নতুন দিল্লী, ১৩ আগষ্ট (হি.স.)। আই আই টি মাদ্ৰাজৰ সঞ্চালক অধ্যাপক ভি কামাকোটি সন্দৰ্ভত লোকসভাত কংগ্ৰেছৰ সাংসদ প্ৰিয়ংকা গান্ধী ভাদ্ৰাই কৰা মন্তব্যক আপত্তি জনাই শৈক্ষিক আৰু বৈজ্ঞানিক সমাজৰ ১৪,১০০ৰো অধিক ব্যক্তিয়ে লোকসভাৰ অধ্যক্ষলৈ এখন আবেদন প্ৰেৰণ কৰিছে। আৱেদনখনত অধ্যক্ষক এই মন্তব্যৰ প্ৰতি লক্ষ্য ৰাখি সংশ্লিষ্ট সাংসদগৰাকীক মন্তব্য প্ৰত্যাহাৰ কৰি খেদ প্ৰকাশ কৰিবলৈ অনুৰোধ জনোৱা হৈছে।
বিজ্ঞান আৰু শৈক্ষিক সম্প্ৰদায়ক প্ৰতিনিধিত্ব কৰা অধ্যাপক ৰাজীৱ সিঙে এই আবেদন দাখিল কৰে । ২০২৬ চনৰ ৫ আগষ্টৰ পত্ৰখনত উল্লেখ কৰা হৈছে যে এই আবেদনখনে কম সময়ৰ ভিতৰতে বৃহৎ সংখ্যক শিক্ষাবিদ, বিজ্ঞানী, গৱেষকৰ পৰা সমৰ্থন লাভ কৰিছে। ইয়াৰ ভিতৰত বিশ্ববিদ্যালয়ৰ উপাচাৰ্য আৰু প্ৰাক্তন উপাচাৰ্য, প্ৰতিষ্ঠানৰ পৰিচালক, অধ্যাপক, বিজ্ঞানী, গৱেষক, শিক্ষক, শিক্ষা বিশেষজ্ঞ আদি অন্তৰ্ভুক্ত। পত্ৰখনত উল্লেখ আছে যে লোকসভাত পৰীক্ষা সংস্কাৰৰ আলোচনাৰ সময়ত প্ৰিয়ংকা গান্ধী ভাদ্ৰাই আই আই টি মাদ্ৰাজৰ সঞ্চালক অধ্যাপক ভি কামাকোটিক বুজাবলৈ গৰু প্ৰস্ৰাৱ বিশেষজ্ঞ শব্দটো ব্যৱহাৰ কৰিছিল। আবেদনকাৰীসকলে এইটোক এজন বিশিষ্ট বিজ্ঞানী আৰু দেশৰ প্ৰধান উচ্চ শিক্ষানুষ্ঠানৰ মুৰব্বীৰ বিৰুদ্ধে ব্যক্তিগত আৰু অপমানজনক মন্তব্য বুলি অভিহিত কৰিছে।
আবেদনখনত অধ্যাপক কামাকোটিৰ বৈজ্ঞানিক আৰু শৈক্ষিক অৱদানৰ কথাও উল্লেখ কৰা হৈছে, য’ত কোৱা হৈছে যে তেওঁ কম্পিউটাৰ বিজ্ঞান, চাইবাৰ সুৰক্ষা আৰু ৰাষ্ট্ৰীয় শিক্ষাৰ সৈতে জড়িত অসংখ্য ক্ষেত্ৰত অৰিহণা যোগাইছে। আবেদনকাৰীসকলে যুক্তি আগবঢ়ায় যে কোনো শৈক্ষিক প্ৰতিষ্ঠানৰ মুৰব্বীৰ বিৰুদ্ধে এনে ব্যক্তিগত মন্তব্যই কেৱল এজন ব্যক্তিয়েই নহয় সমগ্ৰ বৈজ্ঞানিক আৰু শৈক্ষিক সমাজত প্ৰভাৱ পেলায়। নিজকে অৰাজনৈতিক বুলি অভিহিত কৰা আবেদনখনত কোৱা হৈছে যে ইয়াৰ উদ্দেশ্য গণতান্ত্ৰিক বিতৰ্ক বা চৰকাৰী নীতিৰ সমালোচনাক স্তব্ধ কৰা নহয়। আবেদনকাৰীসকলৰ মতে সংসদত নীতি, নিযুক্তি, প্ৰতিষ্ঠানিক সিদ্ধান্তৰ ওপৰত উত্তপ্ত বিতৰ্ক হ’ব পাৰে যদিও মতানৈক্য ব্যক্তিগত মন্তব্য বা উপহাসৰ পৰিৱৰ্তে যুক্তিৰে উপস্থাপন কৰিব লাগে।
এই আবেদনখনত লোকসভাৰ অধ্যক্ষৰ দুটা মূল দাবী উত্থাপন কৰা হৈছে। প্ৰথমে শৈক্ষিক সমাজে প্ৰকাশ কৰা উদ্বেগসমূহৰ প্ৰতি লক্ষ্য ৰাখিব লাগে। দ্বিতীয়তে, মন্তব্য কৰা সাংসদজনক সেই মন্তব্য প্ৰত্যাহাৰ কৰিবলৈ আৰু দুখ প্ৰকাশ কৰিবলৈ অনুৰোধ কৰা উচিত। আৱেদনকাৰীসকলে উল্লেখ কৰে যে সংসদীয় ভাষা আৰু শিষ্টাচাৰৰ উচ্চ মানদণ্ডৰ সন্দৰ্ভত লোকসভাৰ অধ্যক্ষই স্পষ্ট বাৰ্তা প্ৰেৰণ কৰিব লাগিব। তেওঁলোকৰ মতে ইয়াৰ দ্বাৰা দেশৰ বিজ্ঞানী, শিক্ষক, গৱেষকৰ মৰ্যাদা শক্তিশালী হোৱাৰ লগতে সংসদ আৰু উচ্চ শিক্ষানুষ্ঠানৰ মৰ্যাদাও শক্তিশালী হ’ব। পত্ৰখনত লগতে উল্লেখ কৰা হৈছে যে ১৪,১০০ৰো অধিক লোকৰ সমৰ্থনে প্ৰমাণ কৰে যে শৈক্ষিক আৰু বৈজ্ঞানিক সমাজে জনজীৱনত সন্মানজনক ভাষা আৰু প্ৰতিষ্ঠানৰ মৰ্যাদাক সন্মান জনোৱাৰ প্ৰতি গুৰুত্বপূৰ্ণ।
--------------
হিন্দুস্থান সমাচাৰ / অৰৱিন্দ
