নতুন দিল্লী, ০৫ আগষ্ট (হি.স.)। সংসদৰ উচ্চ সদন ৰাজ্যসভাই উচ্চতম ন্যায়ালয় (ন্যায়াধীশৰ সংখ্যা) সংশোধনী বিধেয়ক ২০২৬ গৃহীত কৰে। ইয়াৰ ফলত দেশৰ উচ্চতম ন্যায়ালয়ত ন্যায়াধীশৰ অনুমোদিত শক্তি ৩৪ৰ পৰা ৩৮লৈ বৃদ্ধিৰ পথ প্ৰশস্ত হৈ পৰিছে। ৩ আগষ্টত লোকসভাত গৃহীত হোৱা এই বিধেয়কখন এতিয়া ৰাষ্ট্ৰপতিৰ সন্মতিৰ পিছত আইনত পৰিণত হ’ব।

বিধেয়কখনৰ ওপৰত হোৱা আলোচনাৰ উত্তৰত কেন্দ্ৰীয় আইন আৰু ন্যায় মন্ত্ৰী অৰ্জুন ৰাম মেঘৱালে কয় যে নৰেন্দ্ৰ মোডী চৰকাৰে সবকা সাথ, সবকা বিকাশ, সবকা বিশ্বাস, সবকা প্ৰয়াস মূলমন্ত্ৰৰে ন্যায়িক সংস্কাৰ আগুৱাই লৈ গৈছে। সমগ্ৰ দেশতে বিভিন্ন খণ্ডত সংস্কাৰ চলি আছে, আৰু এই বিধেয়কখন সেই ধাৰাবাহিক ন্যায়িক সংস্কাৰৰ অংশ। তেওঁ কয় যে এয়া কেৱল প্ৰশাসনিক সিদ্ধান্ত নহয় বৰঞ্চ এক উল্লেখযোগ্য ন্যায়িক সংস্কাৰ। উচ্চতম ন্যায়ালয়ত ক্ৰমাৎ বৃদ্ধি পোৱা গোচৰৰ পৰিপ্ৰেক্ষিতত এই পদক্ষেপ প্ৰয়োজনীয় আছিল। তেওঁ কয় যে সংবিধান বিচাৰপীঠ গঠনে নিয়মীয়া গোচৰৰ শুনানিত প্ৰভাৱ পেলায়।

সদ্যগঠিত নজন ন্যায়াধীশৰ সংবিধান বিচাৰপীঠৰ উদাহৰণ দি তেওঁ কয় যে এনে বৃহৎ গোচৰত আন গোচৰৰ শুনানি পলম হয়, যাৰ ফলত বেকলগ বৃদ্ধি পায়। এই সংশোধনীৰ অধীনত উচ্চতম ন্যায়ালয়ত মুখ্য ন্যায়াধীশকে ধৰি ন্যায়াধীশৰ সংখ্যা ৩৪ৰ পৰা ৩৮লৈ বৃদ্ধি কৰা হৈছে। ইয়াৰ ফলত বিচাৰাধীন গোচৰৰ নিষ্পত্তি ক্ষিপ্ৰ হ’ব। একেলগে অধিক গোচৰৰ শুনানি গ্ৰহণ কৰিব পৰা যাব। সংবিধান বিচাৰপীঠ অধিক নিয়মীয়াকৈ গঠন কৰা হ’ব।

ইয়াৰ দ্বাৰা সাধাৰণ নাগৰিকক সময়োপযোগী ন্যায় প্ৰদান কৰাত সহায়ক হ’ব বুলি তেওঁ আস্থা প্ৰকাশ কৰে। মেঘৱালে উল্লেখ কৰে যে চৰকাৰে ন্যায়পালিকাৰ স্বাধীনতাক সন্মান কৰে আৰু আঞ্চলিক বিচাৰপীঠৰ বিষয়ত সকলো অংশীদাৰৰ সৈতে আলোচনা কৰি আছে। সবৰীমালা গোচৰৰ উদাহৰণ দি তেওঁ কয় যে ৯ জনীয়া সংবিধান বিচাৰপীঠ গঠন হ’লে অন্য গোচৰৰ শুনানিৰ বাবে উপলব্ধ ন্যায়াধীশৰ সংখ্যা হ্ৰাস পায়। গতিকে ন্যায়াধীশৰ সংখ্যা বৃদ্ধি কৰিলে আদালতৰ কাম-কাজ উন্নত হ’ব।

মহিলা প্ৰতিনিধিত্ব সন্দৰ্ভত ভাষণ দি মেঘৱালে কয় যে দেশত অতি সোনকালে প্ৰথমগৰাকী মহিলা মুখ্য ন্যায়াধীশ (চিজেআই) দেখা যাব। তেওঁ আঙুলিয়াই দিয়ে যে এই অধ্যাদেশৰ পিছতে এইবাৰ উচ্চতম ন্যায়ালয়ত আন এগৰাকী মহিলা ন্যায়াধীশ নিযুক্তি দিয়া হৈছে।

