নতুন দিল্লী, ১৪ আগষ্ট (হি.স.)। ইন্ধন, বিদ্যুৎ, খাদ্য সামগ্ৰীৰ মূল্য কম হোৱাৰ মাজতে জুলাই মাহত পাইকাৰী মুদ্ৰাস্ফীতি সামান্যভাৱে হ্ৰাস পাই ৯.৭৮ শতাংশ হৈছে, জুন মাহত ৯.৮৭ শতাংশ আছিল। একেৰাহে তৃতীয় মাহ ধৰি পাইকাৰী মুদ্ৰাস্ফীতিৰ হাৰ ৯ শতাংশৰ ওপৰত আছে।
বাণিজ্য আৰু উদ্যোগ মন্ত্ৰালয়ে মাহেকীয়া তথ্য প্ৰকাশত উল্লেখ কৰিছে যে খনিজ তেল (পেট্ৰলিয়াম সামগ্ৰীকে ধৰি), খাদ্য সামগ্ৰী, মৌলিক ধাতু, অখাদ্য সামগ্ৰী নিৰ্মাণ, খাদ্য সামগ্ৰী নিৰ্মাণ, ৰাসায়নিক পদাৰ্থ আৰু ৰাসায়নিক সামগ্ৰী নিৰ্মাণ আদিয়েই হৈছে জুলাই মাহত পাইকাৰী মুদ্ৰাস্ফীতিৰ মূল চালক। তথ্য অনুসৰি ইন্ধন আৰু বিদ্যুৎ খণ্ডত পাইকাৰী মুদ্ৰাস্ফীতি জুন মাহত ২৭.৪১ শতাংশৰ পৰা জুলাই মাহত ২০.০৫ শতাংশলৈ হ্ৰাস পাইছে। খাদ্যৰ মুদ্ৰাস্ফীতিও জুলাই মাহত ৫.৪৪ শতাংশলৈ হ্ৰাস পোৱাৰ বিপৰীতে জুন মাহত ৫.৪৯ শতাংশ আছিল। কিন্তু জুলাই মাহত নিৰ্মিত সামগ্ৰীৰ মুদ্ৰাস্ফীতি ৮.২৯ শতাংশলৈ বৃদ্ধি পাইছে, যিটো জুন মাহত ৭.৪৮ শতাংশ আছিল।
নতুন ভিত্তি বৰ্ষ ২০২২-২৩ৰ ভিত্তিত বাণিজ্য আৰু উদ্যোগ মন্ত্ৰালয়ৰ পাইকাৰী মূল্য সূচকাংক (ডব্লিউপিআই)ৰ তথ্যত প্ৰথমবাৰৰ বাবে মাহেকীয়াকৈ মুদ্ৰাস্ফীতি হ্ৰাস পোৱা গৈছে। মন্ত্ৰালয়ৰ মতে, পশ্চিম এছিয়াৰ সংকট আৰু তাৰ ফলত হৰমুজ জলদ্বীপত অৱৰোধৰ ফলত বিশ্বজুৰি খাৰুৱা তেল আৰু সাৰৰ ব্যয় বৃদ্ধি পাইছে, যাৰ ফলত খাদ্যৰ মূল্যতো প্ৰভাৱ পৰিছিল।
চলিত সপ্তাহৰ আৰম্ভণিতে প্ৰকাশ পোৱা তথ্য অনুসৰি খাদ্যৰ মূল্য বৃদ্ধিৰ বাবে দেশৰ খুচুৰা মুদ্ৰাস্ফীতিৰ হাৰ জুলাই মাহত ৪.৪৫ শতাংশলৈ বৃদ্ধি পাইছে, যিটো জুন মাহত ৪.৩৮ শতাংশ আছিল। ভাৰতীয় ৰিজাৰ্ভ বেংকৰ মুদ্ৰা নীতি কমিটীয়ে চলিত মাহৰ আৰম্ভণিতে পৰীক্ষণ বৈঠকত পলিচি ৰেট অৰ্থাৎ ৰেপো ৰেট ৫.২৫ শতাংশ অপৰিৱৰ্তিত ৰাখিছিল। দুৰ্বল আৰু অসমান দক্ষিণ-পশ্চিম বাৰিষাৰ উদ্ধৃতি দি ২০২৬-২৭ বিত্তীয় বৰ্ষৰ বাবে খুচুৰা মুদ্ৰাস্ফীতি ৫ শতাংশ হ’ব বুলি প্ৰকল্প কৰিছে।
হিন্দুস্থান সমাচাৰ / মনোজ কুমাৰ শইকীয়া
