নতুন দিল্লী, ২৫ আগষ্ট (হি.স.)। উত্তৰ প্ৰদেশৰ মুজাফ্ফৰনগৰ আৰু গাজিয়াবাদ আৰু হাৰিয়ানাৰ ফৰিদাবাদৰ ৯টা স্থানত প্ৰৱৰ্তন সঞ্চালকালয়ে (ইডি) সোমবাৰৰ পৰা অভিযান চলাই এতিয়ালৈকে মুঠ ৩.৬ কোটি ₹ নগদ ধন জব্দ কৰিছে । মঙলবাৰে ইডিয়ে জনোৱা মতে, অভিযানৰ পিছত সংস্থাটোৱে সকলো চৌহদ ছীল কৰি দিছে। উদ্ধাৰ হোৱা নগদ ধন আৰু জব্দ কৰা ডিজিটেল প্ৰমাণ পৰীক্ষা কৰি আছে।

ইয়াৰ পূৰ্বে সোমবাৰে সন্ধিয়ালৈকে সংস্থাটোৱে মুজাফ্ফৰনগৰৰ নিউ ৰানা হাউচ আৰু গাজিয়াবাদৰ সুধা ষ্টীলৰ পৰা ১.১ কোটিৰো অধিক নগদ ধন উদ্ধাৰ কৰিছিল। কেইবাটাও ডিজিটেল ডিভাইচ, নথি-পত্ৰ, পঞ্জীয়ন আদিও জব্দ কৰা হৈছে। ইডিয়ে জনোৱা মতে, এতিয়ালৈকে অভিযানত মুঠ ৩.৬ কোটি ₹ নগদ ধন উদ্ধাৰ কৰা হৈছে।

মন কৰিবলগীয়া যে এই গোচৰটো জাম্বুদ্বীপ এক্সপ’ৰ্টছ এণ্ড ইম্প’ৰ্টছ লিমিটেডৰ সৈতে জড়িত, যিয়ে ভুৱা ইনপুট টেক্স ক্ৰেডিট (আইটিচি) সৃষ্টি আৰু পাছ কৰাৰ অভিযোগ উত্থাপন কৰিছে। তদন্তত প্ৰকাশ পাইছে যে কোম্পানীটোৱে কোনো প্ৰকৃত সামগ্ৰীৰ গতিবিধি নোহোৱাকৈ ভুৱা চালান আৰু ই-ৱে বিলৰ জৰিয়তে আইটিচি সৃষ্টি কৰি পাছ কৰিছিল। ইয়াৰ বাবে বিস্তৃত বৃত্তাকাৰ লেনদেন, ধনৰ দ্ৰুত স্তৰবিন্যাস, আৰু নগদ ধন উলিওৱা আদি জড়িত আছিল।

৯.৬৩ কোটি টকাৰ ভুৱা আইটিচি আৰু ১০.২৮ কোটি টকাৰ আইটিচি পাছ হোৱাৰ কথা নিশ্চিত কৰিছে জিএছটিৰ বিষয়াসকলে, যাৰ ফলত চৰকাৰী ৰাজকোষৰ লোকচান হৈছে। ইডিৰ এই অনুসন্ধানৰ লক্ষ্য আছিল অপৰাধৰ পৰা পোৱা ধনৰ সন্ধান উলিওৱা, অন্যান্য হিতাধিকাৰী চিনাক্ত কৰা, নেটৱৰ্কৰ সৈতে জড়িত প্ৰমাণ সংগ্ৰহ কৰা।

ইডিয়ে কয় যে অধিক তদন্ত চলি আছে আৰু নেটৱৰ্কৰ সৈতে জড়িত অন্যান্য হিতাধিকাৰীসকলৰ ওচৰলৈ যাবলৈ নথি-পত্ৰ বিশ্লেষণ কৰা হৈছে।

--------------

হিন্দুস্থান সমাচাৰ / অৰৱিন্দ