হৰিদ্বাৰ, ২৩ আগষ্ট (হি.স.)। ‘এক ৰাষ্ট্ৰ, এক নিৰ্বাচন’ বিষয়ক হৰিদ্বাৰত অনুষ্ঠিত সন্ত সন্মিলনত একেলগে নিৰ্বাচন অনুষ্ঠিত কৰাৰ ধাৰণাক সন্ত আৰু মহাত্মাসকলে সমৰ্থন কৰে।

কেন্দ্ৰীয় মন্ত্ৰী শিৱৰাজ সিং চৌহান, উত্তৰাখণ্ডৰ মুখ্যমন্ত্ৰী পুষ্কৰ সিং ধামী, কেবিনেট মন্ত্ৰী মদন কৌশিকৰ লগতে বিজেপিৰ কেইবাজনো বিধায়ক আৰু জ্যেষ্ঠ নেতাই অংশগ্ৰহণ কৰে। কেন্দ্ৰীয় মন্ত্ৰী শিৱৰাজ সিং চৌহান আৰু মুখ্যমন্ত্ৰী পুষ্কৰ সিং ধামীয়ে সাধু-ঋষিৰ সৈতে ‘এক ৰাষ্ট্ৰ, এক নিৰ্বাচন’ ধাৰণা সম্পৰ্কে বিতংভাৱে আলোচনা কৰি এই বিষয়ত তেওঁলোকৰ পৰামৰ্শ বিচাৰে।

কেন্দ্ৰীয় মন্ত্ৰী শিৱৰাজ সিং চৌহান, মুখ্যমন্ত্ৰী পুষ্কৰ সিং ধামী, আৰু সন্ত সমাজৰ প্ৰতিনিধিয়ে উদ্বোধন কৰে। অখিল ভাৰতীয় আখৰা পৰিষদৰ সভাপতি শ্ৰী মহন্ত ৰবীন্দ্ৰপুৰী মহাৰাজ, নিৰ্মল আখৰাৰ সভাপতি জ্ঞানদেৱ মহাৰাজ, কল্কী পীঠাধীশ্বৰ আচাৰ্য প্ৰমোদ কৃষ্ণম, অখিল ভাৰতীয় আখৰাৰ মুখপাত্ৰ কৰৌলি শংকৰ মহাৰাজ, দাতি মহাৰাজ, সাধ্বী প্ৰাচী, মহামণ্ডলেশ্বৰ ৰূপেন্দ্ৰ প্ৰকাশ মহাৰাজ, শ্ৰী মহন্ত জগতাৰ মুনি, স্বামী হৰিচেতনানন্দ, আৰু মহামণ্ডলেশ্বৰ স্বামী যতীন্দ্ৰনন্দ গিৰিকে ধৰি বহু সংখ্যক সাধু-ঋষি উপস্থিত থাকে ।

সন্তসকলৰ সমৰ্থন প্ৰকাশ

অখিল ভাৰতীয় আখৰা পৰিষদৰ সভাপতি তথা মহানিৰ্বাণী আখৰাৰ সম্পাদক শ্ৰী মহন্ত ৰবীন্দ্ৰপুৰী মহাৰাজেও এক ৰাষ্ট্ৰ, এক নিৰ্বাচনক সমৰ্থন কৰে। তেওঁ উল্লেখ কৰে যে ভাৰতৰ স্বাধীনতাৰ পিছৰ প্ৰথম দশকবোৰত একেলগে লোকসভা আৰু ৰাজ্যিক বিধানসভা নিৰ্বাচন অনুষ্ঠিত কৰাৰ ব্যৱস্থা আছিল। পিছলৈ বিভিন্ন পৰিস্থিতিৰ বাবে ৰাজ্যিক বিধানসভাৰ নিৰ্বাচনৰ কাৰ্যকাল আৰু ক্ৰম বেলেগ হ’ল।

তেওঁ উল্লেখ কৰে যে সময়ৰ লগে লগে দেশত পৃথক পৃথক নিৰ্বাচনৰ সংখ্যা বৃদ্ধি পাইছে। গতিকে সাম্প্ৰতিক পৰিস্থিতিৰ প্ৰতি লক্ষ্য ৰাখি একেলগে নিৰ্বাচন অনুষ্ঠিত কৰাৰ ব্যৱস্থাৰ কথা চিন্তা কৰা হৈছে। তেওঁ উল্লেখ কৰে যে আখৰা পৰিষদ আৰু সন্ত সমাজ এই বিষয়ত চৰকাৰৰ সৈতে থিয় দিছে।

শ্ৰী মহন্ত ৰবীন্দ্ৰপুৰী মহাৰাজে কয় যে নিৰ্বাচন গণতন্ত্ৰৰ এক মৌলিক প্ৰক্ৰিয়া, কিন্তু নিৰ্বাচনৰ অবিৰত প্ৰক্ৰিয়াই প্ৰশাসনিক ব্যৱস্থাতো হেঁচা প্ৰয়োগ কৰে। যদিহে নিৰ্বাচনৰ সংখ্যা হ্ৰাস কৰা হয় তেন্তে চৰকাৰী সম্পদৰ উন্নত ব্যৱহাৰ কৰিব পৰা যাব।

