মুজাফ্ফৰাবাদ, ২৯ আগষ্ট (হি.স.)। পাকিস্তান মুছলিম লীগ-নৱাজৰ নেতা ইফতিখাৰ গিলানীয়ে পাকিস্তান দখল কৰা জম্মু-কাশ্মীৰ (পিঅ’কে)ৰ ১৭ সংখ্যক প্ৰধানমন্ত্ৰী হিচাপে শপত গ্ৰহণ কৰে। শুকুৰবাৰে মুজাফ্ফৰাবাদৰ পিঅ’কে বিধানসভাত অনুষ্ঠিত এক অনুষ্ঠানত শপত গ্ৰহণ কৰাৰ পিছত তেওঁ সদনত প্ৰথম ভাষণ প্ৰদান কৰে। প্ৰধানমন্ত্ৰী হোৱাৰ পিছত দিয়া ভাষণত গিলানীয়ে ভাৰতৰ বিৰুদ্ধে চোকা বক্তব্য আগবঢ়ায় আৰু কাশ্মীৰ সমস্যাক লৈ ভাৰতক লক্ষ্য কৰি লয়।

প্ৰধানমন্ত্ৰী পদৰ নিৰ্বাচনত ইফতিখাৰ গিলানীয়ে ৩০টা ভোট লাভ কৰাৰ বিপৰীতে পাকিস্তান পিপলছ পাৰ্টিৰ প্ৰাৰ্থী চৰ্দাৰ মুখতাৰ খানে ১৪টা ভোট লাভ কৰে। ২০১১ চনত প্ৰথমবাৰৰ বাবে পিঅ’কে বিধানসভালৈ নিৰ্বাচিত হোৱা গিলানীয়ে পিঅ’কে চৰকাৰৰ শিক্ষামন্ত্ৰী হিচাপেও কাৰ্যনিৰ্বাহ কৰিছিল। এইবাৰ টেকন’ক্ৰেটৰ বাবে সংৰক্ষিত এখন আসন লাভ কৰে।

জিঅ’ নিউজৰ মতে, বিধানসভাত প্ৰথম ভাষণৰ সময়ত গিলানীয়ে ভাৰতক সমালোচনা কৰি কাশ্মীৰ বিষয়টোক ৰাষ্ট্ৰসংঘৰ প্ৰস্তাৱৰ অধীনত কাশ্মীৰী জনসাধাৰণৰ আত্মনিয়ন্ত্ৰণৰ অধিকাৰৰ সৈতে জড়িত কৰিছিল। লগতে ২০১৯ চনৰ ৫ আগষ্টত জম্মু-কাশ্মীৰ সন্দৰ্ভত ভাৰতে কৰা কাৰ্যৰ বিৰোধিতা কৰে।

আইন প্ৰণয়নৰ জৰিয়তে কাশ্মীৰক ভাৰতৰ অংগ কৰিব নোৱাৰি বুলি দাবী কৰে গিলানীয়ে। পাকিস্তান-কাশ্মীৰৰ সম্পৰ্ক সন্দৰ্ভত তেওঁ কয় যে কাশ্মীৰ অবিহনে পাকিস্তান অসম্পূৰ্ণ, আৰু পাকিস্তানৰ অবিহনে কাশ্মীৰ অসম্পূৰ্ণ।

তেওঁ পাকিস্তান সেনা আৰু ফিল্ড মাৰ্শ্বাল চৈয়দ অসীম মুনিৰৰ প্ৰতিও কৃতজ্ঞতা জ্ঞাপন কৰে। লগতে প্ৰধানমন্ত্ৰী শ্বাহবাজ শ্বৰীফ, পিএমএল-এনৰ মুৰব্বী নৱাজ শ্বৰীফ, আৰু পঞ্জাৱৰ মুখ্যমন্ত্ৰী মৰিয়াম নৱাজক ধন্যবাদ জ্ঞাপন কৰে।

