতা খেলিব, আৰু প্ৰতিটো গ্ৰুপৰ পৰা শীৰ্ষ দুটা দলে কোৱালিফায়াৰ প্লে অফলৈ আগবাঢ়িব।

ৱেষ্ট ইণ্ডিজৰ ওপৰত ওলমি আছে অৰ্হতাৰ তৰোৱাল

বৰ্তমান আইচিচিৰ এদিনীয়া ৰেংকিঙত দশম স্থানত আছে ৱেষ্ট ইণ্ডিজ আৰু ৩০ ছেপ্টেম্বৰৰ কাট অফ ডেটৰ পূৰ্বে ছেপ্টেম্বৰ মাহত ভাৰতৰ বিৰুদ্ধে দুখন এদিনীয়া খেলৰ দিন ধাৰ্য কৰা হৈছে।

ৱেষ্ট ইণ্ডিজৰ শীৰ্ষ আঠটা স্থানত প্ৰৱেশৰ সম্ভাৱনাও আন দলৰ ফলাফলৰ ওপৰত নিৰ্ভৰ কৰিব, বিশেষকৈ আফগানিস্তান (অষ্টম) আৰু আয়াৰলেণ্ড (দ্বাদশ)ৰ মাজত অনুষ্ঠিত হোৱা পাঁচখন এদিনীয়া শৃংখলাৰ ওপৰত।

যদি আয়াৰলেণ্ডে এই ছিৰিজত ৪-১ বা ৫-০ গ’লত জয়লাভ কৰে আৰু ৱেষ্ট ইণ্ডিজে ভাৰতৰ বিৰুদ্ধে দুয়োখন মেচত জয়লাভ কৰে তেন্তে হয়তো শীৰ্ষ আঠত প্ৰৱেশৰ সম্ভাৱনা থাকিব পাৰে। অৱশ্যে যদি আফগানিস্তানে এই শৃংখলাত জয়লাভ কৰে তেন্তে ৱেষ্ট ইণ্ডিজে কোৱালিফায়াৰৰ মাজেৰে পাৰ হ’ব লাগিব বুলি প্ৰায় নিশ্চিত।

মন কৰিবলগীয়া যে ২০২৩ চনৰ এদিনীয়া বিশ্বকাপৰ বাবেও যোগ্যতা অৰ্জন কৰিবলৈ সক্ষম নহ’ল ৱেষ্ট ইণ্ডিজ। হাৰাৰেত অনুষ্ঠিত হোৱা কোৱালিফায়াৰত নেদাৰলেণ্ডৰ বিৰুদ্ধে ছুপাৰ অভাৰত পৰাজয়ৰ ফলত তেওঁলোকৰ বিশ্বকাপত প্ৰৱেশৰ আশা ম্লান হৈ পৰে।

হিন্দুস্থান সমাচাৰ / মনোজ কুমাৰ শইকীয়া