তেওঁ উল্লেখ কৰে যে সন্ত সমাজৰ উদ্দেশ্য কোনো ৰাজনৈতিক দলক প্ৰচাৰ কৰা নহয়, বৰঞ্চ জাতীয় স্বাৰ্থৰ সৈতে জড়িত বিষয়সমূহৰ ওপৰত জনসাধাৰণৰ মাজত সজাগতা সৃষ্টি কৰা। এক ৰাষ্ট্ৰ, এক নিৰ্বাচন সন্দৰ্ভতো চৰকাৰৰ আগত নিজৰ মতামত আৰু পৰামৰ্শ আগবঢ়াইছে সন্ত সমাজে।

কার্যসূচীৰ সময়ত সন্ত সমাজে এক ৰাষ্ট্ৰ, এক নির্বাচন সন্দর্ভত মতামত প্রকাশ কৰাৰ লগতে এই লক্ষ্যত চৰকাৰৰ প্রচেষ্টা সন্দর্ভত আলোচনা কৰে ৷ কেন্দ্ৰীয় মন্ত্ৰী শিৱৰাজ সিং চৌহান আৰু মুখ্যমন্ত্ৰী পুষ্কৰ সিং ধামীয়ে সন্ত সমাজৰ কথা শুনি এই বিষয়ত তেওঁলোকৰ পৰামৰ্শৰ প্ৰশংসা কৰে।

বাৰম্বাৰ নিৰ্বাচনে উন্নয়নত প্ৰভাৱ পেলায়ঃ ৰামদেৱ

যোগগুৰু স্বামী ৰামদেৱে এক ৰাষ্ট্ৰ, এক নিৰ্বাচনৰ সমৰ্থনত কেইবাটাও গুৰুত্বপূৰ্ণ যুক্তি আগবঢ়ায়। তেওঁ কয় যে ভাৰতত বছৰটোৰ ভিতৰতে নিৰ্বাচন অনুষ্ঠিত হয়। নিৰ্বাচনী প্ৰক্ৰিয়াৰ বাবে চৰকাৰী যন্ত্ৰই নিৰ্বাচনী কৰ্তব্যত যথেষ্ট সময় খৰচ কৰে, যিয়ে উন্নয়ন পৰিকল্পনাৰ লগতে শিক্ষা ব্যৱস্থাতো প্ৰভাৱ পেলায়।

স্বামী ৰামদেৱে কয় যে শিক্ষক আৰু অধ্যাপকসকলৰ এক উল্লেখযোগ্য অংশও নিৰ্বাচনী কৰ্তব্যত নিয়োজিত। তেওঁৰ মতে, যদি দেশজুৰি একেলগে নিৰ্বাচন অনুষ্ঠিত হয়, তেন্তে শিক্ষকৰ সময় মুকলি হ’ব আৰু তেওঁলোকে ছাত্ৰ-ছাত্ৰীক ভালদৰে শিক্ষাদান কৰাত মনোনিৱেশ কৰিবলৈ সক্ষম হ’ব। তেওঁ লগতে কয় যে নিৰন্তৰ নিৰ্বাচনী প্ৰক্ৰিয়া হ্ৰাস কৰিলে শিক্ষা ব্যৱস্থা, অৰ্থনীতি, কৃষি, স্বাস্থ্য ব্যৱস্থাৰ উন্নতি ত্বৰান্বিত হ’ব পাৰে।

তেওঁ কয় যে নিৰ্বাচন গণতন্ত্ৰৰ এক গুৰুত্বপূৰ্ণ প্ৰক্ৰিয়া, কিন্তু ইয়াৰ দ্বাৰা দেশৰ উন্নয়নৰ গতিত বাধা আহিব নালাগে। তেওঁৰ মতে, দেশত সঘনাই হোৱা নিৰ্বাচনে ৰাজনৈতিক দলসমূহক নিৰ্বাচনী কাম-কাজত অহৰহ ব্যস্ত কৰি ৰাখে, আৰু আচৰণ বিধিৰ বাবে চৰকাৰসমূহে উন্নয়নমূলক কাম-কাজ চলোৱাত প্ৰায়ে ব্যৱহাৰিক অসুবিধাৰ সন্মুখীন হয়।

ৰাজনৈতিক স্বাৰ্থতকৈ জাতীয় স্বাৰ্থ বেছি গুৰুত্বপূৰ্ণ

স্বামী ৰামদেৱে কয় যে এক ৰাষ্ট্ৰ, এক নিৰ্বাচন সন্দৰ্ভত ৰাজনৈতিক মতানৈক্য থাকিব পাৰে যদিও ৰাজনৈতিক স্বাৰ্থতকৈ জাতীয় স্বাৰ্থক অগ্ৰাধিকাৰ দিব লাগিব। তেওঁ উল্লেখ কৰে যে দেশৰ ভোটাৰসকল বুদ্ধিমান আৰু কোনটো দল আৰু কোনজন প্ৰাৰ্থীক বাছি ল’ব সেই কথা জানে। কেৱল ৰাজনৈতিক লাভ-লোকচানৰ বাবে নিৰ্বাচনী সংস্কাৰৰ বিৰোধিতা কৰা উচিত নহয় বুলি তেওঁ গুৰুত্ব আৰোপ কৰে। গণতন্ত্ৰত চূড়ান্ত সিদ্ধান্ত জনসাধাৰণৰ ওপৰত নিৰ্ভৰশীল, যিয়ে নিজৰ প্ৰতিনিধি নিৰ্বাচন কৰে। তেওঁ কয় যে দেশখনক দ্ৰুতগতিত উন্নয়নৰ পথত আগুৱাই নিবলৈ ব্যৱস্থাগত সংস্কাৰ অতি প্ৰয়োজনীয়।

