গুৱাহাটী, ১৪ আগষ্ট (হি.স.)। অসম বিশেষ টাস্ক ফ’ৰ্চে (এছটিএফ) মাদক দ্ৰব্য সৰবৰাহৰ বিৰুদ্ধে অভিযান চলাই শুকুৰবাৰে গুৱাহাটীৰ লালমাটি অঞ্চলৰ চচলৰ পৰা ১০.১৮৪ কিলোগ্ৰাম সন্দেহযুক্ত হেৰ’ইন জব্দ কৰে। আন্তঃৰাষ্ট্ৰীয় বজাৰত জব্দ কৰা ড্ৰাগছ খিনিৰ মূল্য প্ৰায় ₹৮০ কোটি হ’ব বুলি অনুমান কৰা হৈছে। এই অভিযানত পঞ্জাৱৰ লুধিয়ানাৰ বাসিন্দা হৰদীপ সিঙক গ্ৰেপ্তাৰ কৰা হয়।
গুৱাহাটীত অবৈধ পৰিবহণ আৰু বৃহৎ পৰিমাণৰ নিচাজাতীয় দ্ৰব্যৰ সম্ভাৱ্য সৰবৰাহৰ সন্দৰ্ভত নিশ্চিত চোৰাংচোৱা তথ্য লাভ কৰে এছটিএফে। এই তথ্যৰ পিছতে এছটিএফৰ দলটোৱে গোচৰটো নিৰীক্ষণ কৰিবলৈ আৰম্ভ কৰে আৰু সন্দেহজনক কাৰ্যকলাপ নিশ্চিত কৰাৰ লগে লগে তাৎক্ষণিক ব্যৱস্থা গ্ৰহণ কৰে।
বিষয়াসকলে জনোৱা মতে, শুকুৰবাৰে দিনৰ প্ৰায় ১:৩০ বজাত এছটিএফৰ দলটোৱে লালমাটি অঞ্চলত হৰদীপ সিঙক আটক কৰে। তালাচীৰ সময়ত তেওঁৰ হাতৰ পৰা ১০.১৮৪ কিলোগ্ৰাম সন্দেহযুক্ত হেৰ’ইন উদ্ধাৰ কৰা হয়। ইয়াৰ পিছতে ড্ৰাগছ জব্দ কৰি অভিযুক্তক জিম্মাত লোৱা হয়।
অভিযানৰ সময়ত এছটিএফে অভিযুক্তৰ পৰা এখন মহিন্দ্ৰা থাৰ গাড়ীও জব্দ কৰে। লগতে মোবাইল ফোন, বিভিন্ন নথি-পত্ৰ, আৰু অন্যান্য অত্যাৱশ্যকীয় সামগ্ৰী উদ্ধাৰ কৰা হয়। তদন্তকাৰী সংস্থাটোৱে এই সামগ্ৰীসমূহ পৰীক্ষা কৰি চোৰাং ব্যৱসায়ৰ নেটৱৰ্ক আৰু অভিযুক্তৰ যোগাযোগ সম্পৰ্কীয় গুৰুত্বপূৰ্ণ তথ্য লাভ কৰিছে।
এই বৃহত পৰিমাণৰ হেৰ’ইন জব্দৰ সন্দৰ্ভত অসম এছ টি এফ থানাত ০৭/২০২৬ নম্বৰৰ এটা গোচৰ ৰুজু কৰা হৈছে। এই গোচৰত আৰক্ষীয়ে প্রয়োজনীয় আইনী ব্যৱস্থা হাতত লৈছে৷
তদন্তকাৰী সংস্থাসমূহে এতিয়া জব্দ কৰা হেৰ’ইন ক’ৰ পৰা আহিছিল আৰু গুৱাহাটীত কোন লোকক যোগান ধৰাৰ উদ্দেশ্য আছিল সেইটো নিৰ্ণয় কৰিবলৈ তদন্ত চলাই আছে। অভিযুক্তৰ সৈতে জড়িত অন্যান্য ব্যক্তি, সম্ভাৱ্য যোগানকাৰী, আৰু সমগ্ৰ চোৰাং ব্যৱসায়ৰ নেটৱৰ্কৰ তদন্তও কৰি আছে।
এই নেটৱৰ্ক কোনবোৰ অঞ্চলৰ পৰা চলি আছিল আৰু কিমানজন লোক জড়িত হৈ আছে সেইটোও নিৰ্ণয় কৰিবলৈ চেষ্টা কৰিছে এছটিএফে। উদ্ধাৰ হোৱা মোবাইল ফোন আৰু নথি-পত্ৰ পৰীক্ষা কৰি চোৰাং ব্যৱসায়ৰ নেটৱৰ্ক সন্দৰ্ভত অধিক তথ্য পোৱাৰ সম্ভাৱনা আছে। বিষয়টোৰ অধিক তদন্ত অব্যাহত আছে। উল্লেখ্য যে চচলৰ ওম ৰেচিডেন্সিত বাহৰ পাতিছিল সৰবৰাহকাৰী হৰদীপ সিঙে। এছ টি এফৰ বিষয়া কল্যাণ কুমাৰ পাঠকৰ নেতৃত্বত চলিছিল এই ড্ৰাগছবিৰোধী বিশেষ অভিযান।
হিন্দুস্থান সমাচাৰ / মনোজ কুমাৰ শইকীয়া
