মিয়ামি, ০৩ জুলাই (হি.স.)। আৰ্জেণ্টিনাৰ মিডফিল্ডাৰ ৰড্ৰিগো ডি পলে ফুটবল অনুৰাগীসকলক লিয়নেল মেছিৰ বিদায়ৰ বিষয়ে আলোচনা কৰাৰ পৰিৱৰ্তে প্ৰতিখন মেচ আৰু কেৰিয়াৰৰ প্ৰতিটো মুহূৰ্ত উপভোগ কৰিবলৈ আহ্বান জনাইছে। ২০২৬ চনৰ বিশ্বকাপত কেপ ভাৰ্ডেৰ বিৰুদ্ধে ৩২ ৰাউণ্ডৰ খেলখনৰ পূৰ্বে ডি পলে কয় যে মেছিৰ দৰে খেলুৱৈ সঘনাই ঘূৰি নাহে।

৩৯ বছৰীয়া লিয়নেল মেছিয়ে ষষ্ঠটো বিশ্বকাপত খেলি আছে আৰু আর্জেণ্টিনাৰ জার্চি পিন্ধা এইটোৱেই তেওঁৰ শেষ বিশ্বকাপ হ’ব পাৰে বুলি ধাৰণা কৰা হৈছে৷ অৱশ্যে ডি পলে কয় যে দলটোৱে এতিয়াও মেছিৰ পিছৰ যুগৰ কথা চিন্তা কৰা নাই।

মেচৰ পূৰ্বে অনুষ্ঠিত হোৱা এখন কনফাৰেন্সত ডি পলে কয় যে মোৰ বাবে আটাইতকৈ গুৰুত্বপূৰ্ণ কথাটো হ’ল আমি প্ৰতিদিনে লিঅ’ মেছিক উপভোগ কৰা, ঠিক যেনেকৈ প্ৰতিজন আৰ্জেণ্টিনাই উপভোগ কৰে। প্ৰায়ে আমি কিবা এটা নোহোৱা হোৱাৰ পিছত তাৰ মূল্য বুজি পাওঁ, কিন্তু এতিয়া আমাৰ হাতত মেছি আছে, আৰু আমি সেই মুহূৰ্তত জীয়াই থাকিব লাগিব।’

এই বিশ্বকাপত এতিয়ালৈকে তিনিখন মেচত ৬টা গ’ল দিছে মেছিয়ে। আলজেৰিয়াৰ বিৰুদ্ধে প্ৰথমখন মেচতো হেট্ৰিক অৰ্জন কৰি গোল্ডেন বুটৰ দৌৰত আগবাঢ়ি আছে।

অনুৰাগীৰ মাজত “মেছিৰ দেহৰক্ষী” হিচাপে পৰিচিত ডি পলে নিজৰ অধিনায়কৰ সৈতে থকা সম্পৰ্কক তেওঁৰ অন্যতম ডাঙৰ কৃতিত্ব বুলি অভিহিত কৰে।

তেওঁ কয়, লায়নেল মেছিৰ ভাল বন্ধু হোৱাটোৱে মোৰ বাবে বহুত গুৰুত্বপূৰ্ণ। বন্ধুত্ব জীৱনৰ অন্যতম গুৰুত্বপূৰ্ণ কথা। তেওঁৰ সৈতে খেলপথাৰৰ ভিতৰত আৰু বাহিৰত সময় কটোৱাটো এক সন্মান। মই নিজকে অত্যন্ত ভাগ্যৱান বুলি গণ্য কৰোঁ।

ডি পলে যোৱা বছৰ ইণ্টাৰ মিয়ামীত মেছিৰ সৈতে যোগদান কৰিছিল, য’ত তেওঁ এটলেটিকো মাদ্রিদৰ পৰা স্থানান্তৰিত হৈছিল৷

ডি পলে স্বীকাৰ কৰে যে নকআউট পৰ্যায়ত স্পেইন বা উৰুগুৱেৰ দৰে শক্তিশালী দলৰ মুখামুখি হ’ব বুলি আশা কৰিছিল যদিও কেপ ভাৰ্ডে এক উজ্জ্বল প্ৰদৰ্শনেৰে সকলোকে আচৰিত কৰি তুলিছিল।

তেওঁ কয়, আমি গ্ৰুপ পৰ্যায়ত উৎকৃষ্ট ফুটবল খেলা দলৰ সৈতে খেলিছো। আমি এই মেচখনক অতি গুৰুত্বসহকাৰে ল'ব লাগিব কাৰণ আমাৰ বাবে ই এক অতি গুৰুত্বপূৰ্ণ মেচ।

প্ৰায় আঠ বছৰ ধৰি আৰ্জেণ্টিনাৰ মুখ্য প্ৰশিক্ষক লিয়নেল স্কাল’নিৰ বিশ্বাসযোগ্য সদস্য হিচাপে থকা ডি পলৰ মতে নকআউট মেচৰ অভিজ্ঞতা দলটোৰ বাবে উপযোগী হ’ব যদিও প্ৰতিখন মেচ বেলেগ বেলেগ।

তেওঁ কয়, আমাৰ নকআউট মেচৰ অভিজ্ঞতা আছে, কিন্তু প্ৰতিখন মেচে নতুন প্ৰত্যাহ্বান কঢ়িয়াই আনে। এনে মেচত আৱেগ সদায় উচ্চ হয়। অভিজ্ঞতাই আপোনাক সেইবোৰ চম্ভালিবলৈ শিকাই, কিন্তু ইয়াক সন্মান কৰাটোও গুৰুত্বপূৰ্ণ।

কেপ ভাৰ্ডেৰ বিৰুদ্ধে জয়লাভ কৰি কোৱাৰ্টাৰ ফাইনেলত স্থান নিশ্চিত কৰাৰ উদ্দেশ্যেৰে শুকুৰবাৰে মিয়ামীত খেলপথাৰত নামিব বিশ্ব চেম্পিয়ন আৰ্জেণ্টিনা।

-----------------

হিন্দুস্থান সমাচাৰ / অৰৱিন্দ