টৰন্টো, ২০ আগষ্ট (হি.স.)। কানাডাৰ পুৰুষ ক্ৰিকেট দলে এতিয়া নতুন মুখ্য প্ৰশিক্ষকৰ সন্ধানত নামি পৰিছে। মুখ্য প্ৰশিক্ষক মণ্টী দেশাই পদৰ পৰা পদত্যাগ কৰিছে। দেশাই মে’ মাহত দ্বিতীয়বাৰৰ বাবে কানাডাৰ দলত যোগদান কৰে আৰু তেওঁৰ কাৰ্যকালত দলটোৱে দুখন আইচিচি পুৰুষ ক্ৰিকেট বিশ্বকাপ লীগ ২ ট্ৰাই ছিৰিজত অংশগ্ৰহণ কৰে: এটা কানাডাত আৰু আনখন স্কটলেণ্ডত।
দেশাইৰ বিদায়ৰ সময়ত কানাডাৰ বিশ্বকাপ লীগ ২ অভিযানত চাৰিখন খেল বাকী আছে। শীৰ্ষ চাৰিটা স্থানৰ পৰা ৬ পইণ্ট পিছ পৰি থকা দলটোৱে আইচিচি পুৰুষ ক্ৰিকেট বিশ্বকাপ কোৱালিফায়াৰ প্লে অফলৈ অৱনমিত হোৱাৰ ভাবুকিৰ সন্মুখীন হৈছে। এই পুনৰ অৰ্হতা প্ৰতিযোগিতাত আই চি চি পুৰুষ ক্ৰিকেট বিশ্বকাপ ২০২৭ৰ কোৱালিফায়াৰৰ বাবে চাৰিটা স্থান নিৰ্ধাৰণ কৰা হ’ব।
কানাডাৰ সৈতে দেশাইৰ এইটোৱেই আছিল দ্বিতীয়বাৰৰ বাবে। ইয়াৰ পূৰ্বে ২০১৯ চনত নামিবিয়াত অনুষ্ঠিত হোৱা বিশ্ব ক্ৰিকেট লীগ ২ অভিযানৰ সময়ত তেওঁ দলটোৰ প্ৰশিক্ষক হিচাপে কাম কৰিছিল।
পদত্যাগ কৰাৰ পিছত দেশাইয়ে ছ’চিয়েল মিডিয়াত কয়, এয়া আছিল এটা চুটি অধ্যায়, কিন্তু মোৰ বাবে অতি গুৰুত্বপূৰ্ণ। প্ৰতিটো পৰিৱেশে আপোনাক নতুন কিবা এটা শিকাই। এই অভিজ্ঞতাই মোৰ বিশ্বাসক আৰু অধিক শক্তিশালী কৰি তুলিলে যে স্থায়ী সফলতা সময়, বিশ্বাস, প্ৰস্তুতি, শক্তিশালী সম্পৰ্ক, আৰু সামূহিক দায়বদ্ধতাৰ ওপৰত গঢ় লৈ উঠে।
তেওঁ খেলুৱৈ, সহায়ক কৰ্মচাৰী, আৰু এই যাত্ৰাত তেওঁৰ লগত যোৱা প্ৰতিজন ব্যক্তিৰ প্ৰতি কৃতজ্ঞতা প্ৰকাশ কৰি কয় যে, মই গঢ়ি তোলা সম্পৰ্ক, মই শিকি অহা শিক্ষা, আৰু অৰিহণা যোগোৱাৰ সুযোগৰ বাবে মই কৃতজ্ঞ।
মন্টি দেশাইৰ ২০ বছৰৰো অধিক প্ৰশিক্ষকৰ অভিজ্ঞতা আছে। তেওঁ সংযুক্ত আৰব আমিৰশ্বাহী, আফগানিস্তান, নেপালৰ দৰে দলৰ সৈতে কাম কৰিছে। নেপালৰ সৈতে থকা সময়ছোৱাত দলটোৱে ক্ৰিকেট বিশ্বকাপ লীগ ২ত ব্যতিক্ৰমীভাৱে ভাল প্ৰদৰ্শন আগবঢ়াইছিল।২০২৪ চনত আমেৰিকা আৰু ৱেষ্ট ইণ্ডিজত অনুষ্ঠিত হোৱা টি-২০ বিশ্বকাপত খেলা নেপাল দলৰ সৈতেও তেওঁ জড়িত আছিল।
-----------------
হিন্দুস্থান সমাচাৰ / অৰৱিন্দ