ৰামদেৱে উল্লেখ কৰে যে প্ৰধানমন্ত্ৰী হ’বলৈ নিৰ্বাচনত প্ৰতিদ্বন্দ্বিতা কৰিব লাগিব যদিও প্ৰধানমন্ত্ৰী নিৰ্বাচনৰ ক্ষমতা দেশৰ ভোটাৰৰ ওপৰত নিহিত হৈ আছে। গতিকে নিৰ্বাচনী ব্যৱস্থাত জনসাধাৰণৰ ভূমিকা আৰু গণতান্ত্ৰিক প্ৰক্ৰিয়া দুয়োটাকে গুৰুত্বপূৰ্ণ বুলি বিবেচনা কৰা উচিত।

সন্ন্যাসীক গালি-গালাজ কৰাটো ফেশ্বনেবল হৈ পৰিছে

সাধু সমাজৰ সৈতে জড়িত বিষয় এটাৰ ওপৰত ভাষণ দি স্বামী ৰামদেৱে কয় যে আজিকালি সন্যাসীসকলক গালি-গালাজ কৰাটো এক প্ৰকাৰৰ ফেশ্বন হৈ পৰিছে। তেওঁ জোৰ দি কয় যে সমাজত বৈষম্যৰ প্ৰাচীৰ সৃষ্টিৰ প্ৰয়াস কৰা উচিত নহয়।

তেওঁ উল্লেখ কৰে যে ভাৰতৰ সাংস্কৃতিক আৰু আধ্যাত্মিক পৰম্পৰা বুজিবলৈ ভাৰতীয় সংস্কৃতি আৰু শাস্ত্ৰৰ সঠিক অধ্যয়ন অতি প্ৰয়োজনীয়। বন্দে মাতৰমক লৈ চলি থকা বিতৰ্কৰ কথাও উল্লেখ কৰি তেওঁ কয় যে ইয়াৰ সঠিক প্ৰেক্ষাপটত বুজিব লাগিব।

তেওঁ কয় যে ভাৰতৰ সাংস্কৃতিক পৰম্পৰাত মাতৃভূমিক মাতৃ হিচাপে সন্মান জনোৱাৰ এক পৰম্পৰা আছে। সেয়েহে ধৰ্মীয় আৰু সাংস্কৃতিক প্ৰতীকবোৰ ৰাজনৈতিক বিতৰ্কৰ বিষয় হোৱাৰ পৰিৱৰ্তে তেওঁলোকৰ ঐতিহাসিক আৰু সাংস্কৃতিক প্ৰেক্ষাপটত বুজি পোৱা উচিত।

দূৰ-দূৰণিৰ সাধু-সন্তসকলৰ মতামত প্ৰচাৰৰ ওপৰত গুৰুত্ব দিয়া

বৈঠকত এইটোও কোৱা হৈছিল যে দেশত নিৰ্বাচনী ব্যৱস্থাৰ যিকোনো ডাঙৰ পৰিৱৰ্তনৰ বাবে ব্যাপক ৰাজহুৱা পৰামৰ্শৰ প্ৰয়োজন। সন্ত সমাজে কয় যে যদি এক ৰাষ্ট্ৰ, এক নিৰ্বাচন ৰূপায়ণ কৰিব লাগে, তেন্তে ইয়াৰ প্ৰভাৱ, সাংবিধানিক দিশ আৰু ব্যৱহাৰিক প্ৰত্যাহ্বানসমূহৰ বিষয়েও সমগ্ৰ দেশতে আলোচনা কৰা উচিত।

সাধুসকলে কয় যে ভাৰতৰ দৰে বৃহৎ গণতান্ত্ৰিক দেশত নিৰ্বাচনৰ প্ৰক্ৰিয়া ব্যাপক। এনে পৰিস্থিতিত যিকোনো সংস্কাৰ কাৰ্যকৰী কৰাৰ আগতে সকলো পক্ষৰ মতামত লোৱা আৰু সাংবিধানিক ব্যৱস্থাৰ সৈতে সংগতি ৰাখি আগবাঢ়ি যোৱাটো প্ৰয়োজনীয়। ইয়াৰ পূৰ্বে প্ৰদীপ জ্বলোৱাৰ জৰিয়তে কাৰ্যসূচী আৰম্ভ হয়।

----

হিন্দুস্থান সমাচাৰ / মনোজ কুমাৰ শইকীয়া