নতুন দিল্লী, ৩১ জুলাই (হি.স.)। সংসদত ৰাজহুৱা পৰীক্ষা (অন্যায় উপায় প্ৰতিৰোধ) সংশোধনী বিধেয়ক, ২০২৬ গৃহীত হোৱাৰ পিছত আজি সংসদীয় পৰিক্ৰমা মন্ত্ৰী কিৰেন ৰিজিজুৱে নিজৰ বাসগৃহত সংবাদ মাধ্যমৰ আগত মন্তব্য কৰি কয় যে পৰীক্ষাৰ প্ৰশ্নকাকত ফাদিলৰ গুৰুতৰ সমস্যাৰ সমাধানৰ বাবে উত্থাপন কৰা এই বিধেয়কখন সংখ্যাগৰিষ্ঠ সাংসদৰ সমৰ্থনত গৃহীত কৰা হৈছে। তেওঁ কয় যে প্ৰকৃততে কোনেও এই আইনখনৰ বিৰোধিতা কৰা নাছিল আৰু যিকোনো মতানৈক্য দেখা গৈছিল ৰাজনৈতিক কাৰণত।

ৰিজিজুৱে উল্লেখ কৰে যে শিক্ষা আৰু পৰীক্ষাৰ প্ৰশ্নকাকত ফাদিল বিষয়টোক লৈ সকলো পক্ষই গুৰুত্বপূৰ্ণ । এই আইনখন অতি সোনকালে কাৰ্যকৰী কৰি ছাত্ৰ-ছাত্ৰীৰ ভৱিষ্যতৰ নিৰাপত্তা সুনিশ্চিত কৰাটো চৰকাৰৰ অগ্ৰাধিকাৰ বুলিও তেওঁ কয়। সংসদ পৰিক্ৰমা মন্ত্ৰীগৰাকীয়ে সংসদৰ মসৃণ কাম-কাজতো গুৰুত্ব আৰোপ কৰি কয় যে সদনৰ কাম-কাজ কোনো বাধা নোহোৱাকৈ অব্যাহত ৰখাটো সকলোৰে স্বাৰ্থত। তেওঁ কয় যে সংসদত কেইবাখনো গুৰুত্বপূৰ্ণ বিধেয়ক তালিকাভুক্ত হৈ আছে আৰু সেইবোৰ সময়মতে গৃহীত কৰাটো অতি প্ৰয়োজনীয়।

তেওঁ বিৰোধী দলসমূহক আবেদন জনাই কয় যে তেওঁলোকৰ বিষয়সমূহ উত্থাপন কৰাৰ সম্পূৰ্ণ অধিকাৰ আছে, কিন্তু প্ৰশ্ন ঘণ্টা, বিধানসভাৰ কাৰ্য্যবিধি, আৰু সংসদৰ অন্যান্য গুৰুত্বপূৰ্ণ ব্যৱসায়ত ব্যাঘাত জন্মাব নালাগে। তেওঁৰ মতে গণতান্ত্ৰিক ব্যৱস্থাত আলোচনা আৰু বিতৰ্ক অতি প্ৰয়োজনীয় যদিও জনস্বাৰ্থৰ প্ৰতি লক্ষ্য ৰাখি আইন প্ৰণয়নৰ বাবে সকলো দলৰ সহযোগিতা সমানেই গুৰুত্বপূৰ্ণ।

শেহতীয়াকৈ সংসদে অন্যায় উপায় (সংশোধনী) বিধেয়ক, ২০২৬ত অনুমোদন জনাইছে। এই সংশোধনে প্ৰশ্নকাকত ফাদিল আৰু পৰীক্ষাৰ অসৎ ব্যৱহাৰৰ শাস্তি আৰু জৰিমনা আৰু অধিক কঠোৰ কৰিছে।

হিন্দুস্থান সমাচাৰ / মনোজ কুমাৰ শইকীয়া