ধেমাজি, ২৫ আগষ্ট (হি.স.)। ধেমাজিত পানীত পৰি কিশোৰ সন্ধানহীন। ধেমাজি জিলাৰ বৰদলনি আৰক্ষী চকীৰ অন্তৰ্গত মাইচা গাৱঁত আজি দুপৰীয়া ৰঙাজান সুঁতিৰ বোৱতী পানীত পৰি এটা ১২ বছৰীয়া কিশোৰ সন্ধানহীন হয়৷ কিশোৰটোৰ নাম সুৰজিত শইকীয়া বুলি জানিবপৰা গৈছে৷ স্থানীয় ৰাইজ আৰু দুৰ্যোগ প্ৰশমন বাহিনীয়ে ৰঙাজান সূঁতিত কিশোৰ জনৰ সন্ধানত অভিযান চলাই আছে যদিও বৰ্তমানলৈ কিশোৰজন উদ্ধাৰ হোৱা নাই৷

স্থানীয় ৰাইজে জনোৱা অনুসৰি বাইচাইকেলেৰে অহা সুৰজিতে কালভাৰ্টৰ দাঁতিত ৰ’বলৈ লোৱাৰ সময়তে কালভাৰ্টৰ পৰা দুৰ্ভাগ্যজনক ভাৱে পিচলি নদীৰ সূঁতিটোত পৰি যোৱাত উক্ত দুৰ্ঘটনাতো সংঘটিত হয়৷

ইফালে সুঁতিটোৰ কাষত কিশোৰ জনৰ বাইচাইকেল খন উদ্ধাৰ হৈছে।

হিন্দুস্থান সমাচাৰ / নিৰ্মলেন্দু