নতুন দিল্লী, ১৩ আগষ্ট (হি.স.)। প্ৰতিৰক্ষা ৰাজ্যিক মন্ত্ৰী তথা ঝাৰখণ্ডৰ বিজেপিৰ সাংসদ সঞ্জয় ছেথে যুৱক-যুৱতীসকলৰ প্ৰতি অন্যায় আৰু চৰকাৰী নিযুক্তি প্ৰক্ৰিয়াত ঝাৰখণ্ড চৰকাৰে অনিয়ম কৰাৰ অভিযোগ উত্থাপন কৰিছে । সংসদত সাংবাদিকৰ সৈতে হোৱা কথা-বতৰাত তেওঁ ঝাৰখণ্ডত প্ৰতিবাদৰ সময়ত যুৱক-যুৱতীসকলৰ বিৰুদ্ধে দাখিল কৰা এফআইআৰ আৰু পৰীক্ষাৰ ফলাফলত হোৱা অনিয়মৰ বাবে চৰকাৰক পোনপটীয়াকৈ জগৰীয়া কৰে।
সঞ্জয় ছেথে অভিযোগ কৰে যে ঝাৰখণ্ডৰ প্ৰতিবাদৰ পিছত প্ৰায় ৬০০ যুৱকৰ বিৰুদ্ধে এফআইআৰ দাখিল কৰা হৈছে। তেওঁ উল্লেখ কৰে যে এই যুৱকসকলে শান্তিপূৰ্ণভাৱে প্ৰতিবাদ কৰিবলৈ আহিছে আৰু তেওঁলোকে হিংসাৰ আশ্ৰয় লোৱা নাই বা শিলগুটি নিক্ষেপ কৰা নাছিল। গতিকে তেওঁলোকৰ বিৰুদ্ধে গোচৰ ৰুজু কৰাটো অযুক্তিকৰ। মুখ্যমন্ত্ৰীৰ বাসগৃহত নিৰাপত্তাৰ ব্যৱস্থাৰ ওপৰতো প্ৰশ্ন উত্থাপন কৰি প্ৰতিবাদৰ পূৰ্বে সমগ্ৰ মহানগৰীতে বেৰিকেড আৰু ৰেজাৰ তাঁৰ লগোৱা বুলি উল্লেখ কৰে। এতিয়া মুখ্যমন্ত্রীৰ বাসগৃহৰ আশে-পাশে থকা পথসমূহো ৰেজাৰৰ তাঁৰেৰে আবদ্ধ কৰি ৰখা হৈছে, যাৰ ফলত জনসাধাৰণৰ গতিবিধি ব্যাহত হৈছে৷
চিডিপিঅ’ পৰীক্ষাৰ ফলাফল সন্দৰ্ভতো গুৰুতৰ অভিযোগ উত্থাপন কৰে সঞ্জয় ছেথে। তেওঁ কয় যে দ্বিতীয় স্থানত অহা প্ৰমোদ কুমাৰ পাঠকৰ উত্তৰ প্ৰদেশৰ এটা ‘ছলভাৰ গেং’ৰ সৈতে সম্পৰ্ক থকাৰ অভিযোগ উত্থাপন হৈছে আৰু ইয়াৰ পূৰ্বেও তেওঁ জেলত ভৰ্তি হৈছিল। ইয়াৰ পিছতো তেওঁ ঝাৰখণ্ড চৰকাৰৰ এজন বিষয়া হিচাপে পদবী অব্যাহত ৰাখিছে বুলি দাবী কৰে ছেথে। এই অভিযোগৰ নিৰপেক্ষ তদন্তৰ বাবে চিবিআইৰ তদন্তৰ দাবী জনাইছে বিজেপি নেতাগৰাকীয়ে। তেওঁ কয় যে ঝাৰখণ্ডৰ যুৱক-যুৱতীসকলে নিযুক্তি প্ৰক্ৰিয়াত স্বচ্ছতাৰ যোগ্য আৰু এই বিষয়ত চিবিআইৰ তদন্ততকৈ কম একো মানি নলয়।
-----------------
হিন্দুস্থান সমাচাৰ / অৰৱিন্দ
