শোণিতপুৰ, ০৩ জুলাই (হি.স.)। প্ৰায় পাঁচবছৰৰ পূৰ্বে এজন ব্যক্তিক হত্যাৰ অপচেষ্টা চলোৱা এজন অভিযুক্তক আজি তেজপুৰত আদালতে দোষী সাব্যস্ত কৰি সশ্ৰম কাৰাদণ্ডৰে দণ্ডিত কৰিছে ৷ উল্লেখযোগ্য যে, শোণিতপুৰৰ ঠেলামৰাৰ দ গাঁৱত ২০২১ৰ পাঁচ জুলাইত অঞ্চলটোৰ সুৰেণ কুৰ্মী নামৰ লোকজনে বুবু কোঁচক প্ৰাণ নাশৰ অপচেষ্টা চলাইছিল ৷

কুৰ্মীৰ আক্ৰমণত আহত হোৱা বুবু কোঁচৰ পিতৃ গৰ্গৰাম কোঁচে ঠেলামৰা আৰক্ষী থানাত দাখিল কৰা এজাহাৰৰ ভিত্তিত পঞ্জীয়ন হোৱা ৯২/২০২১নম্বৰ গোচৰৰ ভিত্তিত তেজপুৰ জিলা ও সত্ৰ ন্যায়ালয়ত ভাৰতীয় দণ্ড বিধিৰ ৩০৭ আৰু ৩২৩ধাৰত এই গোচৰৰ বিচাৰপ্ৰক্ৰিয়া চলিছিল। ইয়াৰ অন্তত আজি তেজপুৰ জিলা ও সত্ৰ ন্যায়াধীশ কৌশিক হাজৰিকাৰ আদালতে সুৰেন কুৰ্মীক দোষী সাব্যস্ত কৰি ১০ বছৰৰ সশ্ৰম কাৰাদণ্ডৰ ৰায়দান কৰে ৷

হিন্দুস্থান সমাচাৰ / সমীৰ কাৰ