কাৰাকাছ, ০৩ জুলাই (হি.স.)। দক্ষিণ আমেৰিকাৰ দেশ ভেনিজুৱেলাত শেহতীয়াকৈ সংঘটিত হোৱা ভয়াৱহ ভূমিকম্পৰ ফলত মৃত্যু হোৱা লোকৰ সংখ্যা ২৫৯৫ লৈ বৃদ্ধি পাইছে আৰু ১২,৪০০ৰো অধিক লোক আহত হৈছে। ভাৰপ্ৰাপ্ত ৰাষ্ট্ৰপতি ডেলচি ৰড্ৰিগেজে কয় যে প্ৰকাশ কৰা সকলো তথ্য সম্পূৰ্ণৰূপে পৰীক্ষা কৰা হৈছে।

তুৰস্কৰ চৰকাৰী আনাডোলু সংবাদ সংস্থা আৰু অন্যান্য সংবাদ মাধ্যমৰ বাতৰি অনুসৰি ভাৰপ্ৰাপ্ত ৰাষ্ট্ৰপতিগৰাকীয়ে কয় যে মৃত আৰু আহতসকলৰ পৰিসংখ্যা পুংখানুপুংখ তদন্তৰ অন্তত আপডেট কৰা হৈছে। প্ৰথমতে মৃত বুলি ঘোষণা কৰা পাঁচজন লোকক পিছত জীৱিত অৱস্থাত উদ্ধাৰ কৰা হয়, তেওঁলোকৰ পৰিচয় ভেনিজুৱেলাৰ আঙুলিৰ ছাপ ভিত্তিক ৰাজসাহায্যযুক্ত ইন্ধন ব্যৱস্থাৰ জৰিয়তে নিশ্চিত কৰা হয়। তেওঁ কয় যে আমি সম্পূৰ্ণৰূপে পৰীক্ষা নোহোৱা পৰিসংখ্যা প্ৰকাশ কৰিব নিবিচাৰো।

২৪ জুনত ভেনিজুৱেলাত ৭.২ আৰু ৭.৫ প্ৰাবল্যৰ দুটা ভূমিকম্পই ৰাজধানী কাৰাকাছ আৰু আটাইতকৈ বেছি ক্ষতিগ্ৰস্ত উপকূলীয় ৰাজ্য লা গুইৰাত ব্যাপক ধ্বংসলীলাৰ সৃষ্টি কৰিছিল। বহুতো অট্টালিকা ভাঙি যায় আৰু ছিমন বলিভাৰ আন্তঃৰাষ্ট্ৰীয় বিমানবন্দৰ যথেষ্ট ক্ষতিগ্ৰস্ত হয়।

চৰকাৰৰ মতে, ভূমিকম্পৰ ফলত কমেও ৮৫৫টা অট্টালিকাৰ ক্ষতিসাধন হোৱাৰ লগতে প্ৰায় ১২,৮০০ লোক গৃহহীন হৈ পৰে। ৰাষ্ট্ৰসংঘৰ শৰণাৰ্থী সংস্থাই (UNHCR) প্ৰকাশ কৰা অনুসৰি প্ৰায় ১৬ হাজাৰ লোক স্থানচ্যুত হৈছে। এটা বেচৰকাৰী তালিকাই ইংগিত দিয়ে যে হাজাৰ হাজাৰ লোক এতিয়াও নিৰুদ্দেশ হৈ আছে।

পুনৰ নিৰ্মাণৰ প্ৰচেষ্টাৰ বাবে চৰকাৰে প্ৰাৰম্ভিক ২০ কোটি ডলাৰ আবণ্টন দিছে। আন্তঃৰাষ্ট্ৰীয় সাহায্য সংগ্ৰহৰ বাবে CAF (Central Bank for Latin America and the Caribbean)ৰ সৈতে এটা বিশেষ একাউণ্ট মুকলি কৰা হৈছে। পুনৰ নিৰ্মাণৰ বাবে আমেৰিকাৰ বিদেশ মন্ত্ৰালয়, আন্তঃৰাষ্ট্ৰীয় মুদ্ৰা নিধি, বিশ্ব বেংক, আন্তঃআমেৰিকান উন্নয়ন বেংকৰ সৈতেও চৰকাৰে আলোচনাত মিলিত হৈছে।

ৰড্ৰিগেজে কয় যে ইজৰাইলী বিশেষজ্ঞৰ এটা দল ভেনিজুৱেলাত উপস্থিত হ’ব যাতে ক্ষতিগ্ৰস্ত অট্টালিকাৰ মূল্যায়ন কৰিব আৰু পুনৰ নিৰ্মাণ প্ৰচেষ্টাত সহায় কৰিব। ৰাষ্ট্ৰসংঘৰ উন্নয়ন কাৰ্যসূচীৰ প্ৰাৰম্ভিক অনুমান অনুসৰি ঘৰ, ব্যৱসায় আৰু অন্যান্য সম্পত্তিৰ প্ৰায় ৬.৭ বিলিয়ন ডলাৰৰ ক্ষতি হৈছে।

ইফালে, আমেৰিকাই সাহায্য আৰু উদ্ধাৰ অভিযানৰ অংশ হিচাপে অঞ্চলটোত চাৰিটা অনুসন্ধান আৰু উদ্ধাৰকাৰী দল আৰু শ শ জোৱান নিয়োগ কৰিছে আৰু ১৫ কোটি ডলাৰৰ মানৱীয় সাহায্যৰ প্ৰতিশ্ৰুতি দিছে। ব্ৰাজিল, মেক্সিকো, কানাডা, কিউবা, ছুইজাৰলেণ্ডকে ধৰি কেইবাখনো দেশেও ৰাষ্ট্ৰসংঘৰ সমন্বয়ত সহায় আগবঢ়াইছে।

ৰড্ৰিগেজে সাহায্য প্ৰচেষ্টাত চৰকাৰী পলমৰ অভিযোগ খাৰিজ কৰি কয় যে ভূমিকম্পৰ কিছু ঘণ্টাৰ ভিতৰতে ৰাষ্ট্ৰীয় জৰুৰীকালীন আৰু নাগৰিক সুৰক্ষাৰ প্ৰট’কল কাৰ্যকৰী কৰা হৈছিল, আৰু উদ্ধাৰ অভিযান এতিয়াও চলি আছে।

--------------

হিন্দুস্থান সমাচাৰ / অৰৱিন্দ