কোকৰাঝাৰ, ২৩ আগষ্ট (হি.স.): মানৱ সৰবৰাহ, ড্ৰাগছ সৰবৰাহ তথা অন্যান্য অসামাজিক কাৰ্যকলাপৰ বিৰুদ্ধে চলোৱা তালাচী আৰু নিৰীক্ষণ অভিযানৰ সময়ত কোকৰাঝাৰ ৰে'ল ষ্টেচনৰ পৰা নিৰাপত্তা বাহিনীয়ে পাঁচগৰাকী নাবালক-নাবালিকাক উদ্ধাৰ কৰে। উদ্ধাৰ হোৱা পাঁচগৰাকীৰ ভিতৰত তিনিজন নাবালক ল'ৰা আৰু দুগৰাকী নাবালিকা ছোৱালী।
এছ এছ বিৰ ৬ নম্বৰ বেটেলিয়ন, ৰাণীঘুলি (ইণ্টেলিজেন্স ছেটআপ)-ৰ উদ্যোগত আৰু কোকৰাঝাৰ আৰপিএফৰ তত্বাৱধানত আৰপিএফ/এছআইবি, আলিপুৰদুৱাৰৰ কৰ্মচাৰীৰ সহযোগত এই অভিযান চলোৱা হয়।
জানিব পৰা মতে, ২২ আগষ্টৰ বিয়লি প্ৰায় ৩ বজাৰ পৰা কোকৰাঝাৰ ৰে'ল ষ্টেচনত তালাচী অভিযান চলি আছিল। অভিযানৰ সময়ত প্ৰায় ৪:৩০ বজাত ষ্টেচনৰ ১ নম্বৰ প্লেটফৰ্মত তিনিজন নাবালক ল'ৰা আৰু দুগৰাকী নাবালিকা ছোৱালীক সন্দেহজনকভাৱে ঘূৰি ফুৰা অৱস্থাত দেখা পোৱা যায়। সন্দেহবশতঃ তেওঁলোকক আটক কৰি সোধা-পোছা কৰাত কোনো ৰে'ল টিকট দেখুৱাব নোৱাৰাৰ লগতে যাত্ৰাৰ সন্দৰ্ভতো সন্তোষজনক উত্তৰ দিব নোৱাৰিলে।
পৰৱৰ্তী সময়ত সৌহাৰ্দ্যপূৰ্ণভাৱে সোধা-পোছা কৰাত নাবালক-নাবালিকাসকলে জানিবলৈ দিয়ে যে তেওঁলোকে অভিভাৱকক কোনো ধৰণৰ খবৰ নিদিয়াকৈ নিজ নিজ ঘৰৰ পৰা ওলাই আহিছিল। অভিযোগ অনুসৰি, অসমৰ বাক্সা জিলাৰ কোনো এজন অজ্ঞাত ব্যক্তিয়ে তেওঁলোকক ব্যক্তিগত চাকৰিৰ প্ৰলোভন দেখুৱাইছিল। সেই প্ৰলোভনত পৰি তেওঁলোকে চাকৰিৰ সন্ধানত গুজৰাটলৈ যাবলৈ ওলাই আহিছিল আৰু নাহৰলাগুন - হাপা বিশেষ ভাড়া বিশেষ ৰে’ল (ট্ৰেইন নং ০৯৫২৬) যোগে যাত্ৰা কৰাৰ পৰিকল্পনা কৰিছিল।
ইয়াৰ পিছতে নাবালক-নাবালিকাসকলক সুৰক্ষিতভাৱে আৰপিএফ পোষ্টলৈ লৈ যোৱা হয়। তেওঁলোকে দিয়া অভিভাৱকৰ মোবাইল নম্বৰত যোগাযোগ কৰাত জানিব পৰা যায় যে পাঁচগৰাকী নাবালক-নাবালিকাই ২২ আগষ্টৰ পুৱাৰে পৰা নিজ নিজ ঘৰৰ পৰা নিৰুদ্দেশ হৈ আছিল। আটাইকেইগৰাকী নাবালক-নাবালিকা বাক্সা জিলাৰ বাসিন্দা বুলি জানিব পৰা গৈছে।
উদ্ধাৰ হোৱা পাঁচগৰাকীৰ চিকিৎসা পৰীক্ষা কোকৰাঝাৰৰ আৰএনবি অসামৰিক চিকিৎসালয়ত সম্পন্ন কৰা হয়। ইয়াৰ পিছত চাইল্ড হেল্পলাইন, কোকৰাঝাৰৰ প্ৰজেক্ট ক'অৰ্ডিনেটৰৰ জৰিয়তে তিনিজন নাবালক ল'ৰাক কোকৰাঝাৰৰ গুৱান চিলড্ৰেন হোম আৰু দুগৰাকী নাবালিকা ছোৱালীক চাইল্ড ডেষ্টিনেচন হোম, চন্দ্ৰপাৰাত পৰৱৰ্তী আইনী প্ৰক্ৰিয়াৰ বাবে হস্তান্তৰ কৰা হয়।
ঘটনা সন্দৰ্ভত কোকৰাঝাৰ জিআৰপি/পিপিত জিডিই নম্বৰ ২৫, ২২ আগষ্ট ২০২৬ তাৰিখে পঞ্জীয়ন কৰা হৈছে। ঘটনাটোৰ সন্দৰ্ভত অধিক তদন্ত আৰু প্ৰয়োজনীয় আইনী ব্যৱস্থা গ্ৰহণ কৰি থকা হৈছে।
হিন্দুস্থান সমাচাৰ / কিশোৰ মিশ্ৰ
