শিৱসাগৰ (অসম), ০৫ আগষ্ট (হি.স.)। কেন্দ্ৰীয় স্বাস্থ্য মন্ত্ৰী তথা বিজেপিৰ প্ৰাক্তন ৰাষ্ট্ৰীয় সভাপতি জে পি নড্ডাই আজি অসমৰ শিৱসাগৰ জিলাৰ সন্তক আৰু নেপালী খুঁটীৰ বানপানী প্ৰভাৱিত অঞ্চলসমূহ ভ্ৰমণ কৰে। তেওঁ আক্ৰান্ত লোকসকলৰ সৈতে মত বিনিময় কৰে।

নড্ডাই বানপানীত ক্ষতিগ্ৰস্ত পৰিয়ালসমূহৰ সৈতে সাক্ষাৎ কৰিছিল আৰু ঘৰ, কৃষিভূমি, পশুধন আৰু ৰাজহুৱা আন্তঃগাঁথনিৰ ব্যাপক ক্ষতিৰ বিষয়ে তেওঁলোকৰ উদ্বেগ শুনিছিল। তেওঁ ক্ষতিগ্ৰস্ত গাঁওসমূহত চলি থকা সাহায্য আৰু পুনৰ্বাসনৰ কামৰো পৰ্যালোচনা কৰে।

বিজেপিৰ প্ৰাক্তন সভাপতি নড্ডাই অত্যাৱশ্যকীয় সাহায্য সামগ্ৰীৰ উপলব্ধতা আৰু স্থানচ্যুত পৰিয়ালসমূহক প্ৰদান কৰা সহায়ৰ বিষয়ে অনুসন্ধান কৰে। তেওঁ বাসিন্দাসকলক আশ্বাস দিয়ে যে তেওঁলোকৰ উদ্বেগৰ প্ৰতি লক্ষ্য ৰখা হৈছে আৰু দুৰ্যোগৰ ফলত ক্ষতিগ্ৰস্ত লোকসকলক সহায় কৰিবলৈ চৰকাৰ সম্পূৰ্ণৰূপে প্ৰতিশ্ৰুতিবদ্ধ আৰু সকলো সম্ভৱ সহায় আগবঢ়োৱা হ ব।

শিৱসাগৰৰ আটাইতকৈ ক্ষতিগ্ৰস্ত অঞ্চলসমূহৰ ভিতৰত আছে সন্তক আৰু নেপালী খুঁটী, য ত শেহতীয়া বানপানীয়ে ব্যাপক ধ্বংস সাধন কৰিছিল আৰু হাজাৰ হাজাৰ লোকৰ জীৱন আৰু জীৱিকা প্ৰভাৱিত কৰিছিল। বহুতো পৰিয়ালে তেওঁলোকৰ ঘৰ আৰু সামগ্ৰী হেৰুৱাইছিল, আনহাতে বানপানীৰ ফলত পথ, বান্ধ আৰু কৃষি ভূমিৰ বৃহৎ অংশ ক্ষতিগ্ৰস্ত হৈছিল।

নড্ডাৰ এই ভ্ৰমণ এনে এক সময়ত হৈছে যেতিয়া অসম চৰকাৰ আৰু জিলা প্ৰশাসনে বানপানীত ক্ষতিগ্ৰস্ত অঞ্চলসমূহৰ ক্ষতিৰ মূল্যায়ন কৰিবলৈ, তাৎক্ষণিক সাহায্য প্ৰদান কৰিবলৈ আৰু পুনৰ্বাসনৰ কাম আৰম্ভ কৰিবলৈ দ্ৰুত প্ৰচেষ্টা চলাই আছে। কেন্দ্ৰীয় মন্ত্ৰীগৰাকীৰ এই ভ্ৰমণ উচ্চ অসমৰ বানপানী পৰিস্থিতিৰ চৰকাৰৰ চলি থকা পৰ্যালোচনাৰ অংশ, বিশেষকৈ শিৱসাগৰ আৰু কাষৰীয়া জিলাসমূহ, যিবোৰ বিধ্বংসী বানপানীৰ ফলত আটাইতকৈ বেছি ক্ষতিগ্ৰস্ত হৈছিল।

শিৱসাগৰৰ পিছত নড্ডাই বানপানীৰ ফলত হোৱা ক্ষয়-ক্ষতিৰ হিচাপ ল’বলৈ চুবুৰীয়া নাগালেণ্ডৰ মন জিলালৈ গৈছিল। নাগালেণ্ডৰ পৰা উভতি অহাৰ পিছত তেওঁ আজি সন্ধিয়া অসমৰ চৰাইদেও জিলাৰ বানপানী প্ৰভাৱিত অঞ্চল পৰিদৰ্শন কৰিব। বৃহস্পতিবাৰে নাড্ডাই চুবুৰীয়া ৰাজ্য অৰুণাচল প্ৰদেশ ভ্ৰমণ কৰিব, য’ত ডাৱৰ বিস্ফোৰণৰ ফলত যথেষ্ট ক্ষতিগ্ৰস্ত হৈছে। কেন্দ্ৰীয় মন্ত্ৰী নড্ডাই মঙলবাৰে অসম, নাগালেণ্ড আৰু অৰুণাচল প্ৰদেশত তিনিদিনীয়া ভ্ৰমণসূচীৰে উচ্চ অসমৰ ডিব্ৰুগড়ত উপস্থিত হয়।

কেন্দ্ৰীয় মন্ত্ৰী নড্ডাৰ সৈতে মুখ্যমন্ত্ৰী ড0 হিমান্ত বিশ্ব শৰ্মা, মন্ত্ৰী অশোক সিংহল, মন্ত্ৰী কেশৱ মহন্ত, মন্ত্ৰী পীজুষ হাজৰিকা, মন্ত্ৰী সুশান্ত বৰগোঁহাই, স্থানীয় বিধায়ক আৰু প্ৰশাসনিক বিষয়াসকল উপস্থিত আছিল।

--------

হিন্দুস্থান সমাচাৰ / অৰৱিন্দ