ৰামগড়, ২২ আগষ্ট (হি.স.)। ঝাৰখণ্ডৰ ৰামগড় জিলাৰ বৰকাকানা অ’ পি এলেকাৰ হেহালত অৱস্থিত চিমেণ্ট আৰু তীখা শক্তি কেন্দ্ৰত শুকুৰবাৰে গভীৰ নিশা সংঘটিত হয় এক বৃহৎ বিস্ফোৰণ । এই দুৰ্ঘটনাত তিনিজন অভিযন্তা নিহত হোৱাৰ বিপৰীতে এজন গুৰুতৰভাৱে আহত হয়। এই ঘটনাই কাৰখানা চৌহদত বিশৃংখলতাৰ সৃষ্টি কৰে। বৰকাকানা থানাৰ বিষয়া উমাশংকৰ ভাৰ্মা ঘটনাস্থলীত উপস্থিত হৈ উদ্ধাৰ আৰু সাহায্য অভিযান আৰম্ভ কৰে।

প্ৰাথমিক তথ্য অনুসৰি বিদ্যুৎ কেন্দ্ৰটোৰ ব্যৱস্থাসমূহ অতি উষ্ণতাৰ ফলত প্ৰভাৱিত হোৱাৰ ফলত সুৰক্ষা ব্যৱস্থাটো বিকল হৈ পৰে। ইয়াৰ ফলত টাৰ্বাইনৰ গতিবেগ অতিমাত্ৰা হৈছিল, যাৰ ফলত এক বৃহৎ বিস্ফোৰণ ঘটিছিল।

আৰক্ষীয়ে জনোৱা মতে, বোকাৰোৰ জাগেশ্বৰ বিহাৰ নিবাসী বিনীত মাহাটো, ধনবাদৰ সঞ্জীৱ কেছাৰী আৰু গড়হৱাৰ নগৰ উটাৰীৰ অভিষেক পাণ্ডেৰ থিতাতে মৃত্যু হয়। গুৰুতৰভাৱে আহত হাজৰিবাগ জিলাৰ নিবাসী তৰুণ ৰাৱানী।

দুৰ্ঘটনাৰ পিছতে প্লাণ্টটোৰ কৰ্মচাৰী অমিত কুমাৰে মেনেজমেণ্টৰ কাম-কাজক লৈ প্ৰশ্ন উত্থাপন কৰে। তেওঁ অভিযোগ কৰে যে বিদ্যুৎ কেন্দ্ৰটোৰ নিয়ন্ত্ৰণ কক্ষত ইতিমধ্যে উচ্চ উষ্ণতাৰ ইংগিত পোৱা গৈছে। এচিৰ বিজুতিৰ বাবে কাম কৰাটো কঠিন হৈ পৰিছিল। কৰ্মচাৰীসকলে বাৰে বাৰে পৰিচালনা সমিতিক এই বিষয়ে অৱগত কৰিছিল যদিও কোনো ব্যৱস্থা লোৱা নহ’ল, শীতল ব্যৱস্থাও মেৰামতি কৰা নহ’ল।

ইফালে শনিবাৰে এই দুৰ্ঘটনাক লৈ ক্ষুব্ধ লোকসকলে ৰামগড় পাত্ৰটু পথ অৱৰোধ কৰে। সম্প্ৰতি ক্ষুব্ধ লোকসকলৰ সৈতে ক্ষতিপূৰণ সন্দৰ্ভত আলোচনা অব্যাহত ৰাখিছে আৰক্ষী আৰু পৰিচালনা সমিতিয়ে।

-----------------

হিন্দুস্থান সমাচাৰ / অৰৱিন্দ