কামৰূপ, ০৫ আগষ্ট (হি.স.)। ৰঙিয়াৰ পৰা এটাৰ পিছত আন এটা নিৰুদ্দেশৰ ঘটনা । পুনৰ যুৱক সন্ধানহীন । যোৱা ৩১ জুলাইৰ পৰা সন্ধানহীন হৈ আছে ৰঙিয়াৰ গুৰকুছিৰ ইমাছ আলী (২৪) । ঘৰৰ পৰা সাধাৰণ ভাবে ওলাই ইমাছ আলী হঠাৎ নিৰুদ্দেশ হৈ পৰা ঘটনাই চাঞ্চল্যৰ সৃষ্টি কৰিছে । ইমাছ আলীৰ মাতৃ আৰু পৰিয়ালৰ আন সদস্যসকলে বিগত ৬ দিন ধৰি বিভিন্ন ঠাইত বিচাৰ খোচাৰ কৰি আহিছে ।
আত্মীয়-স্বজন, চুবুৰীয়া, বন্ধু-বান্ধৱীৰ ঘৰত, আনকি দূৰৈৰ অঞ্চললৈকে খবৰ লৈয়ো কোনো সন্ধান পোৱা নাই ইমাছৰ । পৰিয়ালটো এতিয়া গভীৰ চিন্তাত পৰিছে। পৰিয়ালৰ তৰফৰ পৰা ৰঙিয়া আৰক্ষী থানাত এজাহাৰ দাখিল কৰা হৈছে । আৰক্ষীয়ে তদন্ত আৰম্ভ কৰিছে যদিও এতিয়ালৈকে কোনো খবৰ পোৱা নাই । ইমাছ আলীৰ সন্ধান পালে বা তেওঁৰ বিষয়ে কোনো তথ্য থাকিলে ওচৰৰ আৰক্ষী থানা বা পৰিয়ালৰ সৈতে যোগাযোগ কৰিবলৈ অনুৰোধ জনোৱা হৈছে । ইমাছ আলী ঘৰলৈ ঘূৰি আহক— এয়াই এতিয়া গুৰকুছি গাঁৱৰ সকলোৰে একমাত্র প্ৰাৰ্থনা ।
হিন্দুস্থান সমাচাৰ / প্ৰকাশ ডেকা