কইম্বাটুৰ, ১৩ আগষ্ট (হি.স.)। বিশ্ব হাতী দিৱসৰ দিনাই তামিলনাডু-কেৰালা সীমান্তত ৰে’লৰ খুন্দাত এটি মাইকী হাতী আৰু এটা পোৱালি নিহত হয়। ইয়াৰ বাবে ৰে’লৰ তীব্ৰ গতিৰ কাৰণ আছিল নেকি সেই বিষয়ে বন বিভাগৰ বিষয়াসকলে তদন্ত কৰি আছে। কেৰালাৰ পালাক্কাড জিলাৰ ৱালায়াৰ অঞ্চলত বুধবাৰে (১২ আগষ্ট) নিশা প্ৰায় ১১:৪৫ বজাত সংঘটিত হয় এই দুৰ্ঘটনা।
জানিব পৰা মতে, চাৰিটা হাতীৰ জাকে ৰে’লপথ পাৰ হৈ গৈ থকা অৱস্থাত মংগালুৰু এক্সপ্ৰেছ গাড়ীখনে খুন্দা মাৰে। ইঞ্জিনৰ চকাৰ তলত আবদ্ধ হৈ পৰা পোৱালি আৰু মাইকী হাতীটোৰ মৃত্যু হৈছিল। কোনোবাই বন বিভাগক খৱৰ দিলে। ইয়াৰ পিছতে ৱালায়াৰ বন বিভাগ আৰু পলাক্কাড ৰেলৱেৰ বিষয়াসকল উপস্থিত হয়। পকলেইন মেচিন ব্যৱহাৰ কৰি মৃতদেহ দুটা আঁতৰাই পেলোৱা হয়। এই দুৰ্ঘটনাটোৱে তামিলনাডু আৰু কেৰালাৰ মাজত এঘণ্টাৰো অধিক সময় ধৰি অতি গুৰুত্বপূৰ্ণ ৰে’ল সেৱা ব্যাহত কৰে।
ইয়াৰ উপৰিও কেৰালাৰ পৰা কইম্বাটুৰলৈ ‘বি’ ট্ৰেকত অহা ৰে’লসমূহ সাময়িকভাৱে বন্ধ কৰি দিয়া হৈছিল, আৰু সেই পথৰে যোৱা ৰে’লসমূহ ‘এ’ ট্ৰেকলৈ ডাইভাৰ্ট কৰা হৈছিল। ইয়াৰ পূৰ্বে ২০২১ চনৰ নৱেম্বৰ মাহত মংগালুৰু এক্সপ্ৰেছ ৰে’লৰ খুন্দাত একেটা অঞ্চলতে গৰ্ভৱতী মাইকী হাতীসহ তিনিটা হাতী নিহত হৈছিল। এই দুৰ্ঘটনাক লৈ গভীৰ শোক প্ৰকাশ কৰিছে বন্যপ্ৰাণীপ্ৰেমীসকলে।
বন্যপ্ৰাণী কৰ্মীসকলে কয় যে, তামিলনাডুৰ বনাঞ্চলত এআই কেমেৰাৰ সহায়ত হাতীৰ গতিবিধি নিৰীক্ষণ কৰি পুনৰ বনাঞ্চললৈ খেদি দিয়া হয়। হাতীয়ে ৰে'লপথ পাৰ হ'লে সতৰ্কবাণী জাৰি কৰা হয়, যাৰ ফলত ৰে'লৰ খুন্দাত নপৰে। কেৰেলাৰ বনাঞ্চলত একেধৰণৰ ব্যৱস্থা ৰূপায়ণ কৰিব লাগে।
দুৰ্ঘটনাস্থলীৰ পৰা প্ৰায় ৩০০ মিটাৰ দূৰত্বত তামিলনাডু সীমান্ত। তামিলনাডু বনাঞ্চলৰ সন্দৰ্ভত মাদুক্কাৰাই বনাঞ্চলৰ ৰে’লপথৰ দুয়োকাষে ১৬ কোটি টকা ব্যয় কৰি এআই কেমেৰা আৰু ড্ৰোন কেমেৰাৰে হাতীৰ গতিবিধি নিৰীক্ষণ কৰা হৈছে। ইয়াৰ ফলত তামিলনাডুৰ বনাঞ্চলত ৰে’লৰ দ্বাৰা নিহত হাতীৰ সংখ্যা যথেষ্ট হ্ৰাস পাইছে।
কইম্বাটুৰৰ পৰা পোথানুৰ আৰু ৱালায়াৰ অঞ্চল হৈ কেৰালামলৈ যোৱা ৰেলবোৰ মাদুক্কাৰাই বনাঞ্চলৰ মাজেৰে পাৰ হৈ যায়। এই পথত ৰে’ল চলাচলৰ সুবিধাৰ বাবে ক আৰু খ নামৰ দুটা ৰে’লপথ নিৰ্মাণ কৰা হৈছে। ইয়াৰে ট্ৰেক এ বনাঞ্চলৰ ভিতৰত ২.৯ কিলোমিটাৰ, আৰু ট্ৰেক বি ৪.১৫ কিলোমিটাৰ। একেদৰে কেৰালামৰ ৱালায়াৰৰ পৰা কাঞ্জিকোডলৈ যোৱা ৰে’লপথটোও বনাঞ্চলৰ মাজেৰে পাৰ হৈ যায়।
বিগত ২০ বছৰত মাদুক্কাৰাইৰ পৰা কাঞ্জিকোডলৈ যোৱা অঞ্চলত ৩৫টা বনৰীয়া হাতী ৰে’লৰ দ্বাৰা নিহত হৈছে। ইয়াক ৰোধ কৰিবলৈ পালাক্কাড ৰে’ল প্ৰশাসন আৰু বন বিভাগে বিভিন্ন পদক্ষেপ গ্ৰহণ কৰিছে। বন্যহস্তীৰ সঘনাই অহা-যোৱা কৰা মাদুক্কাৰাই বি ৰে’লপথৰ ৱালায়াৰ আৰু এট্টিমাদেইৰ মাজত দুটা স্থানত আণ্ডাৰপাছ নিৰ্মাণ কৰা হৈছে। ইয়াৰ উপৰিও ১২টা ৱাচটাৱাৰ স্থাপন কৰা হৈছে আৰু ২৪টা এআই কেমেৰা স্থাপন কৰা হৈছে। এইবোৰে ৭.০৫ কিলোমিটাৰ এলেকাত নিৰীক্ষণ কৰি আছে।
হিন্দুস্থান সমাচাৰ / অৰৱিন্দ
