যোৰহাট, ১৩ আগষ্ট (হি.স.)। বানপীড়িত অনুসূচিত জাতিৰ কৃষকক পশুখাদ্য আৰু কৃষি সামগ্ৰী বিতৰণ।আইচিএআৰ–নেচনেল ৰিচাৰ্চ চেণ্টাৰ অন পিগ (ICAR-NRC Pig), ৰাণী, গুৱাহাটী আৰু কৃষি বিজ্ঞান কেন্দ্ৰ (KVK), যোৰহাটৰ যৌথ উদ্যোগত অনুসূচিত জাতি উপ-পৰিকল্পনা (SCSP)-ৰ অধীনত আজি যোৰহাট জিলাৰ প্ৰায় ৩০০ গৰাকী অনুসূচিত জাতিৰ কৃষকক, যাৰ অধিকাংশই শেহতীয়া বানপানীৰ ফলত ক্ষতিগ্ৰস্ত, পশুখাদ্য বিতৰণৰ এক কাৰ্যসূচী অনুষ্ঠিত হয়।
অনুষ্ঠানত মৰিয়নী সমষ্টিৰ বিধায়ক শ্ৰী ৰূপজ্যোতি কুৰ্মী উপস্থিত থাকি হিতাধিকাৰী কৃষক সকলৰ মাজত পশুখাদ্য বিতৰণ কৰে। যোৰহাট জিলাৰ অতিৰিক্ত উপায়ুক্ত শ্ৰী পংকজ বৰাও অনুষ্ঠানত উপস্থিত থাকি বানপীড়িত আৰু দুৰ্বল কৃষক পৰিয়াল সমূহক সময়োপযোগী সহায় আগবঢ়োৱাৰ বাবে এই পদক্ষেপৰ শলাগ লয়।
আইচিএআৰ–নেচনেল ৰিচাৰ্চ চেণ্টাৰ অন পিগৰ পৰা ড° কল্যাণ দে, ড° প্ৰিয়জয় কৰ আৰু ড° লোকেশ ই.-এ অনুষ্ঠানত অংশগ্ৰহণ কৰে। কৃষি বিজ্ঞান কেন্দ্ৰ, যোৰহাটৰ জ্যেষ্ঠ বিজ্ঞানী তথা মুৰব্বী ড° সঞ্জয় বৰঠাকুৰে আদৰণী ভাষণ প্ৰদান কৰি প্ৰাকৃতিক দুৰ্যোগত ক্ষতিগ্ৰস্ত কৃষক সকলৰ জীৱিকা পুনৰুদ্ধাৰৰ ক্ষেত্ৰত প্ৰতিষ্ঠান সমূহৰ মাজত সমন্বয়ৰ গুৰুত্বৰ ওপৰত আলোকপাত কৰে।
ড° কল্যাণ দেই কাৰ্যসূচীৰ উদ্দেশ্য আৰু ৰূপৰেখা ব্যাখ্যা কৰাৰ লগতে বিতৰণ কৰা পশুখাদ্যৰ সঠিক ব্যৱহাৰ আৰু গাহৰিৰ স্বাস্থ্য, বৃদ্ধি তথা উৎপাদনশীলতা বৃদ্ধিত ইয়াৰ গুৰুত্বৰ বিষয়ে কৃষক সকলক বিতংভাৱে অৱগত কৰে। কাৰ্যসূচীৰ অধীনত প্ৰায় ৩০০ গৰাকী অনুসূচিত জাতিৰ কৃষকৰ মাজত গাহৰিৰ পশুখাদ্য, মিনাৰেল মিশ্ৰণ আৰু বৰষুণৰ কোট বিতৰণ কৰা হয়। অধিকাংশ হিতাধিকাৰী বানপীড়িত অঞ্চলৰ কৃষক হোৱা বাবে এই পদক্ষেপৰ জৰিয়তে বানৰ পিছত গাহৰি পালন পুনৰ আৰম্ভ আৰু অব্যাহত ৰখাত তাৎক্ষণিক সহায় আগবঢ়োৱাৰ লক্ষ্য লোৱা হৈছে।
ইয়াৰ উপৰি কেভিকে, যোৰহাটৰ উদ্যোগত আগ্ৰহী কৃষকৰ মাজত মাটিমাহ আদি মাহজাতীয় শস্যৰ বীজ আৰু তামোলৰ পুলি আনুষ্ঠানিকভাৱে বিতৰণ কৰা হয়। উক্ত পদক্ষেপৰ জৰিয়তে শস্য বৈচিত্ৰ্যকৰণ, কৃষিভিত্তিক জীৱিকা শক্তিশালীকৰণ আৰু কৃষক সকলৰ আয় বৃদ্ধিৰ বাবে উপযুক্ত কৃষি উদ্যোগ গ্ৰহণত উৎসাহিত কৰাৰ লক্ষ্য লোৱা হৈছে।
অনুষ্ঠানটো সফলভাৱে সম্পন্ন কৰাৰ ক্ষেত্ৰত কেভিকে, যোৰহাটৰ সকলো বিজ্ঞানী আৰু কৰ্মচাৰীয়ে সক্ৰিয়ভাৱে অংশগ্ৰহণ কৰে। কৃষক সকলক সংগঠিত কৰা, অনুষ্ঠানৰ ব্যৱস্থা, কৃষি সামগ্ৰী বিতৰণ আৰু সামগ্ৰিক পৰিচালনাত তেওঁলোকৰ সমন্বিত প্ৰচেষ্টাই কাৰ্যসূচীটো সুচাৰুৰূপে সম্পন্ন কৰাত গুৰুত্বপূৰ্ণ ভূমিকা পালন কৰে।
এই কাৰ্যসূচীয়ে সময়োপযোগী কৃষি উপকৰণ যোগান, বৈজ্ঞানিক গাহৰি পালন, শস্য বৈচিত্ৰ্যকৰণ আৰু প্ৰতিষ্ঠানসমূহৰ মাজত সমন্বয়ৰ জৰিয়তে বানপীড়িত আৰু দুৰ্বল কৃষক পৰিয়ালসমূহৰ জীৱিকাৰ স্থায়িত্ব বৃদ্ধি কৰাৰ গুৰুত্বক প্ৰতিফলিত কৰে। ICAR-NRC Pig আৰু কেভিকে, যোৰহাটৰ এই যৌথ পদক্ষেপক অনুসূচিত জাতিৰ কৃষক সকলৰ জীৱিকা পুনৰুদ্ধাৰ, সবলীকৰণ আৰু অন্তৰ্ভুক্তিমূলক কৃষি উন্নয়নৰ দিশত এক উল্লেখযোগ্য
পদক্ষেপ।
হিন্দুস্থান সমাচাৰ / নিৰ্মলেন্দু