ইফতিখাৰ গিলানীয়ে কয় যে তেওঁৰ চৰকাৰে মুখ্যমন্ত্ৰী মৰিয়াম নৱাজৰ নেতৃত্বত পঞ্জাৱত লাভ কৰা পৰিৱৰ্তনৰ দৰেই পিঅ’কেত উন্নয়ন আৰু শাসন ব্যৱস্থাৰ পৰিৱৰ্তন আনিবলৈ চেষ্টা কৰিব।

তেওঁ স্বাস্থ্য আৰু শিক্ষা ব্যৱস্থাৰ উন্নতি, যুৱক-যুৱতীসকলৰ বাবে দক্ষতাভিত্তিক শিক্ষা, চৰকাৰী কাম-কাজত স্বচ্ছতা বৃদ্ধিৰ প্ৰতিশ্ৰুতি দিয়ে। চৰকাৰী নিযুক্তিৰ স্বচ্ছতা নিশ্চিত কৰিবলৈ ৰাষ্ট্ৰীয় পৰীক্ষণ সেৱাৰ আৰ্হিত তৃতীয় পক্ষৰ নিযুক্তি ব্যৱস্থা প্ৰৱৰ্তনৰ পৰিকল্পনাও ঘোষণা কৰে গিলানীয়ে।

নতুন প্ৰধানমন্ত্ৰীয়ে পিঅ’কেক ডিজিটেল অৰ্থনীতিৰ দিশে আগুৱাই নিয়াৰ কথা কয়। তেওঁ জনসাধাৰণৰ অভাৱ-অভিযোগৰ সমাধানৰ বাবে ডিজিটেল নাগৰিক পৰ্টেল মুকলি কৰাৰ পৰিকল্পনাৰো ৰূপৰেখা দাঙি ধৰে।

গিলানীয়ে স্বীকাৰ কৰে যে পিঅ’কেৰ কিছুমান ঠাইত ইণ্টাৰনেট সেৱা এটা সমস্যা হৈয়ে আছে। ভৱিষ্যতে পৰিস্থিতি উন্নত হ’ব বুলি আশা প্ৰকাশ কৰে। যুৱক-যুৱতীসকলক কৰ্মসংস্থাপন আৰু আধুনিক অৰ্থনীতিৰ বাবে প্ৰস্তুত কৰিবলৈ দক্ষতাভিত্তিক শিক্ষাৰ ওপৰতো গুৰুত্ব আৰোপ কৰিবলৈ আহ্বান জনায়।

পাকিস্তানৰ প্ৰধানমন্ত্ৰী শ্বাহবাজ শ্বৰীফে ইফতিখাৰ গিলানীক পিঅ’কেৰ প্ৰধানমন্ত্ৰী নিৰ্বাচিত হোৱাৰ বাবে অভিনন্দন জনায়। তেওঁ কয় যে প’কত পিএমএল-এনৰ বিজয় দলৰ সভাপতি নৱাজ শ্বৰীফৰ নেতৃত্ব আৰু কৰ্মীসকলৰ কঠোৰ পৰিশ্ৰমৰ ফল।

শ্বাহবাজ শ্বৰীফে আশা প্ৰকাশ কৰে যে গিলানীয়ে পিঅ’কেৰ বিকাশ আৰু ইয়াৰ জনসাধাৰণৰ কল্যাণ আৰু মংগলৰ ক্ষেত্ৰত সক্ৰিয় ভূমিকা গ্ৰহণ কৰিব। তেওঁ কয় যে কেন্দ্ৰীয় চৰকাৰে প’কেৰ জনসাধাৰণক তেওঁলোকৰ অগ্ৰগতি, জীৱনৰ মানদণ্ড, আৰু কল্যাণৰ বাবে সকলো সম্ভৱপৰ সহায় আগবঢ়াই যাব।

পাকিস্তানৰ প্ৰধানমন্ত্ৰীয়ে প’কত গণতান্ত্ৰিক প্ৰক্ৰিয়া অব্যাহত ৰখাটোও আদৰণীয় পৰিঘটনা বুলি অভিহিত কৰে।

হিন্দুস্থান সমাচাৰ / মনোজ কুমাৰ শইকীয়া