গোলাঘাট, ২৬ আগষ্ট (হি.স.)। ৰাখে হৰি মাৰে কোনে ৷ কথমপি প্ৰাণৰক্ষা অটি কণমানি শিশু, দুগৰাকী মহিলাসহ পাঁচজন লোক । বোকাখাত সমজিলাৰ বৰচাপৰি চাহ বাগিচাৰ ৬ নম্বৰ লাইনত অঘটন । বাগিচাৰ শ্ৰমিকৰ ঘৰত বৃহৎ গছ বাগৰি পৰি গুৰুতৰভাৱে আঘাতপ্ৰাপ্ত শিশুসহ পাঁচ জনকৈ লোক । গছ বাগৰি পৰাৰ ফলত নষ্ট হয় ঘৰৰ সকলো সামগ্ৰী ।
বৰচাপৰি চাহ বাগিচাৰ ৬ নং লাইনৰ সুমিত্ৰা সিং নামৰ শ্ৰমিকগৰাকীৰ বাসগৃহত গছ বাগৰি পৰাত মহিলা সহ এটি কনমানি শিশু আবদ্ধ হৈ পৰিছিল ধ্বংসস্তুপৰ মাজত । স্থানীয় শ্ৰমিকৰ তৎপৰতাত তিনিওকে উদ্ধাৰ কৰি বাগিচাৰ চিকিৎসালয়লৈ পঠিয়াই যদিও আঘাত গুৰুতৰ হোৱা বাবে আঘাতপ্ৰাপ্ত কেইজনকে বোকাখাতৰ শ্বহীদ কমলা মিৰি মহকুমা অসামৰিক চিকিৎসালয়লৈ প্ৰেৰণ কৰে বাগিচা কৰ্তৃপক্ষই । আনহাতে উদ্ধাৰৰ সময়ত দুজন স্থানীয় লোক আঘাতপ্ৰাপ্ত প্ৰাপ্ত হোৱাত পাঁচ জনকে বোকাখাত চিকিৎসালয়লৈ প্ৰেৰণ কৰে । আকস্মিক এই ঘটনাই অঞ্চলটোত চাঞ্চল্যৰ সৃষ্টি কৰিছে ।
হিন্দুস্থান সমাচাৰ / প্ৰকাশ ডেকা
