কাঠমাণ্ডু, ২৬ আগষ্ট (হি.স.)। নেপালৰ শক্তি মন্ত্ৰালয়ে প্ৰাথমিক অনুমান কৰিছে যে তিব্বতৰ পৰা ৰাছুৱাত হোৱা ভয়াৱহ বানপানীয়ে ত্ৰিশুলি নদীৰ পাৰত অৱস্থিত ৩০০ মেগাৱাটতকৈ অধিক ক্ষমতাসম্পন্ন জলবিদ্যুৎ প্ৰকল্পৰ যথেষ্ট ক্ষতিসাধন কৰিছে। ক্ষতিগ্ৰস্ত প্ৰকল্পসমূহৰ ভিতৰত আছে নিৰ্মাণাধীন আৰু কাৰ্যক্ষম জলবিদ্যুৎ প্ৰকল্প দুয়োটা।

প্ৰাথমিক মূল্যায়ন অনুসৰি কেইবাটাও প্ৰকল্পৰ শক্তিকেন্দ্ৰ আৰু উপকেন্দ্ৰ সম্পূৰ্ণৰূপে ক্ষতিগ্ৰস্ত হৈছে। শক্তি মন্ত্ৰালয়ৰ তথ্য অনুসৰি ৰসুৱাগাঢ়ী (১১১ মেগাৱাট), চিলিমে (২২ মেগাৱাট), ত্ৰিশুলি-৩এ (৬০ মেগাৱাট), ত্ৰিশুলি-৩বি (৩৭ মেগাৱাট), মাইলুং (১৪ মেগাৱাট), আৰু ত্ৰিশুলি-বেনিঘাট (৩৫ মেগাৱাট) জলবিদ্যুৎ প্ৰকল্পৰ ক্ষতিসাধন হৈছে।

৫৭ মেগাৱাট শক্তিৰ সঞ্জেন (উচ্চ) আৰু সঞ্জেন জলবিদ্যুৎ প্ৰকল্পৰ ক্ষয়-ক্ষতিৰো খবৰ দিয়ে মন্ত্ৰালয়ে। শক্তি মন্ত্ৰী বিৰাজভক্ত শ্ৰেষ্ঠৰ সচিবালয়ৰ এজন বিষয়াই উল্লেখ কৰিছে যে বৰ্তমান চৰকাৰী ক্ষতিৰ সবিশেষ সংকলন কৰা হৈছে। ক্ষতিগ্ৰস্ত প্ৰকল্পসমূহত কাম কৰা কৰ্মচাৰীসকলৰ তথ্যও সংগ্ৰহ কৰা হৈছে।

নেপাল বিদ্যুৎ প্ৰাধিকৰণৰ বিভিন্ন বিদ্যুৎ কেন্দ্ৰ আৰু সংবহন আন্তঃগাঁথনিও ক্ষতিগ্ৰস্ত হৈছে। কৰ্তৃপক্ষৰ মতে, বানপানীৰ ফলত ৰসুৱা আৰু ইয়াৰ দাঁতিকাষৰীয়া অঞ্চলত বিদ্যুৎ যোগান ব্যাহত হৈছে। কৰ্তৃপক্ষই জনোৱা মতে, বানপানীয়ে ৰাছুৱাগাঢ়ী, চিলিমে, আৰু ত্ৰিশুলি-৩ ‘এ’ জলবিদ্যুৎ কেন্দ্ৰৰ লগতে ত্ৰিশুলি-৩ ‘বি’ হাবত থকা ২২০ কেভি চাবষ্টেচনৰ ক্ষতিসাধন কৰে। ত্ৰিশুলী আৰু দেৱীঘাট জলবিদ্যুৎ কেন্দ্ৰ আৰু বিভিন্ন বিদ্যুৎ বিতৰণ আন্তঃগাঁথনিও ক্ষতিগ্ৰস্ত হৈছে।

হিন্দুস্থান সমাচাৰ / মনোজ কুমাৰ শইকীয়া