ধুবুৰী, ১৫ আগষ্ট (হি.স.)। বিলাসীপাৰাৰ সাপটগ্ৰামত সংঘটিত শোকাৱহ নাওঁ দুৰ্ঘটনাত সন্ধানহীন ছাত্ৰীৰ মৃতদেহ উদ্ধাৰ । সাপটগ্ৰাম বালাপাৰা সংযোগী নদী পথৰ টিপকাই নৈত শুকুৰবাৰে সংঘটিত হৈছিল নাওঁ দুৰ্ঘটনা । নৈ খনত যন্ত্ৰ চালিত যাত্ৰীবাহী নাও এখন দুৰ্ঘটনাগ্ৰস্ত হৈ সন্ধানহীন হৈ পৰিছিল ৫ ছাত্ৰ ছাত্ৰী । ৪ গৰাকী ছাত্ৰ ছাত্ৰীক স্থানীয় ৰাইজে অভিযান চলাই জীৱন্তে উদ্ধাৰ কৰিবলৈ সক্ষম হৈছিল ।
মুছকুৰা ৰহমান নামৰ নৱম শ্ৰেণীৰ ছাত্ৰী গৰাকী সন্ধানহীন হৈ পৰিছিল নৈ খনৰ সোঁতত । স্থানীয় আৰক্ষী আৰু এছডিআৰএফ বাহিনীয়ে শুকুৰবাৰৰ পৰা উদ্ধাৰ অভিযান চলাই ব্যাৰ্থ হৈছিল । আজি স্থানীয় ৰাইজে অভিযান চলাই সাপটগ্ৰাম ভেলাকোবা ঘাটত ছাত্ৰী গৰাকীৰ মৃতদেহ উদ্ধাৰ কৰিবলৈ সক্ষম হয় ।
আনহাতে ৰাইজে শুকুৰবাৰে জীৱন্তে উদ্ধাৰ কৰা ৪ ছাত্ৰ ছাত্ৰী কোকৰাঝাৰ চিকিৎসা মহাবিদ্যালয়ত চিকিৎসাধীন হৈ আছে । আজি ৰাইজে মৃত অৱস্থাত উদ্ধাৰ কৰা নৱম শ্ৰেণীৰ ছাত্ৰী গৰাকী বালাপাৰা গাঁৱৰ বুলি জানিব পৰা গৈছে । সাপটগ্ৰাম এমাল গেমেটেড হাইস্কুলৰ ছাত্ৰী মুছকুৰা ৰহমান বিদ্যালয় ছুটীৰ পিছত ঘৰলৈ গৈ থকা অৱস্থাত এই দুৰ্ঘটনা সংঘটিত হয় । পথ আৰু দলঙ নথকাৰ বাবে নিতৌ যন্ত্ৰচালিত আৰু টুলুঙা নাৱৰে ছাত্ৰ ছাত্ৰীৰ লগতে পথচাৰী এইদৰে পাৰাপাৰ হয় নৈ খন । এই ঘটনাই সমগ্ৰ অঞ্চলটোতে গভীৰ শোকৰ ছাঁ পেলাইছে ।
হিন্দুস্থান সমাচাৰ / প্ৰকাশ ডেকা