ইয়াৰ পূৰ্বে প্ৰায় ৩৩ গৰাকী সাংসদে বিধেয়কখনৰ সন্দৰ্ভত ৰাজ্যসভাৰ আলোচনাত অংশ লৈছিল। আলোচনাৰ আৰম্ভণিতে কংগ্ৰেছৰ সাংসদ বিবেক তংকাই চৰকাৰে অধ্যাদেশ প্ৰৱৰ্তনৰ সিদ্ধান্তক লৈ প্ৰশ্ন উত্থাপন কৰে। তেওঁ কয় যে উচ্চতম ন্যায়ালয়ত প্ৰায় ৯৫ হাজাৰ গোচৰৰ বোজা বাকী থকাৰ সময়ত কেৱল ন্যায়াধীশৰ সংখ্যা বৃদ্ধি কৰিলেই যথেষ্ট নহ’ব। ন্যায়িক সংস্কাৰৰ ক্ষেত্ৰত এক ব্যাপক দৃষ্টিভংগীৰ প্ৰয়োজনীয়তাৰ ওপৰতো তেওঁ গুৰুত্ব আৰোপ কৰে। সাংসদ পি উইলছনে ন্যায়পালিকাত বৈচিত্ৰ্য আৰু প্ৰতিনিধিত্ব বৃদ্ধিৰ প্ৰয়োজনীয়তাৰ ওপৰত গুৰুত্ব আৰোপ কৰে।

বিজেপিৰ সাংসদ মনন কুমাৰ মিশ্ৰই কয় যে ন্যায় ব্যৱস্থাক অধিক ফলপ্ৰসূ কৰি তুলিবলৈ ন্যায়িক সংস্কাৰৰ সমান্তৰালভাৱে অধীনস্থ ন্যায়পালিকাৰ খালী পদ পূৰণ কৰাটোও সমানেই গুৰুত্বপূৰ্ণ।

বিজেপিৰ সাংসদ সংগীতা যাদৱে বিধেয়কখনক এক ঐতিহাসিক আৰু দূৰদৰ্শী পদক্ষেপ বুলি অভিহিত কৰি সমৰ্থন কৰে। তেওঁ কয় যে দেশত বহু গোচৰ এদশকৰো অধিক সময় ধৰি বিচাৰাধীন হৈ আছে, আৰু ন্যায়াধীশৰ সংখ্যা বৃদ্ধি কৰিলে সাধাৰণ জনতাৰ বাবে সুলভ, ফলপ্ৰসূ আৰু ক্ষিপ্ৰ ন্যায় নিশ্চিত কৰাত সহায়ক হ’ব।

তৃণমূল কংগ্ৰেছৰ ড০ মেনকা গুৰুস্বামীয়ে উল্লেখ কৰে যে সমগ্ৰ দেশৰ বিভিন্ন উচ্চ ন্যায়ালয়ৰ প্ৰায় ৩০ শতাংশ ন্যায়াধীশৰ পদ খালী। উচ্চ ন্যায়ালয়ত খালী পদসমূহ সময়মতে পূৰণ নকৰিলে কেৱল উচ্চতম ন্যায়ালয়ত ন্যায়াধীশৰ সংখ্যা বৃদ্ধি কৰিলেই আকাংক্ষিত ফলাফল লাভ কৰিব নোৱাৰিব বুলি যুক্তি আগবঢ়ায়।

ডি এম কেৰ আৰ গিৰিৰাজনে কয় যে ন্যায়াধীশৰ সংখ্যা বৃদ্ধি কৰিলে উচ্চতম ন্যায়ালয়ত গোচৰৰ বেকলগ হ্ৰাস পাব। বিজু জনতা দলৰ ড০ সাস্মিত পাত্ৰই বিধেয়কখনক সমৰ্থন কৰি উচ্চতম ন্যায়ালয় আৰু উচ্চ ন্যায়ালয়ৰ আন্তঃগাঁথনি শক্তিশালী কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

ৱাই এছ আৰ চি পিৰ এছ নিৰঞ্জন ৰেড্ডীয়ে কয় যে প্ৰতিজন ন্যায়াধীশৰ গোচৰৰ সংখ্যা ক্ৰমাগতভাৱে বৃদ্ধি পাইছে, যাৰ ফলত ন্যায়িক ব্যৱস্থাত অতিৰিক্ত হেঁচা পৰিছে। শিৱসেনাৰ ড° জ্যোতি এন ৱাঘমাৰে এই আইনখনে ন্যায়পালিকাৰ প্ৰতি জনসাধাৰণৰ আস্থা আৰু অধিক শক্তিশালী কৰিব আৰু ক্ষিপ্ৰ ন্যায় নিশ্চিত কৰাত সহায় কৰিব বুলি উল্লেখ কৰে। এনচিপিৰ ৰাজেন্দ্ৰ জৈন, আম আদমী পাৰ্টিৰ সঞ্জয় সিং, শিৱসেনাৰ মিলিন্দ দেওৰা, টিডিপিৰ বিজয় চিন্তাকায়ালা, জেএমএমৰ মহুৱা মাঝীকে ধৰি বিভিন্ন দলৰ সদস্যসকলেও আলোচনাত অংশগ্ৰহণ কৰে।

বিধেয়কখন গৃহীত হোৱাৰ পিছতে অধিক সংসদীয় কাম-কাজৰ বাবে লোকসভালৈ প্ৰেৰণ কৰা হয়। পৰৱৰ্তী সময়ত ৰাজ্যসভাত সদস্যসকলে বিশেষ উল্লেখ কৰি জনস্বাৰ্থৰ বিভিন্ন বিষয় উত্থাপন কৰে। দিনটোৰ কাম-কাজ সমাপ্ত হোৱাৰ পিছতে উপ অধ্যক্ষই বৃহস্পতিবাৰে পুৱা ১১ বজালৈকে সদন স্থগিত ৰাখে।

হিন্দুস্থান সমাচাৰ / মনোজ কুমাৰ শইকীয়া