কাঠমাণ্ডু, ২৯ আগষ্ট (হি.স.)। নেপালৰ ৰাছুৱা জিলাত ২৬ আগষ্টত সংঘটিত হোৱা ভয়াৱহ বানপানীৰ পাছত সাহায্য আৰু উদ্ধাৰ অভিযান অব্যাহত আছে। নেপাল সেনাৰ তথ্য অনুসৰি হেলিকপ্টাৰ আৰু অন্যান্য উপায়েৰে ২৪৬৫ জন লোকক নিৰাপদ স্থানলৈ স্থানান্তৰ কৰা হৈছে। সেনাবাহিনীৰ মতে, ক্ষতিগ্ৰস্ত অঞ্চলসমূহত অনুসন্ধান আৰু উদ্ধাৰ অভিযান, চিকিৎসা সাহায্য, আৰু সাহায্য সামগ্ৰী যুদ্ধৰ ভিত্তিত অব্যাহত আছে।

নেপাল সেনাৰ তথ্য অনুসৰি আজি পুৱা ৯ বজালৈকে সেনাবাহিনীৰ এয়াৰলিফ্ট ব্যৱহাৰ কৰি টাইমুৰে, ছ্যাফ্ৰুভেছি, ধুনচে, মাইলুঙ আদি বানপীড়িত অঞ্চলৰ পৰা ১৬৩ জন বিদেশী নাগৰিকক বিমানেৰে লৈ যোৱা হৈছে। ইয়াৰ ভিতৰত ১১৩ জন ভাৰতীয়, ৪ জন জাৰ্মান, ২৬ জন চীনা, ২ জন আমেৰিকান, ২ জন ইটালীয়, ১৫ জন দক্ষিণ কোৰিয়ান আৰু এজন ওমানী।

সেনাই জনোৱা মতে, ত্ৰিশুলি-৩এ সুৰংগৰ পৰা উদ্ধাৰ কৰা ১৯১ জনকে ধৰি ২২৬৫ জন লোকক বিমানেৰে নিৰাপদ স্থানলৈ লৈ যোৱা হৈছে। আন ২০০ জন লোকক স্থলপথেৰে নিৰাপদ স্থানলৈ লৈ যোৱা হয়, যাৰ ফলত উদ্ধাৰ হোৱা লোকৰ সংখ্যা ২৪৬৫ জনলৈ বৃদ্ধি পায়।

বানাক্ৰান্ত লোকৰ বাবে নেপাল সেনাই ত্ৰিশুলি আৰু ধুঞ্চেত জৰুৰীকালীন চিকিৎসা কেন্দ্ৰ স্থাপন কৰিছে। সেনাৰ তথ্য অনুসৰি এই কেন্দ্ৰসমূহে এই পৰ্যন্ত ১৭০৬ জন লোকক স্বাস্থ্যসেৱা প্ৰদান কৰিছে।

ক্ষতিগ্ৰস্ত জিলাসমূহত ৬৭০০ৰো অধিক নেপাল সেনা জোৱানক সাহায্য আৰু উদ্ধাৰ অভিযানৰ বাবে মোতায়েন কৰা হৈছে। সেনাবাহিনীৰ মতে বিভিন্ন নিৰাপত্তা সংস্থাৰ সমন্বয়ত আহত আৰু নিৰুদ্দেশ হোৱা লোকৰ সন্ধান, উদ্ধাৰ অভিযান, জৰুৰী চিকিৎসা, সাহায্য সামগ্ৰী বিতৰণ আদি অব্যাহত আছে।

কাঠমাণ্ডুৰ পৰা ত্ৰিশুলীলৈ পথেৰে সাহায্য সামগ্ৰী কঢ়িয়াই নিয়াৰ পিছত বানপীড়িত অঞ্চললৈ বিমানযোগে প্ৰেৰণ কৰা হৈছে। এই পৰ্যন্ত ৩৬০০ কিলোগ্ৰাম সাহায্য সামগ্ৰী ত্ৰিশুলি-৩এ সুৰংগ এলেকাত, ৫০০ কিলোগ্ৰাম মাইলুঙলৈ, আৰু ২২০ কিলোগ্ৰাম বেতৰাৱতীলৈ প্ৰেৰণ কৰা হৈছে।

ত্ৰিশুলি-৩এ সুৰংগ এলেকাতো অব্যাহত আছে এক বিশেষ উদ্ধাৰ অভিযান। ১২ নং ভদ্ৰাৰ পৰাই ৮৪ জন নেপাল সেনাৰ জোৱানৰ সৈতে মুঠ ১৪৬ জন সদস্যই সাহায্য আৰু উদ্ধাৰ অভিযানত লিপ্ত হৈছে।

সেনাবাহিনীৰ মতে, প্ৰত্যাহ্বানমূলক পৰিস্থিতিৰ মাজতো ক্ষতিগ্ৰস্ত লোকসকলক সকাহ দিয়াৰ লগতে আবদ্ধ লোকসকলক নিৰাপদে উলিয়াই অনাৰ প্ৰচেষ্টা অব্যাহত আছে।

হিন্দুস্থান সমাচাৰ / মনোজ কুমাৰ শইকীয়া