কলকাতা, ২২ আগষ্ট (হি.স.)। বন্দে মাতৰমক লৈ কংগ্ৰেছ আৰু বিজেপিৰ মাজত চলি থকা ৰাজনৈতিক কাজিয়াৰ মাজতে পশ্চিমবংগ বিজেপিৰ সভাপতি শমিক ভট্টাচাৰ্যই অভিনেত্ৰী শৰ্মিলা ঠাকুৰৰ ওপৰত তীব্ৰ আক্ৰমণ চলাইছে। শেহতীয়াকৈ শৰ্মিলা ঠাকুৰে কয় যে ধৰ্মীয়ভাৱে বৈচিত্ৰময় দেশ এখনত বন্দে মাতৰম সম্পূৰ্ণ গীতটোৱে হয়তো কিছুমান সম্প্ৰদায়ক আঘাত দিব পাৰে। এই মন্তব্যক লৈ বিজেপিয়ে তীব্ৰ প্ৰতিক্ৰিয়া প্ৰকাশ কৰিছে।

শনিবাৰে সংবাদ মাধ্যমৰ আগত শমিক ভট্টাচাৰ্যই কয় যে শৰ্মিলা ঠাকুৰে ব্যক্তিগত মতামত প্ৰকাশ কৰিবলৈ স্বাধীন, কিন্তু তেওঁ ইতিহাস আৰু পৰিয়ালৰ প্ৰেক্ষাপটতো কথা ক’ব লাগে। তেওঁ কয়, ভাৰতীয় জনতা পাৰ্টিয়েও শৰ্মিলা ঠাকুৰক সোঁৱৰাই দিব বিচাৰিছে যে টাইমূৰে ভাৰত আক্ৰমণ, মন্দিৰ ধ্বংস, মানুহ হত্যা, মানুহক বলপূৰ্বকভাৱে ধৰ্মান্তৰিত কৰিবলৈ যি নাম ব্যৱহাৰ কৰিছিল, সেই নামটোও নিজৰ পৰিয়ালৰ নাম। তেওঁৰ নাতিৰ নাম টাইমুৰ আলী খান। গতিকে বন্দে মাতৰম যিমান কম গাব সিমানেই ভাল হ'ব।

সঁচাকৈয়ে বন্দে মাতৰমৰ সমগ্ৰ গীতটোক লৈ বিজেপি আৰু কংগ্ৰেছৰ মাজত বিবাদৰ সৃষ্টি হৈছে। বিজেপিৰ যুক্তি যে কেৱল প্ৰথম দুটা স্তৱকত সীমাবদ্ধ নাথাকি সমগ্ৰ গীতটো গোৱা উচিত। এই বিষয়ত নতুন আইন প্ৰণয়নৰো আহ্বান জনাইছে দলটোৱে।

শৰ্মিলা ঠাকুৰে উল্লেখ কৰিছিল যে দেশত একশ্বৰবাদত বিশ্বাসী আৰু দেৱ-দেৱী পূজা নকৰা লোক আছে। তেওঁৰ মতে গীতটোৰ কিছুমান শাৰী এনে লোকৰ বাবে অস্বস্তিকৰ হ’ব পাৰে। গীতটোৰ প্ৰথম দুটা স্তৱকত মাতৃভূমিৰ প্ৰতি সন্মান আৰু প্ৰেমৰ অনুভৱ প্ৰকাশ কৰা হৈছে আৰু ইয়াক বহুলভাৱে গ্ৰহণ কৰিব পৰা যায় বুলি তেওঁ উল্লেখ কৰিছিল।

শৰ্মিলাৰ এই বক্তব্যৰ পিছতে ধাৰাবাহিকভাৱে প্ৰতিক্ৰিয়া প্ৰকাশ কৰি আহিছে বিজেপি নেতাসকলে। ইয়াৰ পূৰ্বে অভিনেত্ৰী তথা বিজেপিৰ সাংসদ কংগনা ৰানাৱটেও তেওঁৰ বক্তব্যক সমালোচনা কৰে। এতিয়া শমিক ভট্টাচাৰ্যৰ মন্তব্যই এই ৰাজনৈতিক বিতৰ্ক আৰু অধিক তীব্ৰতৰ কৰি তুলিছে।

শৰ্মিলা ঠাকুৰৰ নাতি টাইমুৰ আলী খানৰ নাম বিগত সময়ত কেইবাবাৰো বিতৰ্কিত হৈছিল। ছৈফ আলী খান আৰু কৰীনা কাপুৰৰ জ্যেষ্ঠ পুত্ৰৰ জন্মৰ পিছত ছ’চিয়েল মিডিয়াত তেওঁৰ নামক লৈ যথেষ্ট বিতৰ্কৰ সৃষ্টি হয়। অৱশ্যে কৰীনা কাপুৰে ‘টাইমুৰ’ মানে ‘লোহা’ বুলি উল্লেখ কৰি পুত্ৰৰ নাম শক্তি আৰু অধ্যৱসায়ৰ প্ৰতীক হিচাপে ৰাখিছিল। এতিয়া ‘বন্দে মাতৰম’ বিতৰ্কৰ মাজতে শমিক ভট্টাচাৰ্যই এই যুগ যুগ ধৰি চলি অহা এই নাম বিতৰ্কক পুনৰ জগাই তুলিছে।

হিন্দুস্থান সমাচাৰ / মনোজ কুমাৰ শইকীয়া