শোণিতপুৰ, ১৩ আগষ্ট (হি.স.)। শোণিতপুৰ জিলাৰ চাৰিদুৱাৰ আৰক্ষী থানাৰ অন্তৰ্গত ৩৫.৫০ কিলোমিটাৰত থকা বি চি টি ৰোড ৰেডৰ পথছোৱাত নিৰাপদ যান-বাহনৰ চলাচলৰ পৰিস্থিতি পুনৰ স্থাপিত হোৱাৰ পৰিপ্ৰেক্ষিতত, জিলা দুৰ্যোগ ব্যৱস্থাপনা প্ৰাধিকৰণ (DDMA), শোণিতপুৰে ১২ আগষ্ট, ২০২৬ তাৰিখে জাৰি কৰা কাৰ্যালয় আদেশ নং ৫৬৬৯০/৩৮২ যোগে উক্ত পথছোৱাত যান-বাহনৰ চলাচল সাময়িকভাৱে বন্ধ/নিষিদ্ধ কৰাৰ নিৰ্দেশ তাৎক্ষণিকভাৱে বলবৎ হোৱাকৈ প্ৰত্যাহাৰ কৰিছে । ২১ চি, ৯১ নং ৰোড কনষ্ট্ৰাকচন কোম্পানী (গড়কাপ্তানী সংস্থা—সীমান্ত পথ সংগঠন)-ৰ সহকাৰী অভিযন্তা (চিভিল)-এ দাখিল কৰা প্ৰতিবেদন অনুসৰি, পথছোৱাটো ১২ টনৰ অনুমোদিত বোজাৰে একমুখী যান-বাহনৰ চলাচলৰ বাবে পুনৰ মুকলি কৰা হৈছে।
অৱশ্যে, পথছোৱাৰ আংশিক পুনৰুদ্ধাৰ আৰু সুৰক্ষাজনিত বিষয়সমূহ বিবেচনা কৰি সম্পূৰ্ণ শক্তিশালীকৰণ আৰু স্থায়ী মেৰামতিৰ কাম সম্পূৰ্ণ নোহোৱালৈকে একক পথৰে একমুখী যান-বাহনৰ চলাচল হিচাপে নিয়ন্ত্ৰিত হৈ থাকিব। উক্ত পথৰ সংশ্লিষ্ট গড়কাপ্তানী কৰ্তৃপক্ষই ডাইভাৰচন পৰিকল্পনা, কৰ্মস্থলীত পৰ্যাপ্ত পোহৰৰ ব্যৱস্থাসহ সতৰ্কবাণী আৰু বিপদসংকেত চিহ্ন স্থাপন, তথা ২৪×৭ ভিত্তিত কাৰিকৰী কৰ্মী নিয়োগৰ ব্যৱস্থা গ্ৰহণ কৰিছে । সেই অনুসৰি, ১২ টনৰ অনুমোদিত বোজাৰ সীমা, প্ৰযোজ্য যান-বাহন নিয়ম আৰু উক্ত পথৰ সংশ্লিষ্ট গড়কাপ্তানী কৰ্তৃপক্ষই জাৰি কৰা সুৰক্ষাজনিত নিৰ্দেশনাসমূহৰ অধীনত উক্ত পথছোৱাত যান-বাহনৰ চলাচল তাৎক্ষণিকভাৱে কাৰ্যকৰী হোৱাকৈ অনুমতি দিয়া হৈছে।
জনসাধাৰণ আৰু বাহন পৰিচালকসকলক উক্ত স্থানত জাৰি কৰা সকলো যান-বাহন আৰু সুৰক্ষাজনিত নিৰ্দেশনা মানি চলিবলৈ আৰু নিৰাপদ তথা শৃংখলাবদ্ধ যান-বাহনৰ চলাচল নিশ্চিত কৰাৰ ক্ষেত্ৰত কৰ্তৃপক্ষক সহযোগিতা কৰিবলৈ পৰামৰ্শ দিয়া হৈছে।
হিন্দুস্থান সমাচাৰ / সমীৰ কাৰ
